Kon Kanus-a Angayng Magtukaw

MOUYON ka tingali nga hinungdanong magtukaw sa eskuylahan. Daghan ang magduka sa klase, apan aron makakat-on, kinahanglan kang magtukaw. Tingali moadto ka usab sa mga tigom diin ikaw magtuon ug Bibliya.

Unsay imong buhaton aron dili ka magduka?—a Ang usa ka paagi mao ang pagkatulog ug sayo. Tingali makatabang usab ang pagtagpilaw humag paniudto. Atong tan-awon kon unsay atong makat-onan sa nahitabo sa usa ka batan-on nga nakatulog usa niana ka gabii samtang nagpakigpulong si apostol Pablo. Basaha ang asoy sa Bibliya diha sa Buhat 20:7-12.

Giduaw ni Pablo ang kongregasyon duol sa dunggoanang siyudad sa Troas. Ang Bibliya nag-ingon nga si Pablo ‘mobiya na pagkasunod adlaw’ sakay sa barko. Busa ‘siya nagpakigpulong hangtod sa tungang-gabii.’ Atong mabasa: “Naglingkod diha sa bentana, usa ka batan-ong lalaki nga ginganlag Eutiko ang nahikatulog pag-ayo samtang si Pablo nagpadayon sa pagsulti.” Unsay sunod nga nahitabo?—

Si Eutiko nahulog sa bentana “gikan sa ikatulong andana.” Si Pablo ug ang uban pa nagdalig kanaog. Si Eutiko nagbuy-od sa yuta nga patay na! Imo bang mahanduraw kon unsa kadako ang ilang kaguol?— Ang Bibliya nag-ingon nga gigakos ni Pablo si Eutiko. Sa wala madugay si Pablo misinggit sa kalipay: ‘Ayaw mog kabalaka kay buhi ra siya!’ Gibanhaw sa Diyos si Eutiko!

Unsay atong makat-onan bahin sa Diyos niining nahitabo kang Eutiko?— Atong makat-onan nga si Jehova, ang atong langitnong Amahan, makabanhaw sa mga patay, lakip na ang mga bata. Siya nakasabot ug nahigugma kanimo nga labaw pa gani kay sa imong ginikanan. Sa dinhi pa si Jesus sa yuta, iyang gipakita kon sama sa unsa ang Amahan pinaagi sa pagkugos sa mga bata ug pagpanalangin kanila. Gibanhaw usab niya ang mga bata, lakip ang 12 anyos nga batang babaye.

Unsay imong gibati sa pagkahibalo nga nahigugma kanimo ang imong langitnong Amahan?— Oo, matukmod kita sa paghigugma usab kang Jehova ug sa pagsunod Kaniya. Sa unsang paagi nato ikapakita nga ato Siyang gihigugma?— Ang usa ka paagi mao ang pagsulti niana. Si Jesus miingon: “Gihigugma ko ang Amahan.” Apan labaw pa ang gihimo ni Jesus kay sa pag-ingong gihigugma niya ang Diyos. Gipakita niya kana sa iyang mga buhat.

Gisunod ni Jesus ang Diyos. “Ginabuhat ko kanunay ang mga butang nga makapahimuot kaniya,” si Jesus miingon. Kon buot sab natong pahimut-an si Jehova ug ang iyang Anak, si Jesus, maningkamot ta sa pagtukaw diha sa eskuylahan ug sa Kristohanong mga tigom.