Pamatud-i nga Andam Ka!
“Pamatud-i . . . nga kamo andam, tungod kay sa takna nga wala ninyo hunahunaa, ang Anak sa tawo moabot.”—MAT. 24:44.
1, 2. (a) Unsang mga hitabo nga gitagna sa Bibliya ang ikatandi sa pag-atake sa usa ka tigre? (b) Unsay imong buhaton aron maluwas sa umaabot nga pag-atake?
SA DAGHANG katuigan, ang usa ka iladong tigpasundayag naglingaw sa mga tumatan-aw pinaagi sa nabansay nga mga tigreng Bengal. Siya miingon: “Kon mosalig na kanimo ang usa ka mananap, imong bation nga gihatagan ka sa labing nindot nga gasa.” Apan niadtong Oktubre 3, 2003, nawala ang maong pagsalig. Siya giatake sa iyang 172-kilo nga puting tigre. Wala kadto damha, ug ang tigbansay wala makaandam.
2 Makaiikag nga ang Bibliya nagtagna bahin sa pag-atake sa usa ka “mapintas nga mananap,” ug kinahanglan kitang maandam. (Basaha ang Pinadayag 17:15-18.) Kinsa kining “mapintas nga mananap” ug kinsay atakehon niini? Ang mapintas nga mananap naghawas sa Hiniusang Kanasoran ug sa tanang kagamhanan sa kalibotan. Kini moatake ug maglaglag sa Dakong Babilonya, ang tibuok-kalibotang imperyo sa bakak nga relihiyon. Kini makapakugang sa daghan kay ang mapintas nga mananap ug ang Dakong Babilonya samag managhigala. Sila bahin sa kalibotan ni Satanas. Kanus-a kini mahitabo? Wala kita mahibalo sa adlaw ug sa takna. (Mat. 24:36) Apan, nahibalo kita nga mahitabo kini sa takna nga wala damha ug hapit na kining moatake. (Mat. 24:44; 1 Cor. 7:29) Busa, kinahanglang andam kita sa espirituwal aron sa dihang moatake kini ug moabot si Kristo ingong Tiglaglag, siya usab mahimong atong Manluluwas! (Luc. 21:28) Aron maandam kita, atong tun-an ang panig-ingnan sa matinumanong mga alagad sa Diyos nga nagpabiling andam ug busa nakasaksi sa katumanan sa mga saad sa Diyos. Pabilhan ba nato kining tinuod-kinabuhing mga kasinatian?
Pamatud-i nga Andam Ka—Sama Kang Noe
3. Unsang mga kahimtang ang nakapalisod kang Noe nga magmatinumanon sa Diyos?
3 Bisag daotan ang kahimtang sa yuta sa panahon ni Noe, siya nagpabiling andam aron makita ang katumanan sa saad sa Diyos. Hunahunaa ra ang lisod nga mga sulirang giatubang ni Noe sa dihang ang rebeldeng mga manulonda nagsul-ob ug tawhanong lawas ug nakighilawas sa maanyag nga mga babaye! Kini nagpatunghag dagkong kaliwat, “mga gamhanan” nga nanglupig sa uban. (Gen. 6:4) Hunahunaa ang kapintasan nga gipahinabo sa maong mga higante sa mga dapit nga ilang giadtoan. Ang pagkadaotan mikaylap ug ang panghunahuna ug panggawi sa tawo misamot ka daotan. Busa gitakda sa Soberanong Ginoong Jehova ang paglaglag sa maong dili-diyosnong katawhan.—Basaha ang Genesis 6:3, 5, 11, 12.a
4, 5. Sa unsang mga paagi ang atong kahimtang susama sa adlaw ni Noe?
4 Gitagna ni Jesus nga ang kahimtang sa atong adlaw mahisama sa mga adlaw ni Noe. (Mat. 24:37) Pananglitan, kita nakasaksi usab sa pagpangilabot sa daotang mga espiritu. (Pin. 12:7-9, 12) Kini nga mga demonyo nagmateryalisar sa panahon ni Noe. Bisag sila karon gidid-an sa pagmateryalisar, naningkamot sila nga kontrolahon ang mga tawo, bata man o tigulang. Ang mga tawo wala mahibalo nga ang mga demonyo nga may hiwing panghunahuna sa sekso malipayng motan-aw sa daotan ug mahilayong mga buhat niadtong ilang naimpluwensiyahan sa yuta.—Efe. 6:11, 12.
5 Ang Pulong sa Diyos naghubit sa Yawa ingong “mamumuno” ug “may gahom sa pagpahinabog kamatayon.” (Juan 8:44; Heb. 2:14) Kon bahin sa direktang pagpatay, limitado ang iyang gahom. Bisan pa niana, kining mapintas nga espiritu nagdasig sa pagpanglimbong ug seksuwal nga imoralidad. Iyang giimpluwensiyahan ang mga tawo aron makahunahuna sa pagpatay. Pananglitan, 1 sa matag 142 ka bata nga matawo sa Amerika mabiktima sa pagpatay. Tungod sa kaylap nga kapintasan, menos ba ang pagtagad ni Jehova karon kay sa adlaw ni Noe? Dili ba siya molihok?
6, 7. Sa unsang paagi si Noe ug ang iyang pamilya nagpakitag pagtuo ug diyosnong kahadlok?
6 Sa ulahi, si Noe gipahibalo sa hukom sa Diyos nga siya magpahinabog lunop sa yuta, nga maglaglag sa tanang unod. (Gen. 6:13, 17) Si Jehova nagsugo kang Noe sa pagtukod ug arka nga ang porma samag dako kaayong kaban. Ug dayon si Noe ug ang iyang pamilya misugod sa pagtukod niana. Unsay nakatabang kanila nga magmasinugtanon ug magmaandam sa pag-abot sa paghukom sa Diyos?
7 Ang dakong pagtuo ug diyosnong kahadlok maoy nagtukmod kang Noe ug sa iyang pamilya sa pagtuman sa sugo sa Diyos. (Gen. 6:22; Heb. 11:7) Isip ulo sa pamilya, si Noe nagtukaw sa espirituwal ug naglikay sa daotang mga buhat sa mga tawo sa ilang palibot. (Gen. 6:9) Nahibalo siya nga ang iyang pamilya kinahanglang magbantay batok sa mapintasong panggawi ug rebelyosong tinamdan sa mga tawo. Importante nga sila dili sobra ka puliki sa adlaw-adlawng pagkinabuhi. Ang Diyos may gipabuhat kanila, ug kinahanglang isentro sa tibuok pamilya ang ilang kinabuhi niana.—Basaha ang Genesis 6:14, 18.
Si Noe ug ang Iyang Pamilya Napamatud-ang Andam
8. Unsay nagpakita nga ang pamilya ni Noe may diyosnong debosyon?
8 Ang asoy sa Bibliya nasentro sa ulo sa pamilya nga si Noe, apan ang iyang asawa, mga anak, ug mga umagad maoy magsisimba usab ni Jehova. Kini gipamatud-an ni propeta Ezequiel, ug siya miingon nga kon si Noe nagkinabuhi pa sa iyang panahon, ang iyang mga anak dili makadahom nga maluwas pinasukad sa pagkamatarong sa ilang amahan. Sila diha na sa hustong edad sa pagdesisyon kon mosunod ba o dili. Busa, sila mismo nagpamatuod sa ilang gugma sa Diyos ug sa iyang mga sukdanan. (Ezeq. 14:19, 20) Ang pamilya ni Noe nagsunod sa iyang instruksiyon, nagtuo sa iyang gituohan, ug wala magtugot nga ang impluwensiya sa uban makababag sa ilang buluhaton nga gihatag sa Diyos.
9. Kinsa ang modernong mga panig-ingnan nga may pagtuo nga sama kang Noe?
9 Pagkamakapadasig nga ang Kristohanong mga ulo sa pamilya karon nagsundog kang Noe kutob sa ilang maarangan! Ilang naamgohan nga dili igo ang pagtagana lamang ug pagkaon, sapot, puy-anan, ug edukasyon sa ilang pamilya. Kinahanglan usab nilang itagana ang espirituwal nga panginahanglan sa pamilya. Sa pagbuhat niana, ang mga ulo sa pamilya nagpamatuod nga sila andam sa haduol nga paghukom ni Jehova.
10, 11. (a) Unsa kahay gibati ni Noe ug sa iyang pamilya didto sa sulod sa arka? (b) Unsay angay natong ipangutana sa kaugalingon?
10 Ang pamilya ni Noe nagtukod sa arka sulod sa mga 50 ka tuig. Samtang nagtukod, gatosan ka beses silang nagsulod-gula niana. Ila kanang gibulitan, gipondohag pagkaon, ug gipasulod nila ang mga hayop. Handurawa ang esena. Miabot na ang dakong adlaw. Kadto maoy ika-17 ka adlaw sa ikaduhang bulan sa tuig 2370 W.K.P., ug sila nanulod sa arka. Gisirhan ni Jehova ang ganghaan sa arka ug misugod pag-ulan. Kadto dili bunok sa usa lang ka dapit. Ang napondo nga tubig sa kalangitan mibuhagay, ug kadto mimakmak sa arka. (Gen. 7:11, 16) Ang mga tawo sa gawas sa arka nangamatay apan naluwas ang didto sa sulod. Unsa kahay gibati sa pamilya ni Noe? Sila mapasalamaton kaayo sa Diyos. Ug sila seguradong naghunahuna, ‘Maayo ra gyod nga kita naglakaw uban sa matuod nga Diyos ug nangandam!’ (Gen. 6:9) Mahanduraw mo ba nga ikaw naluwas sa Armagedon, nga mapasalamaton usab kaayo?
11 Walay makapugong sa Labing Gamhanan sa pagtuman sa iyang saad nga taposon ang sistema ni Satanas. Pangutan-a ang imong kaugalingon, ‘Bug-os ba kong nagsalig nga matuman ang mga saad sa Diyos bisan sa kinagamyang detalye sa iyang gitakdang panahon?’ Kon mao, pamatud-i nga ikaw andam pinaagi sa paghinumdom kanunay sa nagsingabot nga “adlaw ni Jehova.”—2 Ped. 3:12.
Si Moises Padayong Nagbantay
12. Unsay lagmit makababag kang Moises sa pag-alagad sa Diyos?
12 Atong tagdon ang laing pananglitan. Sa tawhanong panglantaw, maayo na kaayo ang kahimtang ni Moises sa Ehipto. Isip sinagop sa anak nga babaye ni Paraon, lagmit siya tinahod kaayo ug nagpahimulos sa lamiang pagkaon, nindot nga besti, ug maluhong palibot. Siya nakabatog taas nga edukasyon. (Basaha ang Buhat 7:20-22.) Siya makapanunod untag dakong bahandi.
13. Sa unsang paagi gisentro ni Moises ang iyang hunahuna diha sa mga saad sa Diyos?
13 Tungod kay sayong gibansay si Moises sa iyang mga ginikanan, dayag nga nasabtan niya nga kakawangan lamang ang pagsimba sa mga Ehiptohanon ug idolo. (Ex. 32:8) Bisan pag nakabaton siyag taas nga edukasyon sa Ehipto ug nagpuyo sa matahom nga palasyo sa hari, si Moises wala mobiya sa matuod nga pagsimba. Siya tinong namalandong sa mga saad sa Diyos ngadto sa iyang katigulangan ug nagtinguha nga maandam sa pagbuhat sa kabubut-on sa Diyos. Gani, si Moises miingon sa mga anak sa Israel: “Si Jehova . . . ang Diyos ni Abraham, ang Diyos ni Isaac ug ang Diyos ni Jacob, nagpadala kanako nganhi kaninyo.”—Basaha ang Exodo 3:15-17.
14. Sa unsang paagi nasulayan ang pagtuo ug kaisog ni Moises?
14 Dili sama sa way-kinabuhing mga diyos sa Ehipto, ang matuod nga Diyos nga si Jehova maoy tinuod alang kang Moises. Siya nagkinabuhi nga samag nakakita sa “Usa nga dili-makita.” Si Moises nagtuo nga ang katawhan sa Diyos pagawson gikan sa Ehipto, apan wala siya mahibalo kon kanus-a. (Heb. 11:24, 25, 27) Ang iyang dakong tinguha nga mahigawas ang mga Hebreohanon nadayag sa dihang iyang gidepensahan ang usa ka Israelinhong ulipon nga gidagmalan. (Ex. 2:11, 12) Apan kadto dili pa ang gitakdang panahon ni Jehova, busa si Moises mikalagiw sa halayong dapit. Walay duhaduha nga lisod kaniya ang pagbiya sa hamugaway nga kahimtang sa palasyo sa Ehipto ug magpuyo na lang sa kamingawan. Bisan pa niana, gipamatud-an ni Moises nga siya andam pinaagi sa padayong pagbantay sa matag instruksiyon nga ihatag ni Jehova. Busa, takos na siyang gamiton sa Diyos sa pagpagawas sa iyang mga igsoon human sa pagpuyog 40 ka tuig sa Midian. Sa mando sa Diyos, si Moises masinugtanong mibalik sa Ehipto. Ang panahon miabot na aron tumanon ni Moises ang buluhaton nga gihatag kaniya sumala sa paagi sa Diyos. (Ex. 3:2, 7, 8, 10) Balik sa Ehipto, si Moises, “ang labing maaghop sa tanang tawo,” nagkinahanglag pagtuo ug kaisog sa pag-atubang kang Paraon. (Num. 12:3) Siya miatubang kaniya dili lang kas-a kondili sa daghang beses samtang nagkahitabo ang sunodsunod nga hampak.
15. Bisan pa sa mga kakulian, unsay nagtukmod kang Moises nga padayong nagbantay sa mga kahigayonan nga mapasidunggan ang iyang langitnong Amahan?
15 Sa sunod nga 40 ka tuig, gikan sa 1513 W.K.P. hangtod sa 1473 W.K.P., si Moises nakasinatig mga kahigawad. Bisan pa niana, siya nagbantay sa mga kahigayonan nga mapasidunggan si Jehova ug nagdasig sa iyang isigka-Israelinhon sa pagbuhat niana. (Deut. 31:1-8) Ngano? Kay mas gihigugma niya ang ngalan ug pagkasoberano sa Diyos kay sa iyang kaugalingong ngalan. (Ex. 32:10-13; Num. 14:11-16) Bisan pa sa mga kahigawad o kakulian, kinahanglang suportahan usab nato ang pagmando sa Diyos uban ang pagsalig nga ang iyang mga paagi mas maalamon, mas matarong, ug mas maayo. (Isa. 55:8-11; Jer. 10:23) Kana bay imong gibati?
Padayong Magtukaw!
16, 17. Nganong ang Marcos 13:35-37 adunay dakong kahulogan kanimo?
16 “Magpadayon sa pagtan-aw, magpadayon sa pagtukaw, kay wala kamo mahibalo kon kanus-a ang tinudlong panahon.” (Mar. 13:33) Si Jesus naghatag sa maong pasidaan sa dihang naghisgot siya bahin sa ilhanan sa konklusyon sa daotang sistema sa mga butang. Matikdi ang hinapos nga mga pulong sa dakong tagna ni Jesus nga gisulat ni Marcos: “Magpadayon sa pagbantay, kay kamo wala mahibalo kon kanus-a moabot ang agalon sa balay, kon sa gabii ba o sa tungang-gabii o sa tingtugaok sa manok o sayo sa buntag; aron kon kalit siya nga moabot, kamo dili niya makaplagan nga nangatulog. Apan ang ginasulti ko kaninyo ginasulti ko sa tanan, Magpadayon sa pagbantay.”—Mar. 13:35-37.
17 Ang awhag ni Jesus makapukaw sa hunahuna. Siya naghisgot sa upat ka hugna sa pagbantay sa kagabhion. Ang kataposang hugna maoy lisod kaayong panahon sa pagtukaw, kay kini gikan man sa mga alas tres sa kaadlawon hangtod sa pagsilang sa adlaw. Giisip kini sa mga eksperto sa gubat nga kinamaayohang panahon sa pag-atake sa kaaway, nga maabtan silang “nangatulog.” Susama karon, sa dihang ang kalibotan nahinanok sa espirituwal, basin kita malisdan sa pagtukaw. Duna ba kitay pagduhaduha nga kinahanglan kitang “magpadayon sa pagtukaw” ug “magpadayon sa pagtan-aw” sa gitagnang kataposan ug sa atong kaluwasan?
18. Ingong mga Saksi ni Jehova, unsa ang labing bililhong pribilehiyo nga atong nabatonan?
18 Ang tigbansay sa mananap nga gihisgotan sa sinugdan naluwas ra gikan sa pag-atake sa tigreng Bengal. Apan ang tagna sa Bibliya nagpaila nga ang bakak nga relihiyon o ang nahibilin niining daotang sistema dili makaikyas sa nagsingabot nga kataposan. (Pin. 18:4-8) Hinaot isipon sa tanang alagad sa Diyos, bata ug tigulang, nga kinahanglang buhaton nila ang ilang maarangan aron maandam alang sa adlaw ni Jehova sama kang Noe ug sa iyang pamilya. Kita nagkinabuhi sa kalibotan nga nagpasipala sa Diyos diin ang mga magtutudlo sa bakak nga relihiyon, ingon man ang mga agnostiko ug ateyista, nagbiaybiay sa Maglalalang pinaagi sa ilang gipamulong. Apan dili kita angayng maapektohan niana. Atong pamalandongon ang mga panig-ingnan nga atong nahisgotan ug padayong magtukaw alang sa kahigayonan nga depensahan ug pasidunggan si Jehova ingong “ang Diyos sa mga diyos,” oo, “ang Diyos nga dako, gamhanan ug makalilisang.”—Deut. 10:17.
[Footnote]
a Bahin sa “usa ka gatos ug kawhaan ka tuig” nga gihisgotan sa Genesis 6:3, tan-awa ang Bantayanang Torre, Disyembre 15, 2010, panid 30.
Nahinumdom Ka Ba?
• Nganong kinahanglang unahon ni Noe ang espirituwal nga panginahanglan sa iyang pamilya?
• Unsay kaamgiran sa atong panahon sa adlaw ni Noe?
• Bisan pa sa mga kahigawad, nganong gisentro ni Moises ang iyang hunahuna sa mga saad ni Jehova?
• Unsang mga tagna sa Bibliya ang magtukmod kanimo sa pagtukaw?
[Hulagway sa panid 25]
Gisentro ni Noe ug sa iyang pamilya ang ilang hunahuna diha sa buluhaton ni Jehova
[Hulagway sa panid 26]
Ang kasaligang mga saad sa Diyos nagtabang kang Moises sa pagtukaw