Makahuloganong Kinabuhi—Karon ug Hangtod sa Hangtod
MAKAPLAGAN nimo ang tinuod nga kahulogan sa kinabuhi bisan karon. Sa unsang paagi? Pinaagi sa pagsunod sa maalamong mga prinsipyo sa Bibliya. Susihon nato ang pipila niini.
PRINSIPYO SA BIBLIYA: “Wala nay laing mas maayo,” misulat si Haring Solomon, nga ang usa ka tawo ‘mokaon ug moinom ug himoon niya ang iyang kalag nga makapahimulos ug maayo sa iyang kahago.’—ECCLESIASTES 2:24.
Natural lang nga mobati kitag katagbawan sa usa ka mapuslanong buluhaton. Bisan sa labing malisod nga mga kahimtang, ikaw karon makabatog katagbawan sa kinabuhi kon ikaw makugihon ug matinud-anon.
PRINSIPYO SA BIBLIYA: “Adunay labaw nga kalipay sa paghatag kay sa pagdawat.”—BUHAT 20:35.
Nasinatian sa daghan nga ang paghimog maayong butang alang sa uban, sama sa paggamit sa ilang panahon ug kusog sa pagtabang sa uban panahon sa kalisdanan, nakapalipay kaayo kanila ug nakahatag ug tinuod nga kahulogan sa ilang kinabuhi. “Ayaw ihikaw ang maayo gikan kanila nga takos niini,” misulat si Solomon, “sa dihang anaa sa gahom sa imong kamot ang pagbuhat niini.”—Proverbio 3:27.
Tagda ang pananglitan ni Ralph. Human moretiro, siya miduyog sa iyang asawa sa bug-os panahong Kristohanong ministeryo. Sila mogugol ug daghang oras diha sa ministeryo matag bulan, nga magsakripisyo sa pagtudlo sa uban bahin sa Bibliya. “Inig-uli namo sa balay pagkagabii, doble ang among kakapoy. Gawas nga nagkatigulang na mi, gikapoy sab mi sa paggamit sa among kusog sa pag-alagad sa among langitnong Amahan,” matod ni Ralph. “Maayo ni nga matang sa kakapoy!” Siya ug ang iyang asawa malipayon kay ang ilang kinabuhi nasentro sa pagtabang sa uban.
PRINSIPYO SA BIBLIYA: “Ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit.”—PROVERBIO 17:17.
Ang gisalohan nga kalisdanan mas daling pas-anon. Matod sa Ingles nga magsusulat nga si Francis Bacon nga alang niadtong walay tinuod nga mga higala “ang kalibotan daw samag kamingawan.” Kon duna kay tinuod nga mga higala ug kon ikaw usab usa ka maayong higala, nindot ug malipayon ang kinabuhi ug mas daling dad-on ang mga suliran.
PRINSIPYO SA BIBLIYA: “Malipayon kadtong mahunahunaon sa ilang espirituwal nga panginahanglan.”—MATEO 5:3.
Gipaila ni Jesus ang kinahanglanon kon gusto nimong mapahimuslan ang katumanan sa mga saad sa Diyos—ilha ug tagbawa ang imong “espirituwal nga panginahanglan.” Dili sama sa mga hayop, kita dunay kinaiyanhong panginahanglan sa pagsabot sa kahulogan ug katuyoan sa kinabuhi. Si Jehova lamang ang makatagbaw sa maong panginahanglan pinaagi sa iyang Pulong, ang Bibliya. Sumala sa atong nabasa sa nag-unang artikulo, gibutyag sa Bibliya ang katuyoan sa Diyos alang sa yuta. Kini naghisgot kon nganong kita ania dinhi, nganong daghan kaayo ang kasakitan, ug unsay gidahom sa Diyos kanato. Ang pagsabot niini nga kamatuoran hinungdanon sa atong pagbaton ug makahuloganon ug malipayong kinabuhi. Malipayon kadtong nagtuon sa Bibliya ug nagpadapat sa ilang nakat-onan. Ngano? Kay ilang gipalig-on ang ilang pagsalig sa atong Maglalalang, ang “malipayong Diyos,” si Jehova.—1 Timoteo 1:11.
PRINSIPYO SA BIBLIYA: “Hinumdomi ang imong Maglalalang . . . sa dili pa moabot ang panahon sa kalisdanan ug ang mga tuig nga ikaw moingon, ‘Wala koy nakitang katuyoan niini.’”—ECCLESIASTES 12:1, THE NEW ENGLISH BIBLE.
Ang tambag ni Haring Solomon ngadto sa mga batan-on, kinsa usahay dili makakita kon unsay mga kasakitan nga modangat sa kinabuhi, aplikado kanatong tanan. Isentro ang imong kinabuhi sa imong Maglalalang. Kana maghatag ug tinuod nga kahulogan sa imong kinabuhi. Likayi kini nga tinamdan: “Mangaon kita ug manginom, kay ugma kita mangamatay.” (1 Corinto 15:32) Kon imong unahon ang Diyos, “maayo ang [imong] sangpotan,” matod sa Ecclesiastes 8:12.
Napamatud-an kini ni Wendi. Sa batan-on pa, siya ug ang iyang igsoong babaye nagtuog Kinatsila aron sila makabalhin sa Dominican Republic, diin may dakong panginahanglan sa mga magwawali sa maayong balita. “Daghan ang among sakripisyo aron makaalagad sa dapit nga may panginahanglan, apan kami nagmalipayon. Kadtong unom ka bulan nga pagboluntaryo dili nako ikabaylo sa bisan unsa! Dili ikatandi ang mga panalangin nga among nadawat sa mga sakripisyong among gihimo.”
Makahuloganon ang Kinabuhi Kon Maunongon Ka sa Diyos
Ang pagbatog maayong relasyon sa Diyos makahatag gayod ug tinuod nga kahulogan sa imong kinabuhi. Ngano? Dili lamang kay gidaldal ni Satanas si Adan ug Eva sa pagrebelde sa Diyos, kondili gipasabot usab niya nga walay magpabiling maunongon sa Diyos ubos sa pagsulay. (Job 1:9-11; 2:4) Makatabang ka sa pagpamatuod kang Satanas ingong bakakon! Sa unsang paagi? Sa pagpabiling maunongon sa Diyos ug sa iyang mga prinsipyo, ug sa pag-ila sa kinatas-ang katungod ni Jehova sa pagtino kon unsay maayo ug daotan alang kanato.—Pinadayag 4:11.
Kinahanglan kitang molahutay sa mga hagit kon gitinguha nato ang pagkamatarong. Dili na ba diay makahuloganon ang atong kinabuhi tungod sa mga hagit? Buweno, ibutang ta nga may mabangis nga kaaway nga nagbutangbutang sa atong hinigugmang higala o membro sa pamilya. Kon makaagom tag kalisdanan kay gilabanan nato ang iyang reputasyon, mawad-an na ba diayg kahulogan ang atong kinabuhi? Siyempre dili gayod! Ikalipay natong mag-antos sa kalisdanan tungod sa atong paglaban kaniya. Kon kita usab magmaunongon sa Diyos taliwala sa mga kalisdanan karon, kita makapalipay gayod sa iyang kasingkasing.—Proverbio 27:11.
Makahuloganong Kinabuhi Hangtod sa Hangtod
Paningkamoti pag-ayo nga makakat-on bahin sa Diyos ug sa iyang katuyoan. Si Jesu-Kristo miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Kon tumanon na sa Diyos ang iyang orihinal nga katuyoan, ang matinumanong mga tawo makapahimulos sa “kinabuhing walay kataposan” sa paraisong yuta. Busa ang kinabuhi mahimo gayong makahuloganon ug malipayon.—Salmo 145:16.
Asa nimo makaplagi ang kahibalo nga gihisgotan ni Jesus? Sa inspiradong Pulong sa Diyos, ang Bibliya. Kon buot nimong magtuon, mahimo kang mosulat sa mga magpapatik niining magasina. Sila malipay sa paghimog kahikayan nga may motabang kanimo sa pagtuon kon unsay tinuod nga gitudlo sa Bibliya.