Mga Pangutana Gikan sa mga Magbabasa
Si Jesus miingon sa iyang mamiminaw: “Kamo kinahanglang magmahingpit, ingon nga ang inyong langitnong Amahan hingpit.” Sa unsang paagi “magmahingpit” ang mga tawo karon?—Mat. 5:48.
Aron matubag kini, angay natong masabtan kon sa unsang paagi ang pulong “hingpit” ug “kahingpitan” gigamit diha sa Bibliya. Dili tanan nga gihubit sa Kasulatan nga “hingpit” nagpasabot nga hingpit sa absolutong diwa. Siyempre, si Jehova nagbaton sa maong absolutong kahingpitan. Ang mga tawo o mga butang mahimong hingpit lamang sa relatibong diwa. Ang Hebreohanon ug Gregong mga pulong sa Bibliya nga gihubad ug “hingpit” sagad nagkahulogang “bug-os,” “hamtong,” o “walay-ikasaway” sumala sa mga sukdanan nga gitakda sa usa ka awtoridad.
Si Adan ug Eva gilalang nga hingpit sa moral, espirituwal, ug sa pisikal. Sila hingpit sumala sa sukdanan sa ilang Maglalalang. Tungod sa pagkadili-masinugtanon, sila wala na makaabot sa maong sukdanan ug sa ingon nawala ang ilang kahingpitan ug sa ilang kaliwat. Busa, pinaagi kang Adan nga ang sala, pagkadili-hingpit, ug kamatayon napasa ngadto sa katawhan.—Roma 5:12.
Bisan pa niana, gipatin-aw ni Jesus sa iyang Wali sa Bukid nga bisan ang dili-hingpit nga mga tawo mamahimong hingpit sa relatibong diwa. Sa maong pakigpulong, siya nagtakdag mga sukdanan alang sa hingpit, o bug-os, nga gugma. Kini ang matang sa gugma nga gipakita sa Diyos sa katawhan. Si Jesus miingon: “Magpadayon sa paghigugma sa inyong mga kaaway ug sa pag-ampo alang sa mga nagalutos kaninyo; aron inyong mapamatud-an ang inyong kaugalingon nga mga anak sa inyong Amahan nga anaa sa mga langit, sanglit siya magapasubang sa iyang adlaw diha sa mga tawong daotan ug sa mga maayo ug magapaulan diha sa mga tawong matarong ug sa mga dili-matarong.” (Mat. 5:44, 45) Sa pagpakitag gugma nianang paagiha, ang mga tinun-an ni Jesus makasundog sa hingpit nga panig-ingnan sa Diyos.
Karon, ang mga Saksi ni Jehova naningkamot nga mahuptan ang maong hataas nga sukdanan sa gugma alang sa uban. Sila nagtinguha sa pagtabang sa mga tawong lainlaig kagikan, rasa, ug relihiyon nga makakat-on sa tukmang kahibalo sa kamatuoran sa Bibliya. Diha sa 236 ka kayutaan, ang mga Saksi nagdumalag kapin sa 7,000,000 ka pagtuon sa Bibliya.
“Kon inyong higugmaon sila nga nahigugma kaninyo, unsa may inyong ganti?” si Jesus nangutana. “Dili ba ang mga maniningil ug buhis nagabuhat man usab sa samang butang? Ug kon inyong komostahon ang inyong mga igsoon lamang, unsang talagsaong butang ang inyong ginabuhat? Dili ba ang katawhan sa kanasoran nagabuhat man usab sa samang butang?” (Mat. 5:46, 47) Ang matuod nga mga Kristohanon wala magpakitag pagpihigpihig sa mga tawo base sa ilang edukasyon o kagikan; ni magpakita lamang ug gugma niadtong makahatag ug balos. Hinunoa, sila nagtabang sa mga kabos ug masakiton, mga bata ug tigulang. Pinaagi niana, ang mga Kristohanon makasundog sa gugma ni Jehova ug busa mamahingpit sa relatibong diwa.
Matagamtam pa kaha nato ang kahingpitan nga nawala ni Adan? Oo, pinaagi sa pagtuo sa halad-lukat ni Jesus, ang masinugtanong katawhan bug-os nga mahimong hingpit panahon sa Usa ka Libo ka Tuig nga Pagmando ni Kristo, sa dihang ‘ang Anak sa Diyos magbungkag sa mga buhat sa Yawa.’—1 Juan 3:8.