Pagkat-on Gikan sa Pulong sa Diyos

Unsaon Nimo Pag-ila sa Matuod nga Pagsimba?

Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Usa ra ba ang matuod nga relihiyon?

Si Jesus nagtudlo sa iyang mga tinun-an nga usa ra ang matuod nga relihiyon. Gipakasama kinig dalan padulong sa kinabuhi. Bahin niini, si Jesus miingon: “Diyutay ra ang mga nakakaplag niini.” (Mateo 7:14) Ang pagsimba nga gibase sa iyang Pulong sa kamatuoran mao lamang ang dawaton sa Diyos. Ang matuod nga mga magsisimba nahiusa sa usa ka pagtuo.—Basaha ang Juan 4:23, 24; 14:6; Efeso 4:4, 5.

2. Nganong daghan kaayong relihiyon ang nag-angkong Kristohanon?

Ang mini nga mga manalagna nagdaot sa Kristiyanidad ug naggamit niini alang sa ilang kaayohan. Ingon sa gitagna ni Jesus, sila nagpakaaron-ingnong iyang ‘mga karnero’ apan sila diay samag gutom nga mga lobo. (Mateo 7:13-15, 21, 23) Ang mini nga Kristiyanidad mitungha ilabina human mamatay ang mga apostoles.—Basaha ang Buhat 20:29, 30.

3. Unsay mga ilhanan sa matuod nga pagsimba?

Ang matuod nga mga magsisimba nagtahod sa Bibliya ingong Pulong sa Diyos. Sila naningkamot nga magkinabuhi sumala sa mga prinsipyo niini. Busa ang matuod nga relihiyon lahi sa relihiyon nga gibase sa hunahuna sa tawo. (Mateo 15:7-9) Ang matuod nga mga magsisimba magpadapat sa ilang gisangyaw.—Basaha ang Juan 17:17; 2 Timoteo 3:16, 17.

Ang matuod nga relihiyon nagpasidungog sa ngalan sa Diyos, si Jehova. Gipaila ni Jesus ang ngalan sa Diyos. Gitabangan niya ang mga tawo nga makaila sa Diyos ug gitudloan sila sa pag-ampo nga ang ngalan sa Diyos balaanon. (Mateo 6:9) Sa inyong dapit, unsang relihiyona ang nagpasiugda sa paggamit sa ngalan sa Diyos?—Basaha ang Juan 17:26; Roma 10:13, 14.

4. Unsaon nimo pag-ila ang matuod nga mga magsisimba?

Ang matuod nga Kristohanon nagsangyaw sa Gingharian sa Diyos. Gipadala sa Diyos si Jesus aron sa pagsangyaw sa Gingharian sa Diyos. Kini ang bugtong paglaom alang sa katawhan. Si Jesus nagsulti bahin niini hangtod sa adlaw sa iyang kamatayon. (Lucas 4:43; 8:1; 23:42, 43) Gisugo niya ang iyang mga tinun-an nga isangyaw ang Gingharian sa Diyos. Kon may mosangyaw kanimo bahin sa Gingharian sa Diyos, unsa kahay iyang relihiyon?—Basaha ang Mateo 10:7; 24:14.

Ang mga sumusunod ni Jesus dili bahin niining daotang kalibotan. Sila dili makigbahin sa politikal ug sosyal nga mga panagbangi. (Juan 17:16) Sila dili usab mosundog sa daotang panggawi ug tinamdan sa kalibotan.—Basaha ang Santiago 1:27; 4:4.

5. Unsa ang pangunang ilhanan sa matuod nga Kristiyanidad?

Ang matuod nga mga Kristohanon may talagsaong gugma sa usag usa. Ilang nakat-onan sa Pulong sa Diyos ang pagtahod sa tanang etnikong grupo. Bisag ang bakak nga relihiyon sagad hugot nga nagpaluyo sa mga gubat sa kanasoran, ang matuod nga mga magsisimba wala mohimo niini. (Miqueas 4:1-4) Hinunoa, sila nagsakripisyo sa ilang panahon ug kahinguhaan sa pagtabang ug pagdasig sa uban.—Basaha ang Juan 13:34, 35; 1 Juan 4:20, 21.

Unsang grupoha ang nagbase sa tanan nilang pagtulon-an diha sa Bibliya, nagpasidungog sa ngalan sa Diyos, ug nagmantala sa Gingharian sa Diyos ingong bugtong paglaom sa tawo? Unsang grupoha ang nagpakitag gugma ug wala magpaluyo sa gubat? Ang kamatuoran nagbutyag nga sila ang mga Saksi ni Jehova.—1 Juan 3:10-12.

Alang sa dugang nga impormasyon, tan-awa ang kapitulo 15 niining libroha,Unsay Tinuod nga Gitudlo sa Bibliya? nga gipatik sa mga Saksi ni Jehova.

[Hulagway sa panid 16]

“Sila nagpahayag sa dayag nga sila nakaila sa Diyos, apan sila naglimod kaniya pinaagi sa ilang mga buhat.”—Tito 1:16