Ang Bibliya Makabag-o sa Kinabuhi

UNSAY nakapaaghat sa dili mahigalaong punk rocker nga magmahigugmaon ug magmatinabangon sa uban? Nganong gitalikdan sa usa ka Mexicano ang imoral nga pagkinabuhi? Nganong ang usa ka sikat nga siklista sa Japan miundang sa iyang karera aron makaalagad sa Diyos? Palandonga ang ilang kasinatian.

“Ako Salbahis, Hambogiro, ug Agresibo.”—DENNIS O’BEIRNE

NATAWO: 1958

NASOD: ENGLAND

KANIADTO: PUNK ROCKER

KAAGI: Mga Irish ang kaliwat sa akong Papa, ug nagdako ko sa Ireland ingong Katoliko. Kanunay kong mosimba nga mag-inusara, bisag supak sa akong buot. Apan, ako gigutom sa espirituwal. Pirme kong mangadye sa Amahan Namo, ug ako mahinumdom nga samtang naghigda sa pagkagabii mamalandong ko sa matag hugpong sa mga pulong niini ug gisulayan sa pagsabot kon unsay kahulogan niini.

Pagkatin-edyer nako, miapil ko sa kalihokan sa Rastafarian. Interesado sab ko sa politikal nga mga ideolohiya sa Anti-Nazi League. Apan natakdan ko pag-ayo sa rebelyosong tinamdan sa grupong punk rock. Halos matag adlaw kong nagdroga, ilabina ang marijuana. Kay ang akong tinamdan “marka bahala,” naghuboghubog ko, nagrisgo sa akong kinabuhi, ug wala kaayo magtagad sa uban. Dili ko mahigalaon ug dili makigsulti kang bisan kinsa gawas kon sa tan-aw nako hinungdanon ang hisgotan. Dili gani ko magpaletrato. Kon palandongon nako karon, kaniadto diay ako salbahis, hambogiro, ug agresibo. Apan ako maayo ug mahinatagon basta suod nako ang usa ka tawo.

Sa hapit na kong mag-20 anyos, nainteres ko sa Bibliya. Usa nako ka amigo nga namaligyag droga ang nainteres sa pagbasa ug Bibliya samtang napriso, ug dugay ang among panaghisgot bahin sa relihiyon, sa Simbahan, ug sa papel ni Satanas sa kalibotan. Ako mipalit ug Bibliya ug gitun-an kini. Kami sa akong amigo magbasa sa mga teksto sa Bibliya, maghisgotanay sa among nakat-onan, ug unya maghimog mga konklusyon. Kini midangat ug mga bulan.

Mao kini ang pipila sa nahimo namong konklusyon: nga kita nagkinabuhi sa kataposang mga adlaw niining kalibotana; nga ang mga Kristohanon kinahanglang magsangyaw sa maayong balita sa Gingharian sa Diyos; nga sila kinahanglang dili bahin niining kalibotana, lakip sa politika; ug nga ang Bibliya naghatag ug maayong moral nga giya. Among nakita nga ang Bibliya tinuod ug duna gayoy tinuod nga relihiyon. Apan unsa? Gihunahuna namo ang pangunang mga relihiyon nga may magarbohong simbahan ug seremonya ingon man ang ilang pagkalangkit sa politika, apan among nakita nga dili ingon niana si Jesus. Among nasabtan nga ang Diyos wala maggamit kanila, busa among gisusi kon unsa ang gitudlo sa ubang dili kaayo iladong mga relihiyon.

Kami makigkita sa ilang mga membro ug daghan mig ipangutana kanila. Nahibalo na mi sa giingon sa Bibliya sa matag pangutana, busa masuta namo kon ang ilang tubag kaharmonya ba sa Bibliya. Human sa maong mga panaghisgot, kanunay kong mag-ampo sa Diyos, ‘Kon tinuod ang relihiyon niining mga tawhana, palihog dasiga kong makigkita nila pag-usab.’ Apan milabay na lang ang daghang bulan sa among pakighisgot kanila, wala gihapoy grupo nga nakatubag sa among mga pangutana, ug wala na ko ganahing makigkita nila pag-usab.

Sa kataposan, kami sa akong amigo nahimamat sa mga Saksi ni Jehova. Gisukna namo ang samang mga pangutana, apan ang ilang tubag pinasukad sa Bibliya. Kaharmonya kaayo ang ilang tubag sa among nakat-onan. Busa misukna mig mga pangutana nga wala pa namo makit-i sa Bibliya ang tubag—pananglitan, ang panglantaw sa Diyos sa pagpanigarilyo ug pagdroga. Natubag gihapon nila kini ginamit ang Bibliya. Misugot mi nga motambong sa tigom sa Kingdom Hall.

Lisod alang kanako ang pagtambong sa tigom. Dili ko mahigalaon ug dili ko gustong duolon niadtong mga mahigalaon ug maayog pamesti. Suspetsoso ko sa uban, ug dili na ko gustong motambong sa mga tigom. Apan kanunay gihapon kong mag-ampo sa Diyos nga dasigon ko niyang makigkita kanila kon tinuod ang relihiyon niining mga tawhana, ug gibati nako ang hilabihang kadasig sa pagtuon sa Bibliya uban sa mga Saksi.

GIBAG-O SA BIBLIYA ANG AKONG KINABUHI: Nahibalo ko nga kinahanglan kong mohunong sa pagdroga, ug dali ra nako kining nahimo. Apan lisod hunongon ang panigarilyo. Daghang higayon nga gisulayan ko kini paghunong apan ako napakyas. Pagkahibalo nako nga dali ra kining nahunong sa uban ug wala na gayod sila manigarilyo, nag-ampo ko kang Jehova bahin niini. Human niana, naundang ra gyod nako ang pagpanigarilyo sa tabang ni Jehova. Hinungdanon gayod diay nga matinud-anon ug prangka ta kon moampo kang Jehova.

Dako usab nga kausaban ang akong gihimo sa pamesti ug pamostura. Sa una nakong tambong sa Kingdom Hall, ang akong buhok morag tuyom nga may badlis nga asul. Unya, ako kining gitinag bulaw. Nagmaong ko ug nag-jacket ug panit nga may eslogan. Wala koy tinguhang magbag-o, bisag maluloton kong gitambagan sa mga Saksi bahin niini. Apan sa kataposan, akong napalandong ang 1 Juan 2:15-17: “Ayaw ninyo higugmaa ang kalibotan o ang mga butang nga anaa sa kalibotan. Kon adunay mahigugma sa kalibotan, ang gugma sa Amahan wala diha kaniya.” Ako nakaingon nga sa akong hitsura ako nahigugma niining kalibotana, ug aron ikapakita ko ang gugma sa Diyos, kinahanglan kong magbag-o. Nahimo ko kini.

Kadugayan, nasabtan nako nga dili kay ang mga Saksi lang ang gusto nga ako motambong sa Kristohanong mga tigom. Gipakita sa Hebreohanon 10:24, 25 nga buot sa Diyos nga ako kining buhaton. Paglabay sa panahon nga ako magtambongan na sa mga tigom ug nakaila na sa mga Saksi, ako nakadesidir sa pagpahinungod kang Jehova pinaagi sa pagpabawtismo.

MGA KAAYOHAN NGA AKONG NABATONAN: Natandog kaayo ko nga gitugotan ta ni Jehova nga masuod kaniya. Ang iyang kaluoy ug kahingawa nakaaghat nako nga sundogon siya ug ang iyang Anak, si Jesu-Kristo. (1 Pedro 2:21) Akong nakat-onan nga bisag naningkamot kong maugmad ang Kristohanong personalidad, puwede gihapon nakong mahuptan ang kinaiyanhong ilhanan sa akong pagkatawo. Naningkamot kong magmahigugmaon ug magmatinagdanon ug masundog si Kristo sa akong pagpakiglabot sa akong asawa ug anak nga lalaki. Ug nahingawa ko pag-ayo sa akong mga igsoon sa pagtuo. Ang pagsunod kang Kristo nakahatag nakog dignidad, pagtahod sa kaugalingon, ug katakos sa paghigugma sa uban.

“Sila Naghatag Kanakog Dignidad.”—GUADALUPE VILLARREAL

NATAWO: 1964

NASOD: MEXICO

KANIADTO: IMORAL UG KINABUHI

KAAGI: Usa ko sa pito ka anak nga gipadako sa Hermosillo, sa Sonora, Mexico, usa ka dapit nga kabos kaayo. Namatay si Papa sa bata pa ko, busa kinahanglang magtrabaho ang akong Mama sa pagbuhi namo. Pirme kong magtiniil kay wala miy kuwartang ikapalit ug sapatos. Bata pa kong nagtrabaho aron makatabang sa galastohon sa pamilya. Sama sa daghang pamilya, kami naghuot sa amoa.

Halos sa tibuok adlaw, wala si Mama aron makabantay namo. Sa pagka-6 anyos nako, giabusohan ko sa usa ka 15 anyos nga lalaki. Kini nga pag-abuso nagpadayon sa dugayng panahon. Tungod niini nalibog ko sa akong seksuwalidad. Akong gipakaingon nga normal lang nga maibog ug lalaki. Sa dihang nagpatabang ko sa mga doktor ug mga pari, gipasaligan ko nila nga wala koy problema ug nga normal lang ang akong gibati.

Pagka-14 anyos nako, wala ko magpanuko nga ipaila ang akong kaugalingon nga bayot. Mao kini ang akong gibuhat sulod sa misunod nga 11 ka tuig, gani nakig-ipon ko sa lainlaing mga lalaki. Sa kadugayan, nahimo kong hair stylist ug nagtukod ug parlor. Apan dili ko malipayon. Kanunay kong nag-antos ug mibating nalimbongan. Nasayod kong sayop ang akong gihimo. Busa nangutana ko sa akong kaugalingon, ‘Duna pa ba kahay maayong mga tawo?’

Nakahunahuna ko sa akong magulang nga babaye. Siya nagtuon ug Bibliya uban sa mga Saksi ni Jehova ug unya nagpabawtismo. Suginlan ko niya sa iyang nakat-onan, apan wala ko magtagad. Nakadayeg ko sa iyang pagkinabuhi ug sa iyang kaminyoon. Nakita ko nga sila sa iyang bana tinuod nga naghigugmaay, nagtinahoray, ug maluloton sa usag usa. Sa kadugayan, usa sa mga Saksi ni Jehova misugod sa pagtuon kanako sa Bibliya. Sa primero, nagpauyon-uyon lang ko, nga walay kadasig. Apan sa ulahi nausab kini.

GIBAG-O SA BIBLIYA ANG AKONG KINABUHI: Gidapit ko sa mga Saksi sa usa sa ilang mga tigom, ug miadto ko. Nabag-ohan ko, kay kasagaran yagayagaan ko sa mga tawo, apan wala kana himoa sa mga Saksi. Maayo ang ilang pagtagad kanako, ug sila naghatag kanakog dignidad. Natandog ko.

Misamot ang akong pagdayeg sa mga Saksi sa pagtambong nakog asembliya. Bisan diay sa dagkong panagkatigom, kining mga tawhana sama sa akong magulang—dili salingkapaw. Nakapangutana ko sa akong kaugalingon kon kini na ba kaha ang grupo sa maayong mga tawo nga dugay na nakong gipangita. Ang ilang gugma ug panaghiusa nakapahingangha kanako, ingon man ang ilang paggamit ug Bibliya sa pagtubag sa matag pangutana. Akong nakita nga ang Bibliya nakatabang kaayo sa ilang kinabuhi. Nakita sab nako nga daghan ang kinahanglan kong bag-ohon aron mahimong usa kanila.

Kinahanglang bug-os kong magbag-o, kay nagkinabuhi ko ingong babaye. Ang akong sinultihan, batasan, pamesti, estilo sa buhok, ug matang sa mga higala, tanan kinahanglang bag-ohon. Giyubit ko sa kanhi kong mga higala, nga nag-ingon: “Nganong imo man ning buhaton? Okey ra man unta ka. Ayaw pagtuon sa Bibliya. Naa na nimo ang tanan.” Apan ang kinalisorang bag-ohon mao ang akong imoral nga pagkinabuhi.

Apan, nahibalo kong posible ang paghimog dakong kabag-ohan, kay ang 1 Corinto 6:9-11 nakatukbil sa akong kasingkasing: “Unsa! Wala ba kamo mahibalo nga ang mga tawong dili-matarong dili makapanunod sa gingharian sa Diyos? Ayaw pagpahisalaag. Walay mga makihilawason, ni mga tigsimbag idolo, ni mga mananapaw, ni mga lalaking gihuptan alang sa dili-kinaiyanhong mga katuyoan, ni mga lalaking makigdulog sa mga lalaki . . . nga makapanunod sa gingharian sa Diyos. Ug gani ingon niana ang pipila kaninyo kaniadto. Apan kamo nahugasan na.” Gitabangan ni Jehova ang mga tawo kaniadto nga mabag-o, ug siya usab nagtabang kanako. Nakigbisog gayod ko sulod sa daghang katuigan, apan ang paggiya ug gugma sa mga Saksi nakatabang kaayo kanako.

MGA KAAYOHAN NGA AKONG NABATONAN: Karon, normal na ang akong kinabuhi. Minyo na ko, ug kami sa akong asawa nagtudlo sa among anak nga lalaki sa pagkinabuhi sa mga prinsipyo sa Bibliya. Nakalimtan ko na ang akong kanhing kinabuhi, ug ako nakapahimulos ug daghang espirituwal nga mga kaayohan ug pribilehiyo. Ako nag-alagad ingong ansiyano sa kongregasyon, ug ako nakatabang sa uban nga makakat-on sa kamatuoran sa Bibliya. Nalipay kaayo ang akong Mama sa akong pagbag-o, nga tungod niana siya nagtuon ug Bibliya ug nagpabawtismo. Ang akong manghod nga babaye nga nagkinabuhing imoral nag-Saksi ni Jehova usab.

Bisan ang ubang mga tawo nga nasayod sa akong kanhing kinabuhi nakakita karon nga ako nagbag-o na. Ug nasayod ko kon unsay nakapabag-o nako. Kaniadto nangayo kog tabang gikan sa mga propesyonal apan walay pulos ang ilang tambag. Apan si Jehova nagtabang gayod kanako. Bisag gibati nakong ako walay pulos, siya nahingawa kanako ug nagpakitag gugma ug pailob kanako. Dako gayod ug gikatabang ang kahingawa sa maayo, intelihente, ug mahigugmaong Diyos nga nagtinguha kanakog mas maayong kinabuhi.

“Ako Diskontento, Magul-anon, ug Mibatig Kahaw-ang.”—KAZUHIRO KUNIMOCHI

NATAWO: 1951

NASOD: JAPAN

KANIADTO: MAINDIGON NGA SIKLISTA

KAAGI: Nagdako ko sa usa ka mingaw nga dunggoanang lungsod sa Shizuoka Prefecture, Japan, diin kaming walo sa pamilya nagpuyo sa usa ka gamayng balay. Ang akong Papa dunay shop sa bisikleta. Sukad sa gamay pa ko, dad-on ko niya sa mga lumba sa bisikleta ug nainteres ko niini. Gusto ni Papa nga mahimo kong propesyonal nga maglulumba. Pagkahayskul nako, gibansay ko niya pag-ayo. Sa tulo ka tuig sagunson kong nakadaog sa kompetisyon sa nasod. Gitanyagan ko nga paeskuylahon sa unibersidad, apan nakahukom kong deretsong moeskuyla sa racing school. Pagka-19 anyos nako, ako nahimo nang propesyonal nga maglulumba.

Sukad niadto, buot kong mahimong banggiitang maglulumba sa Japan. Gusto kong makakuwarta ug daghan aron mahamugaway ang akong pamilya. Nagpraktis kog maayo. Sa dihang malisdan ko sa kagrabe sa pagbansay o sa lumba, pirme kong moingon sa akong kaugalingon nga gipakatawo ko ingong maglulumba ug kinahanglan kong mopadayon! Ug nagpadayon gyod ko. Nagbunga ang akong paghago. Sa unang tuig, nakuha nako ang unang premyo sa bag-ohang mga maglulumba. Sa ikaduhang tuig, nakaapil ko sa lumba diin pilion ang mahimong kampeyon sa Japan. Kaunom ko makakuha ug ikaduhang premyo.

Sa dihang nabutang ko sa kategoriya sa hawod nga mga maglulumba, nailhan ko ingong ang lig-og batiis sa Tokai, usa ka dapit sa Japan. Maindigon kaayo ko. Gikaintapan ko kay mangharos ko sa mga lumba. Midako ang akong kita, ug makapalit na ko bisan unsay akong gusto. Mipalit kog balay nga naay gym nga kompletog modernong mga gamit. Mipalit kog sakyanan nga ang kantidad halos katumbas sa balay. Alang sa seguridad, gipamuhonan nako ang akong kuwarta sa balay ug yuta ug sa stock market.

Sa gihapon, ako diskontento, magul-anon, ug mibatig kahaw-ang. Nianang tungora, minyo na ko ug may mga anak, apan masuk-anon ko sa akong pamilya bisan sa gagmayng butang. Mahadlok sila kanako ug bantayan nila ang akong nawong kon ako gisapot ba.

Sa kadugayan, ang akong asawa nagtuon sa Bibliya uban sa mga Saksi ni Jehova. May daghang kausaban human niadto. Gusto niyang motambong sa mga tigom sa mga Saksi, busa mihukom kong magkuyog ming pamilya. Mahinumdoman pa nako nga usa ka gabii niana giduaw ko ug ansiyano didto sa among balay aron magtuon mi sa Bibliya. Mitidlom sa akong kasingkasing ang akong nakat-onan.

GIBAG-O SA BIBLIYA ANG AKONG KINABUHI: Dili gyod nako malimtan nga natandog kaayo ko sa akong nabasa sa Efeso 5:5. Kini nag-ingon: “Walay makihilawason o tawong mahugaw o tawong dalo—nga sa ato pa tigsimbag idolo—nga may panulondon sa gingharian ni Kristo ug sa Diyos.” Akong nakita nga ang lumba sa bisikleta nalangkit sa pagsugal ug gipasiugda niini ang kadalo. Nahasol ang akong tanlag. Kon buot nakong pahimut-an si Jehova, kinahanglang moundang ko sa paglumba. Apan nalisdan ko sa paghimog desisyon.

Bag-o pa lang nakong nakab-ot ang labing malamposong tuig sa akong karera, ug nangandoy pa gyod kog dugang. Apan malinawon ang akong hunahuna tungod sa akong pagtuon sa Bibliya, nga lahi ra kaayo sa akong determinasyon sa pagdaog sa mga lumba! Sukad sa akong pagtuon, katulo na lang ko miapil sa lumba, apan sa akong kasingkasing dili nako kini bug-os matalikdan. Naglibog pod ko kon unsaon pagbuhi sa akong pamilya. Mora kog way mahimo, ug gilisodlisod pa gyod ko sa akong mga paryente tungod sa akong bag-ong tinuohan. Ang akong amahan naglagot pag-ayo. Nagmagul-anon kaayo ko ug nasakit ug ulser.

Nakatabang kanako ang pagpadayon sa pagtuon sa Bibliya ug pagtambong sa mga tigom sa mga Saksi ni Jehova. Inanayng nalig-on ang akong pagtuo. Nangamuyo ko kang Jehova nga dunggon unta niya ang akong mga pag-ampo ug ipaamgo niya kanako nga siya nagpatalinghog. Namenosan pa gyod ang akong kaguol sa dihang gipasaligan ko sa akong asawa nga dili kinahanglang mopuyo siyag dakong balay aron magmalipayon. Hinayhinay kong miuswag.

MGA KAAYOHAN NGA AKONG NABATONAN: Nakita ko nga tinuod gayod ang mga pulong ni Jesus sa Mateo 6:33. Siya miingon: “Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.” Wala kami mawad-i sa “ubang mga butang” nga giingon ni Jesus nga pangunang mga kinahanglanon sa kinabuhi. Bisan tuod ang akong kinitaan karon ika-30 ka bahin na lang sa akong kita niadtong maglulumba pa ko, walay nakulang kanamo sa among pamilya sa milabay nga 20 ka tuig.

Dugang pa, sa dihang ako makig-uban sa akong isigkamagtutuo, duna koy kalipay ug katagbawan nga wala nako batia kaniadto. Dali rang milabay ang mga adlaw. Ang akong pamilyahanong kinabuhi miuswag usab pag-ayo. Ang akong tulo ka anak nga lalaki ug ang ilang mga asawa nahimong matinumanong mga alagad ni Jehova.