Kon sa Unsang Paagi Magmatinud-anon Niining Malimbongong Kalibotan

SAMA sa hangin nga atong gihanggab, ang pagkalimbongan anaa sa tanang dapit. Ang mga tawo mamakak, manobrag singil, mangawat, dili mobayad ug utang, ug manghambog sa inabtik nga mga paagi sa negosyo. Kon magpuyo kita niining kahimtanga, sagad maatubang nato ang mga situwasyon nga magsulay sa atong determinasyon nga magmatinud-anon. Sa unsang paagi nato malikayan ang tendensiya nga manglimbong? Atong hisgotan ang tulo ka butang nga makatabang nato sa paglikay niana. Kana ang kahadlok kang Jehova, maayong tanlag, ug pagkakontento.

Kahadlok Kang Jehova

Si propeta Isaias misulat: “Si Jehova mao ang atong Maghuhukom, si Jehova mao ang atong Maghahatag-lagda, si Jehova mao ang atong Hari.” (Isa. 33:22) Ang pag-ila sa awtoridad ni Jehova moresulta sa diyosnong kahadlok—nga magtukmod nato nga dili gayod manglimbong. Ang Proverbio 16:6 nag-ingon: “Diha sa pagkahadlok kang Jehova ang usa magapahilayo sa daotan.” Ang maong kahadlok dili maoy pagkalisang sa usa ka mapanimaslong Diyos kondili kana maoy pagkamahunahunaon nga dili pasuk-on ang atong langitnong Amahan, kinsa interesado kaayo sa atong kaayohan.—1 Ped. 3:12.

Ang usa ka kasinatian nagpakita sa positibong epekto sa diyosnong kahadlok. Si Ricardo ug iyang asawa nga si Fernanda nagwidro ug katumbas sa pito ka gatos ka dolyar (U.S.) sa ilang deposito sa bangko.a Gisulod kana ni Fernanda sa iyang pitaka nga wala ipha. Pag-abot sa balay ug human makabayad sa pipila ka bayranan, natingala sila nga diha pa sa pitaka ang halos susamang kantidad nga ilang giwidro sa bangko. “Sobra seguro ang gihatag sa cashier sa bangko,” sila miingon. Sa sinugdan, dili unta nila iuli ang kuwarta kay daghan pa silag bayranan. Si Ricardo miingon: “Nag-ampo mi kang Jehova nga makahimo mi sa pag-uli sa kuwarta. Ang among tinguha nga pahimut-an siya agig sanong sa iyang hangyo sa Proverbio 27:11 nagtukmod kanamo sa pag-uli sa kuwarta.”

Binansay-sa-Bibliya nga Tanlag

Mabansay nato ang atong tanlag pinaagi sa pagtuon sa Bibliya ug pagpaningkamot nga ipadapat ang nakat-onan. Busa, ‘ang Pulong sa Diyos, nga buhi ug gamhanan,’ modulot sa atong hunahuna ug kasingkasing. Kini magtukmod nato nga “magmaminatud-on sa tanang butang.”—Heb. 4:12; 13:18.

Tagda ang kahimtang ni João. Ang iyang utang miabot ug katumbas sa lima ka libong dolyar (U.S.). Dayon, mibalhin siyag laing lungsod nga wala bayri ang iyang utang. Walo ka tuig sa ulahi, si João nakakat-on sa kamatuoran, ug tungod sa iyang binansay-sa-Bibliya nga tanlag iyang gipangita ang iyang giutangan aron mabayran kana! Kay si João gamay rag kita ug may asawa ug upat ka anak, ang iyang giutangan misugot nga datadatahan niya matag bulan ang iyang utang.

Pagkakontento

Si apostol Pablo misulat: “Kini maoy usa ka paagi nga makaganansiyag dako, kining diyosnong pagkamahinalaron inubanan sa pagkakontento. . . . Kon kita adunay makaon ug ikabesti, kita magmakontento na niining mga butanga.” (1 Tim. 6:6-8) Kon ipadapat kining maalamong tambag, kita dili malit-agan sa hinakog, kuwestiyonable o daling makapadato nga pamaagi sa negosyo. (Prov. 28:20) Kini motabang usab kanato nga unahon pagpangita ang Gingharian sa Diyos, nga magmasaligon nga itagana ang atong panginahanglan.—Mat. 6:25-34.

Apan tungod sa “malimbongong gahom sa mga bahandi,” angay tang magbantay sa kapeligrohan nga matental sa kahakog ug pagkamaibogon. (Mat. 13:22) Hinumdomi si Acan. Iyang nasaksihan ang milagrosong pagtabok sa mga Israelinhon sa Suba sa Jordan. Apan kay nagmahakogon, siya natental sa pagpangawat ug pipila ka plata, bulawan, ug mahalong besti gikan sa mga inagaw sa siyudad sa Jerico. Iya kadtong gibayran sa iyang kinabuhi. (Jos. 7:1, 20-26) Dili ikatingala nga mga siglo sa ulahi, si Jesus nagpasidaan: “Bukha kanunay ang inyong mga mata ug pagbantay batok sa tanang matang sa hakog nga pangibog”!—Luc. 12:15.

Magmatinud-anon Diha sa Trabahoan

Atong hisgotan ang pipila ka kahimtang nga mahimong magsulay sa atong determinasyon nga magmatinud-anon sa tanang butang. Ang pagkamatinud-anon diha sa trabahoan naglakip sa ‘dili pagpangawkaw’—bisag ginabuhat kana sa uban. (Tito 2:9, 10) Si Jurandir, nga nagtrabaho sa usa ka ahensiya sa gobyerno, matinud-anong nagreport sa gasto sa iyang mga biyahe. Apan ang iyang mga kauban nagreport ug mas dako kay sa ilang nagasto. Ilang nahimo kadto kay sila gitugotan sa pangulo sa ilang departamento nga manglimbong. Gani, ang maong pangulo nagbadlong kang Jurandir sa iyang pagkamatinud-anon ug wala na siya pabiyahea. Apan ngadtongadto, ang ahensiya giawdit ug si Jurandir gidayeg sa iyang pagkamatinud-anon ug siya gipromot.

Ang salesman nga si André gisugo sa iyang amo nga doblehon pagsingil ang bayad sa serbisyo sa iyang mga kustomer. Siya miampo kang Jehova nga makabatog kaisog sa pagsunod sa mga prinsipyo sa Bibliya. (Sal. 145:18-20) Siya misulay sa pagpatin-aw sa iyang amo kon nganong dili siya mosunod sa iyang instruksiyon—apan kawang kana. Busa si André mipahawa sa iyang dakog-suweldo nga trabaho. Apan mga usa ka tuig sa ulahi, gipabalik siya sa trabaho sa iyang kanhing amo, nga nagpasalig kaniya nga ang mga kustomer dili na pasobrahag singil. Si André gihimo pang manedyer.

Bayri ang Utang

Si apostol Pablo nagtambag sa mga Kristohanon: “Ayaw kamo pangutang kang bisan kinsa ug bisan unsang butang.” (Roma 13:8) Mahimong ipakamatarong nato ang dili pagbayad sa atong utang kay ang atong giutangan dato ug wala magkinahanglag kuwarta. Apan ang Bibliya nagpasidaan: “Ang daotan nagapangutang ug dili mobayad.”—Sal. 37:21.

Apan, unsa na man kon tungod sa “wala damhang panghitabo” dili kita makabayad? (Eccl. 9:11) Si Francisco nangutang kang Alfredo ug katumbas sa pito ka libong dolyar (U.S.) aron maimpas ang bayranan sa iyang balay. Apan tungod sa problema sa negosyo, wala siya makabayad sa gikasabotan nga petsa. Si Francisco ang unang miduol kang Alfredo aron makig-estorya, ug nagkasabot sila nga kana datadatahan lang.

Likayi ang Paghatag ug Sayop nga Impresyon

Hinumdomi ang daotang pananglitan ni Ananias ug Sapira, usa ka magtiayon sa Kristohanong kongregasyon sa unang siglo. Pagkabaligya sa ilang uma, bahin lamang sa halin ang gihatag nila sa mga apostoles ug miingon nga kadto na ang tibuok halin. Gusto nilang dayegon sila sa ila konong pagkamahinatagon. Apan si apostol Pedro, ilalom sa pagtultol sa balaang espiritu sa Diyos, nagyagyag sa ilang pagkamalimbongon, ug sila gipatay ni Jehova.—Buh. 5:1-11.

Kasukwahi sa malimbongong si Ananias ug Sapira, ang mga magsusulat sa Bibliya prangka ug matinud-anon. Si Moises matinud-anong mitaho sa iyang pagkasuko nga miresulta nga siya wala pasudla sa Yutang Saad. (Num. 20:7-13) Sa susama, wala ililong ni Jonas ang iyang kahuyangan una pa ug human sa pagwali ngadto sa mga taga-Nineve. Hinunoa, iya kadtong gisulat.—Jon. 1:1-3; 4:1-3.

Sa pagkatinuod, ang kaisog gikinahanglan aron isulti ang tinuod bisan pag may dili maayong sangpotanan, sama sa gipakita sa nahitabo sa 14-anyos nga si Nathalia sa eskuylahan. Nakita niya sa iyang test paper nga gitsekan sa iyang titser ang usa ka sayop niyang tubag. Bisag nahibalo siya nga maapektohan ang iyang grado, si Nathalia wala magpanuko sa pagsulti niini sa iyang titser. “Gitudloan ko sa akong ginikanan nga kinahanglan kong magmatinud-anon aron mahimuot si Jehova. Makonsensiya ko kon dili ko kini isulti sa akong titser,” siya miingon. Ang titser nakadayeg sa pagkamatinud-anon ni Nathalia.

Pagkamatinud-anon—Magpasidungog Kang Jehova

Ang 17-anyos nga si Giselle nakakitag pitaka nga may mga dokumento ug kuwarta nga katumbas ug $35 (U.S.). Gihangyo niya ang mga opisyal sa eskuylahan nga iuli kana sa tag-iya. Usa ka bulan sa ulahi, ang bise-prinsipal sa eskuylahan nagbasag sulat sa tibuok klase nga nagdayeg kang Giselle tungod sa iyang pagkamatinud-anon ug sa iyang pamilya tungod sa maayong pagbansay kaniya ug sa pagmatuto kaniya sa relihiyosong paagi. Ang iyang “maayong mga buhat” naghimaya kang Jehova.—Mat. 5:14-16.

Gikinahanglan ang paningkamot aron magmatinud-anon samtang nagpuyo taliwala sa ‘mga mahigugmaon sa kaugalingon, mahigugmaon sa salapi, mapagawalon, mapahitas-on, ug dili maunongon.’ (2 Tim. 3:2) Bisan pa niana, ang pagkahadlok kang Jehova, binansay-sa-Bibliya nga tanlag, ug pagkakontento makatabang aron kita magpabiling matinud-anon niining malimbongong kalibotan. Atong maugmad usab ang mas suod nga relasyon kang Jehova, kinsa maoy ‘matarong ug nahigugma sa matarong nga mga buhat.’—Sal. 11:7.

[Footnote]

[Mga hulagway sa panid 7]

Ang kahadlok kang Jehova makapalig-on sa atong determinasyon nga magmatinud-anon

[Hulagway sa panid 8]

Ang atong pagkamatinud-anon maghimaya kang Jehova