Siya Gihigugma sa Diyos ug sa Iyang mga Higala

WALAY usa karon nga nakahibalo sa iyang ngalan. Nailhan lamang nato siya ingong anak nga babaye ni Jepte. Susihon nato ang giingon sa Bibliya bahin kanila. Atong makita nga ang anak nga babaye ni Jepte gihigugma sa Diyos ug sa iyang mga higala.

Mabasa nato ang asoy bahin kang Jepte ug sa iyang anak nga babaye diha sa Bibliya sa Maghuhukom kapitulo 11. Sanglit si Jepte matinumanon man nga alagad sa Diyos, siya kanunay gayong nakighisgot sa Kasulatan uban sa iyang anak nga babaye.

Si Jepte nabuhi sa wala pa mangayog hari ang mga Israelinhon nga katawhan sa Diyos aron momando kanila. Si Jepte isog nga tawo ug maayong makig-away. Busa gihangyo siya sa mga Israelinhon nga mangulo kanila aron makig-away sa mga Ammonhanon, ang kasikbit nga nasod nga dugay na nilang kaaway.

Si Jepte nangayog tabang sa Diyos aron buntogon ang mga Ammonhanon, busa siya naghimog saad. Si Jepte miingon nga kon padaogon siya ni Jehova, iyang ihatag Kaniya ang usa nga unang mogula gikan sa iyang balay inigpauli niya sa ilaha. Kana siya mag-alagad sa tibuok niyang kinabuhi sa tabernakulo, ang dapit niadtong panahona diin ang mga tawo mosimba sa Diyos. Nahibalo ka ba kon kinsa ang unang migula?—a

Ang anak nga babaye ni Jepte! Naguol pag-ayo si Jepte. Usa ra ang iyang anak. Apan siya nakasaad na kang Jehova ug kinahanglan niyang tumanon kini. Dihadiha ang iyang anak miingon: “Amahan ko, kon ikaw nakabungat na sa imong baba kang Jehova, buhata kanako sumala sa migula sa imong baba.” Unya siya mihangyo nga siya pasagdang mag-inusara sulod sa duha ka bulan aron moadto sa kabukiran ug mohilak. Nganong siya naguol? Kay dili na niya mapahimuslan ang iyang katungod sa pagminyo ug pagbatog mga anak aron lamang matuman ang panaad sa iyang amahan. Bisan pa niana, wala niya palabiha ang iyang tinguha. Buot niyang matuman ang iyang amahan ug magmaunongon kang Jehova. Sa imong hunahuna, napalipay ba niya si Jehova ug ang iyang amahan?—

Busa gitugotan ni Jepte ang iyang anak nga molakaw sulod sa duha ka bulan uban sa iyang higalang mga babaye. Sa iyang pagpauli, gituman ni Jepte ang iyang panaad pinaagi sa pagpadala kaniya sa tabernakulo sa Diyos didto sa Shilo aron magpabilin didto sa tibuok niyang kinabuhi. Matag tuig, ang batan-ong mga babaye sa Israel mag-adtoan sa Shilo ug magdasig sa anak ni Jepte.

May kaila ka bang mga batan-ong nagmasinugtanon sa ilang mga ginikanan ug nahigugma kang Jehova?— Mas maayong masuod mo sila. Kon imong sundogon ang anak nga babaye ni Jepte ug ikaw magmasinugtanon ug magmaunongon, makabaton kag maayong mga higala. Mapalipay nimo ang imong mga ginikanan, ug higugmaon ka usab ni Jehova.