Kinsay Angayng Motudlo sa mga Anak Bahin sa Diyos?
“Ang tinun-an dili labaw sa iyang magtutudlo, apan ang matag usa nga hingpit nga natudloan mahisama sa iyang magtutudlo.”—LUCAS 6:40.
GIBATI sa ubang ginikanan nga dili sila takos motudlo sa ilang mga anak bahin sa Diyos. Tingali ilang gihunahuna nga sila walay igong edukasyon o kulag kahibalo sa relihiyon. Busa, gusto nilang idelegar kini ngadto sa ilang paryente o sa usa ka relihiyosong lider.
Nan, kinsa man diay ang labing takos motudlo sa ilang mga anak bahin sa espirituwal nga mga butang ug moral nga mga prinsipyo? Tagda ang giingon sa Bibliya bahin niini, ug itandi kini sa nadiskobrehan sa mga tigdukiduki.
Unsay Papel sa Amahan?
Ang gitudlo sa Bibliya: “Mga amahan, ayaw ninyo hagita sa kasuko ang inyong mga anak; hinunoa dumalaha sila diha sa pagbansay ug sa pagtulon-an sa Ginoo.”—Efeso 6:4, “Ang Biblia, NCV.”
Ang nadiskobrehan sa mga tigdukiduki: Sa unsang paagi makabenepisyo ang mga amahan kon hugot ang ilang relihiyosong pagtuo? Ang artikulong Fathers’ Religious Involvement and Early Childhood Behavior, nga gipatik niadtong 2009, nag-ingon: “Mahimong mas maayong amahan ang mga lalaki kon duna silay relihiyong gianiban. Pinaagi sa relihiyon sila matabangan sa ilang isigka-membro, mahimong disiplinado, ug matagan-ag mga pagtulon-an ug giya kon unsaon sa pagkinabuhi.”
Gipasiugda sa Bibliya ang kahinungdanon sa papel sa amahan sa pagmatuto ug pagbansay sa mga anak. (Proverbio 4:1; Colosas 3:21; Hebreohanon 12:9) Apan mapadapat ba kanang tambaga karon? Niadtong 2009 ang University of Florida nagpatik ug artikulo nga naghisgot sa impluwensiya sa amahan ngadto sa mga anak. Nakaplagan sa mga tigdukiduki nga kon ang mga amahan manguna sa pagmatuto sa mga anak, ang mga anak mas mabination ug may pagtamod sa kaugalingon. Ang mga batang lalaki dili kaayo badlongon, ug ang mga batang babaye mas ugdang ug panghunahuna. Tino nga mapadapat gihapon karon ang tambag sa Bibliya.
Unsa ka Hinungdanon ang Papel sa Inahan?
Ang gitudlo sa Bibliya: “Ayaw talikdi ang balaod sa imong inahan.”—Proverbio 1:8.
Ang nadiskobrehan sa mga tigdukiduki: Niadtong 2006, ang Handbook of Child Psychology nag-ingon: “Sa aberids, ang panahong gigugol sa mga inahan sa direktang pagpakiglabot sa ilang mga bata labaw ug 65% ngadto sa 80% kay sa gigugol sa mga amahan, ug ingon usab niini sa daghang kayutaan.” Busa ang sinultihan, aksiyon, ug tinamdan sa inahan dakog epekto sa personalidad sa bata.
Kon magtinabangay ang inahan ug amahan sa pagtudlo sa mga anak bahin sa Diyos, gihatag nila sa mga anak ang duha ka bililhong gasa. Una, ang mga anak mahimong higala sa ilang langitnong Amahan, usa ka panaghigala nga mohatag ug kaayohan sa tibuok nilang kinabuhi. Ikaduha, makat-onan sa mga anak kon sa unsang paagi magtinabangay ang bana ug asawa sa pagkab-ot ug hinungdanong mga tumong. (Colosas 3:18-20) Bisan tuod ang uban makatabang, responsibilidad sa mga ginikanan ang pagtudlo sa mga anak bahin sa Diyos ug sa kahikayan sa Diyos diha sa pamilya.
Nan, unsaon pagtudlo sa mga ginikanan ang ilang mga anak? Unsay labing epektibong mga paagi?