Pagkat-on Gikan sa Pulong sa Diyos

May Paglaom ba Alang sa mga Patay?

Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Unsay paglaom alang sa mga patay?

Pag-abot ni Jesus sa Betania duol sa Jerusalem, upat na ka adlawng namatay ang iyang higalang si Lazaro. Si Jesus miadto sa lubnganan uban kang Marta ug Maria nga mga igsoon ni Lazaro. Unya nagtapok ang panon sa mga tawo. Mahanduraw ba nimo ang kalipay ni Marta ug Maria sa dihang gibanhaw ni Jesus si Lazaro?—Basaha ang Juan 11:20-24, 38-44.

Si Marta mituo sa pagkabanhaw. Dugay nang nasayod ang matinumanong mga alagad ni Jehova nga sa umaabot, ang Diyos magbanhaw sa mga patay aron mabuhi pag-usab sa yuta.—Basaha ang Job 14:14, 15.

2. Unsa ang kahimtang sa mga patay?

Bisan tuod ang puwersa sa kinabuhi, o “espiritu,” mao ang nagsustento sa kinabuhi sa tawo ug hayop, kita dili mga espiritu nga nagpuyo lamang sa unodnong lawas. (Ecclesiastes 3:19; Genesis 7:21, 22) Kita pisikal nga mga linalang nga hinimo gikan sa abog. (Genesis 2:7; 3:19) Sa dihang mamatay ang atong utok, mahanaw ang atong mga hunahuna. Busa, human banhawa, si Lazaro walay gisulti kon unsay iyang nasinatian sa kamatayon kay ang mga patay walay nahibaloan.—Basaha ang Salmo 146:4; Ecclesiastes 9:5, 10.

Dayag nga ang mga patay wala mag-antos. Busa bakak ang pagtulon-an nga ang Diyos nagsakit sa mga tawo human sa kamatayon. Kini nagpasipala sa Diyos. Bisan ang ideya sa pagsakit sa mga tawo, dulumtanan alang kaniya.—Basaha ang Jeremias 7:31.

3. Kita ba makahimo sa pagpakigsulti sa mga patay?

Ang mga patay dili makasulti. (Salmo 115:17) Apan kon ang daotang mga manulonda makigsulti sa mga tawo, mahimong magpakaaron-ingon sila nga mao ang espiritu sa namatay. (2 Pedro 2:4) Gidili sa Diyos ang pagpakigsulti sa mga patay.—Basaha ang Deuteronomio 18:10, 11.

4. Kinsa ang banhawon?

Sa umaabot nga bag-ong kalibotan, minilyon nga anaa sa lubnganan ang mabanhaw. Bisan ang uban nga nagbuhat ug daotan banhawon sanglit sila wala makaila kang Jehova.—Basaha ang Lucas 23:43; Buhat 24:15.

Ang mga binanhaw makakat-on sa kamatuoran bahin sa Diyos ug magpasundayag ug pagtuo kang Jesus pinaagi sa pagsunod kaniya. (Pinadayag 20:11-13) Kadtong banhawon ug magbuhat ug maayo makatagamtam ug kinabuhing walay kataposan sa yuta. Apan, ang pipila sa mga binanhaw padayong mobuhat ug daotan. Ang ilang pagkabanhaw maoy “pagkabanhaw sa paghukom.”—Basaha ang Juan 5:28, 29.

5. Unsay atong makat-onan kang Jehova maylabot sa pagkabanhaw?

Ang pagkabanhaw posible kay gipadala sa Diyos ang iyang Anak aron sa pagsakripisyo sa iyang kinabuhi alang kanato. Busa usa kini ka pagpasundayag sa gugma ug dili-takos nga kalulot sa Diyos alang kanato.—Basaha ang Juan 3:16; Roma 6:23.

Alang sa dugang impormasyon, tan-awa ang kapitulo 6 ug 7 niini nga basahon, Unsay Tinuod nga Gitudlo sa Bibliya?, nga gipatik sa mga Saksi ni Jehova.

[Hulagway sa panid 16]

Si Adan gilalang gikan sa abog