‘Ang Matang sa Tawo nga Angay Kamong Mamahimo!’
“Sanglit kining tanang butanga pagatunawon man sa ingon, angay nga unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron!”—2 PED. 3:11.
1. Nganong ang ikaduhang sulat ni Pedro maoy nunot-sa-panahon nga tambag alang sa mga Kristohanon sa iyang adlaw?
SA DIHANG gisulat ni apostol Pedro ang iyang ikaduhang sulat, ang Kristohanong kongregasyon nakasinati nag daghang paglutos. Apan, wala kini makapabugnaw sa ilang kasibot o makapugong sa ilang pag-uswag. Busa migamit ang Yawa ug laing taktika nga napamatud-an nang epektibo. Ingon sa gipadayag ni Pedro, naningkamot si Satanas nga mahugawan ang katawhan sa Diyos pinaagi sa mini nga mga magtutudlo kinsa may “mga mata nga puno sa pagpanapaw” ug “kasingkasing nga nabansay sa hakog nga pangibog.” (2 Ped. 2:1-3, 14; Jud. 4) Busa, ang ikaduhang sulat ni Pedro maoy kinasingkasing nga tambag sa pagpabiling matinumanon.
2. Unsay gitumong sa 2 Pedro kapitulo 3, ug unsang mga pangutana ang angay natong isukna sa atong kaugalingon?
2 Si Pedro misulat: “Giisip ko nga husto, samtang ako ania niini nga tabernakulo [o, tawhanong lawas], nga pukawon kamo agig pagpahinumdom kaninyo, kay nahibalo ako nga ang paghiklin sa akong tabernakulo hapit na . . . Busa buhaton ko usab ang kutob sa akong maarangan sa matag higayon aron nga, human sa akong pagbiya, kamo makahimo sa paghisgot niining mga butanga alang sa inyong kaugalingon.” (2 Ped. 1:13-15) Oo, nahibalo si Pedro nga hapit na siyang mamatay, apan buot niya nga mahinumdoman ang iyang mga tambag. Aw, sa pagkatinuod, kini nahimong bahin sa Bibliya ug mabasa natong tanan. Ang kapitulo 3 sa ikaduhang sulat ni Pedro ilabinang makapainteres kanato, kay nagtumong kini sa “kataposang mga adlaw” sa presenteng sistema sa mga butang ug sa kalaglagan sa simbolikong mga langit ug yuta. (2 Ped. 3:3, 7, 10) Unsay tambag ni Pedro alang kanato? Sa unsang paagi ang pagpadapat sa iyang tambag motabang kanato nga mabatonan ang pag-uyon ni Jehova?
3, 4. (a) Unsang makapapukaw nga tambag ang gihatag ni Pedro, ug unsay iyang gipasidaan? (b) Unsa ang tulo ka punto nga atong hisgotan?
3 Human hisgoti ni Pedro ang pagkahanaw sa kalibotan ni Satanas, siya miingon: “Angay nga unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron!” (2 Ped. 3:11, 12) Tin-aw nga wala siya magpatunghag pangutana kondili naghatag siyag makapapukawng tambag. Nahibalo si Pedro nga kadto lamang nagabuhat sa kabubut-on ni Jehova ug nagpakitag diyosnong mga hiyas ang pagatipigan sa umaabot nga “adlaw sa panimalos.” (Isa. 61:2) Busa, ang apostol midugang: “Mga hinigugma, kay nasayod na kamong daan niini, pagbantay kamo nga dili madaldal uban kanila [mini nga mga magtutudlo] pinaagi sa kasaypanan sa masupilon-sa-balaod nga katawhan ug mangahulog gikan sa inyong kaugalingong kalig-on.”—2 Ped. 3:17.
4 Kay usa man si Pedro niadtong adunay ‘abanteng kasayoran,’ siya nahibalo nga sa kataposang mga adlaw, ang mga Kristohanon ilabina gayong magbantay aron mahuptan ang ilang integridad. Sa ulahi, gipatin-aw ni apostol Juan kon nganong gikinahanglan kana. Nakita niya diha sa panan-awon nga si Satanas gipapahawa sa langit ug ‘dako kaayo ang kasuko’ niini niadtong “nagabantay sa mga sugo sa Diyos ug may buluhaton sa pagpamatuod bahin kang Jesus.” (Pin. 12:9, 12, 17) Ang maunongong mga dinihogan sa Diyos ug ang matinumanon nga “ubang mga karnero” magmadaogon gayod. (Juan 10:16) Apan komosta kita ingong indibiduwal? Mahuptan kaha nato ang atong integridad? Matabangan kita sa pagbuhat niana kon maningkamot kita sa (1) pag-ugmad ug diyosnong mga hiyas, (2) pagpabiling walay buling ug walay lama sa moral ug espirituwal, ug (3) pagbaton ug hustong panglantaw sa mga pagsulay. Hisgotan nato kini.
Ugmara ang Diyosnong mga Hiyas
5, 6. Unsang mga hiyas ang angay natong ugmaron, ug nganong nagkinahanglan kinig “tim-os nga paningkamot”?
5 Sa unang bahin sa ikaduhang sulat ni Pedro, siya miingon: “Pinaagi sa inyong pag-amot agig pagsanong sa tanang tim-os nga paningkamot, ipuno sa inyong pagtuo ang kaligdong, sa inyong kaligdong ang kahibalo, sa inyong kahibalo ang pagpugong-sa-kaugalingon, sa inyong pagpugong-sa-kaugalingon ang pagkamainantoson, sa inyong pagkamainantoson ang diyosnong pagkamahinalaron, sa inyong diyosnong pagkamahinalaron ang inigsoong pagbati, sa inyong inigsoong pagbati ang gugma. Kay kon kining mga butanga anaa kaninyo ug nagaawas, kini magpugong kaninyo sa pagkahimong dili aktibo o dili-mabungahon labot sa tukmang kahibalo sa atong Ginoong Jesu-Kristo.”—2 Ped. 1:5-8.
6 Tinuod, nagkinahanglag “tim-os nga paningkamot” ang pagpakig-ambit sa mga buluhaton nga motabang kanato sa pag-ugmad ug diyosnong mga hiyas. Pananglitan, nagkinahanglag paningkamot ang pagtambong sa tanang panagkatigom, pagbasa sa Bibliya adlaw-adlaw, ug ang paghupot ug maayong programa sa personal nga pagtuon. Mahimong nagkinahanglan usab ug paghago ug maayong pagplano ang pagbaton ug regular, makalingaw, ug mapuslanon nga Pamilyahanong Pagsimba. Apan sa dihang maanad na kita niini, mas dali na lang kining buhaton—ilabina kon matagamtam na nato ang mga kaayohan niini.
7, 8. (a) Unsay gisulti sa pipila bahin sa gabii sa Pamilyahanong Pagsimba? (b) Sa unsang paagi ka nakabenepisyo sa inyong pamilyahanong pagsimba?
7 Mahitungod sa kahikayan sa pamilyahanong pagsimba, usa ka sister misulat: “Tungod niana, daghan kaayo mig nakat-onan.” Ang lain miingon: “Sa tinuoray lang, dili nako gustong maundang ang pagtuon sa libro sa kongregasyon. Mao kadtoy akong paboritong tigom. Apan sukad nga naggahin na mig usa ka gabii alang sa Pamilyahanong Pagsimba, akong naamgohan nga nahibalo gayod si Jehova kon unsay among gikinahanglan ug kon kanus-a namo kana gikinahanglan.” Usa ka ulo sa pamilya ang miingon: “Dako kaayog natabang kanamo ang pamilyahanong pagsimba. Nindot kaayo nga dunay kahikayan nga gipahaom sa among panginahanglan ingong magtiayon! Among gibati nga mas napasundayag namo ang bunga sa balaang espiritu, ug mas malipayon kami sa among ministeryo.” Ang laing ulo sa pamilya miingon: “Ang among mga anak naghimog kaugalingong panukiduki ug daghan silag nakat-onan—ug nalingaw sila niini. Tungod sa maong kahikayan, mas masaligon kami nga si Jehova nahibalo sa among mga problema ug nagtubag sa among mga pag-ampo.” Mao ba usab kanay imong gibati niining maanindot nga espirituwal nga tagana?
8 Ayaw tugoti ang gagmayng butang nga makabalda sa inyong pamilyahanong pagsimba. Usa ka magtiayon ang miingon, “Kada Huwebes sa gabii sa milabayng upat ka semana, dunay mahitabo sa among pamilya nga hapit dili madayon ang among pagtuon, apan wala namo kana tugoti nga makabalda kanamo.” Siyempre, may mga panahon nga kinahanglan ninyong usbon ang inyong eskedyul. Bisan pa niana, magmadeterminado nga dili maundang ang inyong Pamilyahanong Pagsimba—bisag usa lang ka semana!
9. Sa unsang paagi gipalig-on ni Jehova si Jeremias, ug unsay atong makat-onan sa iyang ehemplo?
9 Si manalagnang si Jeremias maoy maayong ehemplo kanato. Gihatag ni Jehova kaniya ang espirituwal nga pagpalig-on nga iyang gikinahanglan ug gipabilhan niya kana pag-ayo. Tungod niana, nakalahutay siya sa pagsangyaw niadtong mga dili-madinawaton sa mensahe. Siya miingon nga ‘ang pulong ni Jehova nahisama sa nagdilaab nga kalayo nga natakpan sulod sa akong kabukogan.’ (Jer. 20:8, 9) Kini nakatabang usab kaniya nga makalahutay sa malisod nga mga panahon nga misangko sa kalaglagan sa Jerusalem. Karong adlawa, atong nabatonan ang kompletong sinulat nga Pulong sa Diyos. Kon makugihon kitang magtuon niana ug huptan ang panglantaw sa Diyos, kita, sama kang Jeremias, makalahutay diha sa ministeryo, makapabiling matinumanon latas sa mga pagsulay, ug makapabiling hinlo sa moral ug espirituwal.—Sant. 5:10.
Magpabiling “Walay Buling ug Walay Lama”
10, 11. Nganong angay kitang maningkamot sa pagpabiling “walay buling ug walay lama,” ug unsay kinahanglan natong buhaton?
10 Ingong mga Kristohanon, kita nahibalo nga nagkinabuhi na kita sa kataposang mga adlaw. Busa, dili ikatingala nga ang kalibotan nalinga sa mga butang nga gidumtan ni Jehova, sama sa kadalo, kahilayan, ug kapintasan. Sa laktod nga pagkasulti, ang taktika ni Satanas mao kini: ‘Kon dili madalag hulga ang mga alagad sa Diyos, basin puwede silang mahugawan.’ (Pin. 2:13, 14) Busa, kinahanglang sundon nato ang mahigugmaong tambag ni Pedro: “Buhata ang kutob sa inyong maarangan nga sa kataposan makaplagan kamo [sa Diyos] nga walay buling ug walay lama ug anaa sa pakigdait.”—2 Ped. 3:14.
11 Ang ekspresyong “buhata ang kutob sa inyong maarangan” maoy susama sa nag-unang tambag ni Pedro nga mohimog “tim-os nga paningkamot.” Tin-aw nga si Jehova—ang usa nga nag-inspirar kang Pedro sa pagpahayag nianang mga pulonga—nahibalo nga kinahanglan kitang maningkamot sa pagpabiling “walay buling ug walay lama,” nga dili mahugawan sa kalibotan ni Satanas. Ang pagpaningkamot naglakip sa pagpanalipod sa atong kasingkasing aron dili kita madaog sa sayop nga mga tinguha. (Basaha ang Proverbio 4:23; Santiago 1:14, 15.) Naglakip usab kini sa pagbarog nga malig-on batok niadtong wala makasabot sa atong Kristohanong pagkinabuhi ug “nagpadayon sa pagsulti nga mapasipalahon [kanato].”—1 Ped. 4:4.
12. Unsay gipasalig kanato sa Lucas 11:13?
12 Tungod sa atong pagkadili-hingpit, dili sayon ang pagbuhat ug maayo. (Roma 7:21-25) Apan, molampos lamang kita kon modangop kita kang Jehova, kinsa madagayaong magahatag sa balaang espiritu niadtong kinasingkasing nga nagapangayo niana. (Luc. 11:13) Sa baylo, ang maong espiritu motabang kanato sa pag-ugmad sa mga hiyas nga makapahimuot sa Diyos. Motabang usab kini kanato sa pagsagubang sa mga tentasyon ug kalisdanan, nga mahimong mosamot pa samtang magkaduol ang adlaw ni Jehova.
Tugoti nga Palig-onon Ka sa mga Pagsulay
13. Sa dihang motungha ang mga pagsulay, unsay makatabang kanato sa paglahutay?
13 Samtang nagkinabuhi kita niining daang sistema, makasinati gayod kitag lainlaing pagsulay. Apan imbes maluya, nganong dili kini isipon ingong kahigayonan sa pagpamatuod sa imong gugma sa Diyos ug sa pagpalig-on sa imong pagtuo kaniya ug sa iyang Pulong? Ang tinun-ang si Santiago misulat: “Mga igsoon ko, isipa nga maoy bug-os kalipay kon makasagubang kamo ug nagkadaiyang mga pagsulay, kay nahibalo kamo nga kining sinulayang kalidad sa inyong pagtuo mosangpot ug pagkamainantoson.” (Sant. 1:2-4) Hinumdomi usab nga “si Jehova mahibalo kon unsaon pagluwas sa katawhan nga may diyosnong pagkamahinalaron gikan sa pagsulay.”—2 Ped. 2:9.
14. Sa unsang paagi ka nadasig sa panig-ingnan ni Jose?
14 Tagda ang panig-ingnan sa anak ni Jacob nga si Jose, kinsa gibaligya sa iyang mga igsoon sa pagkaulipon. (Gen. 37:23-28; 42:21) Nawad-an bag pagtuo si Jose tungod sa iyang naagoman? Nayugot ba siya sa Diyos kay gitugotan kini nga mahitabo kaniya? Ang Pulong sa Diyos tin-awng nag-ingon nga wala! Dugang pa, wala matapos niadtong tungora ang pagsulay ni Jose. Sa ulahi, siya giakusahan nga misulay sa pagpanglugos ug gibilanggo. Apan, lig-on gihapon ang iyang pagtuo sa Diyos. (Gen. 39:9-21) Gitugotan niya nga lig-onon siya sa mga pagsulay, ug tungod niana siya dagayang gipanalanginan.
15. Unsay atong makat-onan sa panig-ingnan ni Noemi?
15 Tinuod, mahimong masubo kita tungod sa mga pagsulay. Tingali may mga panahon nga si Jose mibati niana. Tino nga ang ubang matinumanong mga alagad sa Diyos nakasinati usab niana. Tagda si Noemi, kinsa namatyag bana ug duha ka anak nga lalaki. “Ayaw ako tawga ug Noemi,” siya miingon. “Tawga ako ug Mara, [nagpasabot ug “Mapait”], kay ang Labing Gamhanan naghimong mapait kaayo alang kanako.” (Ruth 1:20, 21) Natural ug masabtan nato ang gibati ni Noemi. Apan, sama kang Jose, wala maluya ang iyang pagtuo ni mabungkag ang iyang integridad. Sa baylo, si Jehova nagpanalangin nianang bililhong babaye. (Ruth 4:13-17, 22) Gawas pa niana, sa umaabot nga Paraiso, wagtangon niya ang tanang kadaot nga gipahinabo ni Satanas ug sa daotang kalibotan niini. “Ang unang mga butang dili na pagahinumdoman, ni kini sila motungha pa sa kasingkasing.”—Isa. 65:17.
16. Unsay angay natong tinamdan sa pag-ampo, ug ngano?
16 Bisan unsa pa ang mga pagsulay nga atong maagoman, ang gugma sa Diyos motabang kanato sa paglahutay. (Basaha ang Roma 8:35-39.) Si Satanas dili mohunong sa pagpaluya kanato, apan dili siya molampos kon atong huptan ang “maayong panghunahuna” ug ‘magmabinantayon, o magmakanunayon, kita sa pag-ampo.’ (1 Ped. 4:7) Si Jesus miingon: “Nan, magpadayon sa pagtukaw, nga sa tanang panahon magapangamuyo aron molampos kamo sa pag-ikyas niining tanang butanga nga gitakdang mahitabo, ug sa pagbarog atubangan sa Anak sa tawo.” (Luc. 21:36) Matikdi ang paggamit ni Jesus sa pulong nga ‘pangamuyo,’ nga maoy tim-os kaayo nga matang sa pag-ampo. Pinaagi sa pagtambag kanato nga mangamuyo, gipasiugda ni Jesus nga kini na ang panahon nga huptan ang maayong baroganan atubangan kaniya ug sa iyang Amahan. Kadto lamang nakabaton sa pag-uyon sa Diyos ang makalaom nga maluwas sa adlaw ni Jehova.
Magmaaktibo sa Pag-alagad Kang Jehova
17. Kon lisod sangyawan ang inyong teritoryo, sa unsang paagi ka makabenepisyo sa maayong ehemplo sa mga manalagna?
17 Ang giingon ni Pedro: “Unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron!” angayng magpahinumdom kanato sa kahinungdanon sa pagpakigbahin sa makapadasig nga espirituwal nga mga kalihokan, o “mga buhat sa diyosnong pagkamahinalaron.” (2 Ped. 3:11) Ang panguna niini nga mga buhat mao ang pagmantala sa maayong balita. (Mat. 24:14) Tinuod nga diha sa pipila ka teritoryo lisod ang pagsangyaw, tungod tingali sa kawalay-interes o pagsupak o kaha sa pagkapuliki sa mga tawo. Ang mga alagad ni Jehova kaniadto nakasinati usab niana. Apan, wala gayod sila mohunong kondili ‘sublisubli’ nilang gipaambit sa mga tawo ang mensahe sa Diyos. (Basaha ang 2 Cronicas 36:15, 16; Jer. 7:24-26) Unsay nakatabang kanila sa paglahutay? Gilantaw nila ang ilang buluhaton sumala sa panglantaw ni Jehova, dili nianang sa kalibotan. Dugang pa, giisip nila nga dakong kadungganan ang pagdala sa ngalan sa Diyos.—Jer. 15:16.
18. Unsay epekto sa pagsangyaw sa Gingharian sa pagbayaw unya sa ngalan sa Diyos?
18 Kita nakapribilehiyo usab sa pagpahayag sa ngalan ug katuyoan ni Jehova. Hunahunaa kini: Tungod sa atong pagsangyaw, ang mga kaaway sa Diyos dili makaingon nga wala sila mahibalo bahin kaniya ug sa iyang katuyoan sa dihang moabot na ang adlaw sa paghukom. Sa pagkatinuod, sama kang Paraon, sila mahibalo nga si Jehova ang nakig-away kanila. (Ex. 8:1, 20; 14:25) Sa samang higayon, pasidunggan ni Jehova ang iyang matinumanong mga alagad pinaagi sa paghatag ug daghang pamatuod nga sila iya gayong mga hawas.—Basaha ang Ezequiel 2:5; 33:33.
19. Sa unsang paagi nato ikapakita nga atong gipabilhan ang pagkamapailobon ni Jehova?
19 Sa hinapos sa ikaduhang sulat ni Pedro, siya miingon sa iyang mga isigkamagtutuo: “Isipa ang pailob sa atong Ginoo ingong kaluwasan.” (2 Ped. 3:15) Oo, padayon natong pabilhan ang pagkamapailobon ni Jehova. Sa unsang paagi? Pinaagi sa pag-ugmad ug mga hiyas nga makapahimuot kaniya, pagpabiling “walay buling ug walay lama,” pagbaton ug hustong tinamdan sa mga pagsulay, ug pinaagi sa pagkapuliki diha sa pag-alagad sa Gingharian. Sa pagbuhat niana, mahimong usa kita niadtong makadawat sa dagayang panalangin nga nalangkit sa ‘bag-ong mga langit ug bag-ong yuta.’—2 Ped. 3:13.
Nahinumdom Ka Ba?
• Sa unsang paagi nato maugmad ang diyosnong mga hiyas?
• Sa unsang paagi kita makapabiling “walay buling ug walay lama”?
• Unsay atong makat-onan kang Jose ug Noemi?
• Nganong usa ka dakong pribilehiyo ang pagpakigbahin sa buluhatong pagsangyaw?
[Hulagway sa panid 9]
Unsay makatabang ninyong mga bana sa pag-ugmad ug diyosnong mga hiyas diha sa inyong kaugalingon ug sa inyong pamilya?
[Mga hulagway sa panid 10]
Unsay atong makat-onan sa tinamdan ni Jose sa mga pagsulay?