Ang Nagtakobang Magmamando sa Kalibotan Gibutyag

KAS-A si Jesus miingon sa katawhan: “Ang magmamando niining kalibotana palagpoton.” Sa ulahi, siya midugang nga ang ‘magmamando niining kalibotana walay gahom kaniya’ ug nga kini “gihukman na.” (Juan 12:31; 14:30; 16:11) Kinsay gitumong ni Jesus?

Kay si Jesus naghisgot man bahin sa “magmamando niining kalibotana,” tataw nga wala siya magtumong sa iyang Amahan, si Jehova nga Diyos. Nan, kinsa “ang magmamando niining kalibotana”? Sa unsang paagi siya “palagpoton”? Sa unsang paagi siya “gihukman”?

“Ang Magmamando Niining Kalibotana” Nagpaila sa Kaugalingon

Maingon nga ang utok sa krimen sagad manghambog sa iyang gahom, mao usab ang Yawa sa dihang gitental niya si Jesus, ang Anak sa Diyos. Human ipakita kang Jesus ang “tanang gingharian” sa kalibotan, mao kini ang tanyag ni Satanas: “Ihatag ko kanimo kining tanan nga awtoridad ug ang ilang himaya, tungod kay gitugyan na kini kanako, ug ngadto kang bisan kinsa nga buot ko ihatag ko kini. Busa, ikaw, kon ikaw mohimog usa ka buhat sa pagsimba sa atubangan ko, maimo kining tanan.”—Lucas 4:5-7.

Kon ang Yawa mao mismo ang pagkadaotan, sumala sa gituohan sa uban, unsaon pagpatin-aw ang maong tentasyon? Gitental ba kaha si Jesus sa usa ka daotang tinguha o sa kahasol sa galamhan human sa iyang bawtismo? Kon mao, nganong ikaingon man nga “walay sala diha kaniya”? (1 Juan 3:5) Inay ilimod nga ang Yawa maoy nagmando sa katawhan, si Jesus nagtawag kaniya nga “magmamando niining kalibotana” ug naghubit kaniya ingong “mamumuno” ug “bakakon.”—Juan 14:30; 8:44.

Mga 60 ka tuig human tentala si Kristo sa Yawa, gipahinumdoman ni apostol Juan ang mga Kristohanon bahin sa gamhanang impluwensiya ni Satanas, nga nag-ingon nga “ang tibuok kalibotan nailalom sa gahom sa usa nga daotan.” Siya usab miingon nga kini “nagpahisalaag sa tibuok gipuy-ang yuta.” (1 Juan 5:19; Pinadayag 12:9) Dayag nga ang Bibliya naghisgot bahin sa dili makitang espiritu ingong “ang magmamando niining kalibotana.” Apan unsa ka dako ang iyang impluwensiya sa katawhan?

Ang Magmamando sa Kalibotan Naghatag ug Gahom sa Iyang mga Sakop

Sa pagsulat bahin sa pagpakigbugno sa mga Kristohanon sa ilang pagtuo, tin-awng gipaila ni apostol Pablo ang ilang numero unong mga kaaway. Siya prangkang miingon: “Kita adunay pakigdumog, dili batok sa dugo ug unod, kondili batok sa mga kagamhanan, batok sa mga awtoridad, batok sa mga magmamando sa kalibotan niini nga kangitngit, batok sa daotang mga puwersa nga espirituhanon sa langitnong mga dapit.” (Efeso 6:12) Busa, kini nga pakigbugno dili batok sa tawo kay gihisgotan man nga kini “dili batok sa dugo ug unod,” kondili batok sa “daotang mga puwersa nga espirituhanon.”

Sa kadaghanang modernong hubad sa Bibliya, ang gitumong dinhi nga “daotang mga puwersa nga espirituhanon” dili ang pagkadaotan, kondili ang gamhanang espirituhanong mga persona. Ang ubang bersiyon naghubad niini ingong “ang daotang espirituhanong pundok sa langitnong mga dapit” (Revised Standard Version), “ang daotang espirituhanong panon sa kalangitan” (The Jerusalem Bible), ug “ang daotang labaw-tawhanong puwersa sa kalangitan” (The New English Bible). Busa, ang Yawa nagagamit sa iyang gahom pinaagi sa ubang rebeldeng mga manulonda nga mitalikod sa “ilang nahiangay nga puloy-anang dapit” sa langit.—Judas 6.

Gibutyag sa basahon ni Daniel kon sa unsang paagi kini nga “mga magmamando” naggahom na sa kalibotan sukad pa kaniadto. Kay nahingawa pag-ayo sa iyang mga isigka-Hudiyo nga namalik sa Jerusalem niadtong 537 B.C.E. gikan sa pagkadestiyero sa Babilonya, si Daniel miampo alang kanila sulod sa tulo ka semana. Ang usa ka manulonda, nga gipadala sa Diyos aron sa paglig-on kaniya, nagsulti kon nganong siya nalangan. Siya miingon: “Ang prinsipe sa gingharian sa Persia nagbarog batok kanako sulod sa kawhaag-usa ka adlaw.”—Daniel 10:2, 13.

Kinsa kining ‘prinsipe sa Persia’? Dayag nga ang manulonda wala magpunting sa Persianhong hari nga si Ciro, kinsa may pag-uyon kang Daniel ug sa iyang katawhan. Gawas pa, sa unsang paagi mapugngan sa tawhanong hari ang espirituhanong linalang sulod sa tulo ka semana nga usa ra man gani ka gabiing gilaglag sa usa ka manulonda ang 185,000 ka banggiitang manggugubat? (Isaias 37:36) Kining kaaway nga ‘prinsipe sa Persia’ usa gayod ka sinugo sa Yawa, nga mao, usa ka demonyong gihatagag gahom sa pagmando sa Imperyo sa Persia. Sa ulahing bahin niini nga asoy, ang manulonda sa Diyos miingon nga siya kinahanglang makig-away pag-usab batok sa “prinsipe sa Persia” ug sa lain pang demonyo, “ang prinsipe sa Gresya.”—Daniel 10:20.

Busa, kita makahinapos nga duna gayoy dili-makitang “mga magmamando sa kalibotan,” ang demonyong mga prinsipe nga nagmando usab sa kalibotan ilalom sa pagbulot-an sa ilang pangulo, si Satanas nga Yawa. Apan unsa may ilang tumong hangtod karon?

Ang Magmamando sa Kalibotan Nagpakita sa Iyang Dakong Kasuko

Sa kataposang basahon sa Bibliya, ang Pinadayag, giasoy ni apostol Juan kon giunsa pagpildi ni Jesus, ingong Miguel nga arkanghel, ang Yawa ug ang iyang mga demonyo ug kon unsay daotang sangpotanan sa pagpalayas kanila gikan sa langit. Atong mabasa: “Alaot ang yuta . . . tungod kay ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.”—Pinadayag 12:9, 12.

Giunsa pagpadayag sa Yawa ang iyang dakong kasuko? Maingon nga daghang kriminal ang buot ‘mogahom o mang-angin,’ ang Yawa ug ang iyang mga demonyo determinado usab nga ang yuta ug ang mga molupyo niini maangin sa ilang kalaglagan. Kay nasayod nga hamubo na lang ang iyang panahon, gigamit sa Yawa ang usa sa iyang gigamhan—ang dagkong negosyo—aron ipasiugda ang naghingaping tinguha sa pagpamalit, nga maoy nakatiti sa kinaiyanhong kahinguhaan ug nakadaot sa tibuok yuta, sa ingon nameligro ang paglungtad sa tawo.—Pinadayag 11:18; 18:11-17.

Sukad sa paglungtad sa tawo, makita na ang pagkauhaw sa Yawa sa gahom diha sa politika ug relihiyon. Sa basahon sa Pinadayag, ang mga kagamhanan gihulagway ingong mapintas nga mga mananap nga gihatagan sa Yawa ug “dakong awtoridad.” Gihubit usab niini ang way-kokaulawng panag-alyansa sa politika ug relihiyon ingong dulumtanang espirituwal nga pakighilawas. (Pinadayag 13:2; 17:1, 2) Palandonga ang mga pagdaogdaog, pag-ulipon, gubat, ug etnikong mga away sa daghang kasiglohan nga nakakalas ug minilyong kinabuhi. Ikaingon ba gayod nga ang makalilisang nga mga panghitabo sa kasaysayan maoy buhat lamang sa tawo? O tungod ba kini sa pagmaniobra sa dili makita ug daotan nga espirituhanong mga puwersa?

Tukmang gipaila sa Bibliya ang usa nga nagmaniobra sa tawhanong mga lider ug mga kagamhanan sa kalibotan. Nasayod man sila o wala, ang katawhan nagbanaag sa personalidad sa ilang magmamando ug sa tinguha niining ‘mogahom o mang-angin.’ Apan hangtod kanus-a mag-antos ang katawhan ilalom sa pagmando sa Yawa?

Kataposang Gutlo sa Yawa

Ang buluhaton ni Kristo sa yuta niadtong unang siglo nagpalanog sa taliabot nga kamatayon sa Yawa ug sa iyang mga demonyo. Sa dihang ang mga tinun-an ni Jesus nag-asoy kaniya kon giunsa nila pagpalayas ang mga demonyo, siya miingon kanila: “Nagsugod na ako pagkakita kang Satanas nga nahulog na ingon sa kilat gikan sa langit.” (Lucas 10:18) Kini nagpakitang nagmaya si Jesus sa iyang umaabot nga kadaogan batok sa magmamando niining kalibotana sa dihang mobalik na siya sa langit ingong Miguel nga arkanghel. (Pinadayag 12:7-9) Ang pagtuon pag-ayo sa mga tagna sa Bibliya nagbutyag nga kini nga kadaogan nahitabo sa langit niadtong 1914 o wala madugay human niana.a

Sukad nianang petsaha, nasayod ang Yawa nga hapit na siyang laglagon. Bisan pag ‘ang tibuok kalibotan nailalom sa iyang gahom,’ minilyon karon ang wala malimbongi sa iyang kataposang paningkamot sa paggahom kanila. Pinaagi sa Bibliya ilang nailhan siya ug nahibaloan ang iyang tinuod nga mga laraw. (2 Corinto 2:11) Sila nadasig sa giingon ni Pablo sa iyang isigka-Kristohanon: “Ang Diyos nga nagahatag ug kalinaw magadugmok kang Satanas ilalom sa inyong mga tiil sa dili-madugay.”b—Roma 16:20.

Sa dili madugay moabot ang kataposang gutlo sa Yawa! Ubos sa mahigugmaong pagmando ni Kristo, ang yuta himoong paraiso sa matarong nga katawhan. Ang kapintasan, pagdumot, ug kahakog mahanaw na sa dayon. “Ang unang mga butang dili na pagahinumdoman,” matod sa Bibliya. (Isaias 65:17) Pagkadakong kahupayan kini alang niadtong wala na mailalom sa nagtakobang magmamando niining kalibotana ug sa awtoridad niini!

[Mga footnote]

[Blurb sa panid 9]

Ubos sa mahigugmaong pagmando ni Kristo, ang yuta himoong paraiso sa matarong nga katawhan