2 Ang Diyos Wala Gayoy Pagtagad—Tinuod ba Kana?
Ang imo tingaling nadunggan: “Kon nagtagad pa ang Diyos sa katawhan, iya untang wagtangon ang pagkadaotan ug pag-antos. Ug bisan pag siya nahingawa sa mga tawo, siya wala magtagad kanako.”
Ang gitudlo sa Bibliya: Si Jehova nga Diyos dili mao ang tinubdan sa pagkadaotan. (Santiago 1:13) Bisag siya makawagtang niini sa bisan unsang panahon, iyang gitugotan nga molungtad ang hiwi nga katilingban aron masulbad ang hinungdanong mga isyu nga mitungha sa pagsugod sa kasaysayan sa tawo. Siya molihok alang sa kaayohan sa katawhan ug magwagtang sa tanang kadaot nga gipahinabo niadtong nagsalikway sa iyang pagmando.—Genesis 3:1-6; Isaias 65:17.a
Gawas sa iyang kahingawa sa katawhan, ang Diyos nahigugma gayod kanato ingong indibiduwal. Gipakita sa Mateo 10:29-31 nga siya nahibalo sa mga detalye bahin kanato nga wala gani nato mahibaloi: “Dili ba ang duha ka goryon ikabaligya man sa usa ka sensilyo nga gamay ug bili? Bisan pa niana, walay usa kanila ang mahulog sa yuta nga dili mahibaloan sa inyong Amahan. Apan ang mismong mga buhok sa inyong ulo naihap ang tanan. Busa ayaw kamo kahadlok: kamo labaw pag bili kay sa daghang goryon.”
Kon sa unsang paagi ang pagkahibalo sa kamatuoran makatabang nimo: Sagad atong likayan ang mga tawong bangis o walay pagtagad. Dili ikatingala nga tungod sa bakak nga ang Diyos walay pagtagad, ang mga tawo dili gustong moila kaniya o moduol lamang niya kon wala na silay kapaingnan. Ang pagkahibalo nga si Jehova may pagtagad gayod motukmod kanimo sa pagkat-on ug dugang bahin kaniya ug sa pagpakighigala kaniya.
Pananglitan, ikaw tingali nag-ampo sa Diyos apan nagduhaduha kon siya ba mamati o motubag kanimo. Ang Bibliya nagpasalig kanato nga ang “Tigpatalinghog sa pag-ampo” andam kanunay sa pagpamati niadtong kinasingkasing nga moduol kaniya.—Salmo 65:2.
Ang Diyos nag-awhag nga ‘itugyan kaniya ang tanan nimong kabalaka, kay siya may kahingawa kanimo.’ (1 Pedro 5:7) Kita makasalig nga siya motabang kanato bisan sa malisod nga panahon, kay ang iyang Pulong nag-ingon: “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.”—Salmo 34:18.
[Footnote]
a Alang sa dugang impormasyon kon nganong gitugotan sa Diyos ang pag-antos, tan-awa ang kapitulo 11 sa librong Unsay Tinuod nga Gitudlo sa Bibliya?
[Blurb sa panid 5]
Kon ang Diyos walay pagtagad, nganong nag-awhag man siya kanato sa pag-ampo kaniya?