Salig Kang Jehova, “ang Diyos sa Tanang Paghupay”
“Dalayegon ang Diyos ug Amahan sa atong Ginoong Jesu-Kristo, ang Amahan sa malumong mga kaluoy ug ang Diyos sa tanang paghupay.”—2 COR. 1:3.
1. Unsay gikinahanglan sa tanan?
SUKAD sa pagkahimugso, kita nagkinahanglag paghupay. Ang masuso mohilak dihang magkinahanglag paghupay. Tingali magpakugos o gigutom kini. Bisag magkaedaran na, nagkinahanglan gihapon kitag paghupay ilabina dihang kita makasinatig kalisdanan.
2. Unsay gipasalig ni Jehova niadtong mosalig kaniya?
2 Ang atong pamilya ug mga higala makahupay kanato, apan dili sa tanang panahon. Diyos lamang ang makahupay kanato bisag unsa pa ka lisod ang atong kahimtang. Ang iyang Pulong nagpasalig: “Si Jehova haduol kanilang tanan nga nagatawag kaniya, . . . ug ang ilang pagtuaw alang sa tabang iyang pagadunggon.” (Sal. 145:18, 19) Oo, “ang mga mata ni Jehova gipunting sa mga matarong, ug ang iyang mga igdulungog gikiling sa ilang pagtuaw alang sa tabang.” (Sal. 34:15) Apan kon buot natong hupayon sa Diyos, kinahanglan kitang mosalig kaniya. Si David miingon: “Si Jehova mahimong usa ka luwas nga hataas nga dapit alang sa dinaogdaog, usa ka luwas nga hataas nga dapit sa mga panahon sa kasakit. Ug kadtong nakaila sa imong ngalan mosalig kanimo, kay dili gayod nimo biyaan kadtong mangita kanimo, Oh Jehova.”—Sal. 9:9, 10.
3. Sa unsang paagi giilustrar ni Jesus ang gugma ni Jehova alang sa Iyang katawhan?
3 Bililhon kang Jehova ang iyang mga magsisimba. Gipasiugda kini ni Jesus dihang siya miingon: “Ang lima ka goryon ginabaligya sa duha ka sensilyong gamayg bili, dili ba? Bisan pa niana walay usa kanila nga mahikalimtan atubangan sa Diyos. Apan bisan ang mga buhok sa inyong mga ulo naihap ang tanan. Ayaw kahadlok; kamo labaw pa ug bili kay sa daghang goryon.” (Luc. 12:6, 7) Si Jehova miingon sa mga Israelinhon: “Gihigugma ko ikaw sa gugma nga hangtod sa panahong walay tino. Mao nga ako nagdani kanimo pinaagi sa mahigugmaong-kalulot.”—Jer. 31:3.
4. Nganong makasalig kita sa mga saad ni Jehova?
4 Ang pagsalig kang Jehova ug sa katumanan sa iyang mga saad makahupay kanato panahon sa kagul-anan. Busa angay kitang mosalig sa Diyos sama kang Josue, kinsa miingon: “Walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas. Kining tanan natuman alang kaninyo. Walay usa ka pulong kanila nga napakyas.” (Jos. 23:14) Makaseguro usab kita nga bisag nag-antos kita tungod sa mga kalisdanan karon, “ang Diyos kasaligan” ug dili gayod niya biyaan ang iyang maunongong mga alagad.—Basaha ang 1 Corinto 10:13.
5. Nganong kita makahupay usab sa uban?
5 Si apostol Pablo nagtawag kang Jehova ingong “Diyos sa tanang paghupay.” Kini nagpasabot nga si Jehova maghupay niadtong nagmagul-anon o anaa sa kasakitan. (Basaha ang 2 Corinto 1:3, 4.) Walay makapugong sa atong langitnong Amahan sa paghupay niadtong nahigugma kaniya. Kay kita gihupay man sa Diyos, kita makahupay usab sa mga isigkamagtutuo nga “anaa sa bisan unsang matang sa kasakitan.” Dili gayod hitupngan ang katakos ni Jehova sa paghupay kanato!
Pagsagubang sa mga Hinungdan sa Kaguol
6. Unsay pipila ka hinungdan sa kaguol?
6 Dunay daghang kahimtang nga kita nagkinahanglag paghupay. Usa ka dakong hinungdan sa kaguol mao ang kamatayon sa usa ka minahal, ilabina sa kapikas o anak. Ang uban nagkinahanglag paghupay kay nakasinatig diskriminasyon. Dugang pa, tungod sa sakit, pagkatigulang, kakabos, mga problema sa kaminyoon, o sa daotang kahimtang sa kalibotan, ang usa magkinahanglag paghupay.
7. (a) Panahon sa kalisdanan, nganong nagkinahanglan kitag paghupay? (b) Unsay mahimo ni Jehova sa pag-ayo sa ‘nagun-ob ug nadugmok’ nga kasingkasing?
7 Panahon sa kalisdanan, kita nagkinahanglag paghupay kay ang atong kasingkasing, hunahuna, emosyon, panglawas, ug espirituwalidad mahimong maapektohan. Pananglitan, tagda ang kasingkasing. Ang Pulong sa Diyos nag-ingon nga ang atong kasingkasing mahimong ‘magun-ob ug madugmok.’ (Sal. 51:17) Si Jehova makatabang kanato sa maong kahimtang, kay “siya nagaayo sa mga may gun-ob nga kasingkasing, ug nagabugkos sa ilang masakit nga mga bahin.” (Sal. 147:3) Bisan sa grabeng kahimtang, ang Diyos makahupay sa atong magul-anong kasingkasing kon kita moampo niya uban ang bug-os nga pagtuo ug mosunod sa iyang mga sugo.—Basaha ang 1 Juan 3:19-22; 5:14, 15.
8. Sa unsang paagi si Jehova makatabang kon kita nabalaka pag-ayo?
8 Ang atong hunahuna sagad nagkinahanglag paghupay tungod sa lainlaing pagsulay nga makapabalaka pag-ayo. Kon sa ato lang kaugalingon, lagmit dili kita makasagubang niini. Apan ang salmista miawit: “Sa dihang ang makapatugaw nga mga hunahuna midaghan sa akong kahiladman, ang imong mga paghupay mihapohap sa akong kalag.” (Sal. 94:19) Si Pablo usab misulat: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filip. 4:6, 7) Ang pagbasa ug pagpamalandong sa Bibliya makatabang gayod sa pagsagubang sa grabeng kabalaka.—2 Tim. 3:15-17.
9. Unsaon nato pagsagubang ang negatibong emosyon?
9 Usahay maluya kita pag-ayo nga tungod niini basin madaog kita sa negatibong emosyon. Tingali atong bation nga dili nato maatiman ang usa ka Kasulatanhong responsabilidad o pribilehiyo sa pag-alagad. Sa maong kahimtang, si Jehova makahupay ug makatabang usab kanato. Sa pag-ilustrar: Dihang gisugo si Josue nga manguna sa mga Israelinhon batok sa gamhanang kaaway nga mga nasod, si Moises miingon sa katawhan: ‘Magmaisogon ug magmakusganon kamo. Dili kamo mahadlok ni mangurog sa ilang atubangan, kay si Jehova nga inyong Diyos mao ang magauban kaninyo. Dili niya kamo talikdan ni biyaan sa bug-os.’ (Deut. 31:6) Sa tabang ni Jehova, napangunahan ni Josue ang katawhan sa Diyos ngadto sa Yutang Saad ug ilang napildi ang tanan nilang kaaway. Una pa niana, si Moises gitabangan usab sa Diyos didto sa Pulang Dagat.—Ex. 14:13, 14, 29-31.
10. Kon ang atong panglawas maapektohan sa lisod nga mga kahimtang, unsay makatabang kanato?
10 Ang lisod nga mga kahimtang makaapektar sa atong panglawas. Siyempre, makatabang kanato ang sustansiyadong pagkaon, igong pahulay, ehersisyo, ug kahinlo. Makaayo usab sa panglawas ang paghunahuna sa mga saad sa Bibliya bahin sa umaabot. Busa kon makaatubang kitag mga problema, atong hinumdoman ang kasinatian ni Pablo ug ang iyang makapadasig nga mga pulong: “Kami ginapiit sa tanang paagi, apan dili napiotan nga dili na makalihok; kami nangalibog, apan dili bug-os nga walay kalingkawasan; kami ginalutos, apan wala biyai sa bug-os; kami nangatumba, apan wala malaglag.”—2 Cor. 4:8, 9.
11. Unsay atong himoon kon maluya ang atong espirituwalidad?
11 Ang ubang pagsulay makadaot sa atong espirituwalidad. Niining bahina, si Jehova makatabang gihapon kanato. Ang iyang Pulong nagpasalig: “Si Jehova nagasapnay sa tanan nga napukan, ug nagabangon sa tanan nga naumod.” (Sal. 145:14) Kon maluya ang atong espirituwalidad, angay kitang mangayog tabang sa mga ansiyano. (Sant. 5:14, 15) Ug ang kanunayng paghunahuna sa paglaom nga kinabuhing walay kataposan makapalig-on kanato panahon sa mga pagsulay.—Juan 17:3.
Mga Pananglitan sa Paghupay Gikan sa Diyos
12. Giunsa paghupay ni Jehova si Abraham?
12 Ang usa ka salmista miingon kang Jehova: “Hinumdomi ang pulong ngadto sa imong alagad, nga alang niini imo akong gipahulat. Kini maoy nakahupay kanako sa akong kasakitan, kay ang imong pulong nagtipig kanako nga buhi.” (Sal. 119:49, 50) Karon, atong nabatonan ang sinulat nga Pulong ni Jehova, nga naundag daghang pananglitan sa paghupay gikan sa Diyos. Pananglitan, si Abraham nabalaka pag-ayo sa dihang iyang nahibaloan nga laglagon ni Jehova ang Sodoma ug Gomora. Siya nangutana sa Diyos: “Paphaon mo ba gayod ang mga matarong uban sa mga daotan?” Gihupay ni Jehova si Abraham pinaagi sa pagpasalig kaniya nga dili Niya laglagon ang Sodoma kon dunay 50 ka tawong matarong didto. Apan, lima pa ka higayon nga si Abraham nangutana kang Jehova: Unya kon 45 lang ka tawong matarong ang tua didto? 40? 30? 20? 10? Sa matag higayon, si Jehova mapailobon ug maluloton kaayong nagpasalig kang Abraham nga dili Niya laglagon ang Sodoma. Bisag wala pay napulo ka tawong matarong didto, giluwas ni Jehova si Lot ug ang iyang mga anak nga babaye.—Gen. 18:22-32; 19:15, 16, 26.
13. Sa unsang paagi gipakita ni Ana nga siya misalig kang Jehova?
13 Ang asawa ni Elkana nga si Ana gusto kaayong makabatog anak. Apan siya baog, ug kini nakapaguol kaniya. Siya miampo kang Jehova bahin niini, ug ang hataas nga saserdoteng si Eli miingon kaniya: “Hinaot ang Diyos sa Israel maghatag kanimo sa imong gipangaliya.” Kini nakahupay kang Ana, “ug ang iyang nawong wala na magmabalak-on.” (1 Sam. 1:8, 17, 18) Si Ana bug-os nga misalig kang Jehova. Bisag wala siya mahibalo kon unsay mahitabo, nagmalinawon na ang iyang hunahuna. Sa ngadtongadto, gitubag ni Jehova ang iyang pag-ampo. Siya namabdos ug nanganak kang Samuel.—1 Sam. 1:20.
14. Nganong nagkinahanglag paghupay si David? Kang kinsa siya midangop?
14 Ang laing pananglitan nga gihupay sa Diyos mao si Haring David. Si Jehova “nagatan-aw sa kasingkasing.” Busa sa dihang gipili niya si David nga mahimong hari sa Israel, siya nahibalo nga si David sinsero ug nahigugma sa matuod nga pagsimba. (1 Sam. 16:7; 2 Sam. 5:10) Apan sa ulahi, si David nakapanapaw uban kang Bat-seba ug misulay sa pagtago sa iyang sala. Sa naamgohan niya ang gibug-aton sa iyang sala, siya miampo kang Jehova: “Sumala sa kadagaya sa imong mga kaluoy palaa ang akong mga kalapasan. Hugasi ako sa bug-os gikan sa akong kasaypanan, ug hinloi ako gikan mismo sa akong sala. Kay nahibalo ako sa akong mga kalapasan, ug ang akong sala anaa kanunay sa akong atubangan.” (Sal. 51:1-3) Gihinulsolan gayod ni David ang iyang sala ug gipasaylo siya ni Jehova. Apan kinahanglang antoson niya ang mga resulta niini. (2 Sam. 12:9-12) Bisan pa niana, si David nahupayan tungod sa kaluoy ni Jehova.
15. Unsang tabang ang gihatag ni Jehova kang Jesus sa hapit na siyang patyon?
15 Sa dinhi pa sa yuta, si Jesus nakasinatig daghang pagsulay. Gitugotan kini sa Diyos, ug si Jesus nagmaunongon ingong hingpit nga tawo kinsa misalig kanunay kang Jehova ug nagtuboy sa Iyang pagkasoberano. Sa hapit nang budhian ug patyon, si Jesus miampo kang Jehova: “Matuman unta dili ang akong kabubut-on, kondili ang imoha.” Dayon dihay manulonda nga nagpakita kang Jesus ug nagpalig-on kaniya. (Luc. 22:42, 43) Gihatag sa Diyos kang Jesus ang paghupay, pagpalig-on, ug pagpaluyo nga iyang gikinahanglan.
16. Sa unsang paagi si Jehova motabang kon mameligro ang atong kinabuhi tungod sa atong pagtuo?
16 Bisag mameligro ang atong kinabuhi tungod sa atong pagtuo, si Jehova motabang gayod kanato sa pagpabiling matinumanon. Kita mahupayan usab sa paglaom nga pagkabanhaw. Ug nangandoy gayod kita sa dihang ang kataposang kaaway, ang kamatayon, “pagawagtangon”! (1 Cor. 15:26) Ang maunongong mga alagad sa Diyos nga namatay na, ug ang uban, dili gayod kalimtan ni Jehova ug sila pagabanhawon. (Juan 5:28, 29; Buh. 24:15) Ang atong pagtuo sa pagkabanhaw maghupay ug magpalig-on kanato sa dihang kita lutoson.
17. Sa unsang paagi kita hupayon ni Jehova sa dihang mamatay ang atong minahal?
17 Makapahupay gayod ang pagkahibalo nga ang atong mga minahal nga anaa sa lubnganan pagabanhawon diha sa bag-ong kalibotan nga wala nay pag-antos. Ug pagkadakong pribilehiyo sa “dakong panon” sa mga alagad ni Jehova nga makalingkawas sa kataposan niining daotang kalibotan sa pag-abiabi ug pagtudlo sa mga binanhaw!—Pin. 7:9, 10.
Ang Diyos Andam Kanunay sa Pagtabang ug Paghupay
18, 19. Sa unsang paagi gihupay sa Diyos ang iyang mga alagad sa dihang gilutos?
18 Diha sa makapalig-on ug makapahupay nga awit, si Moises nagpasalig sa mga Israelinhon: “Usa ka tagoanang dapit ang Diyos sa karaang panahon, ug sa ilalom mao ang mga bukton nga mohangtod sa panahong walay tino.” (Deut. 33:27) Sa ulahi, si propeta Samuel miingon sa mga Israelinhon: ‘Ayaw kamo pagtipas gikan sa pagsunod kang Jehova, ug mag-alagad kamo kang Jehova uban sa bug-os ninyong kasingkasing. Si Jehova dili motalikod sa iyang katawhan tungod sa iyang dakong ngalan.’ (1 Sam. 12:20-22) Kon magmaunongon kita sa pag-alagad kang Jehova, siya dili gayod mobiya kanato. Siya andam kanunay sa pagtabang kanato.
19 Ang Diyos dili gayod mapakyas sa pagtabang ug paghupay sa iyang katawhan niining kataposang mga adlaw. Sa modernong panahon, libolibo sa atong mga isigkamagtutuo ang gilutos ug gibilanggo tungod sa pag-alagad kang Jehova. Ang ilang kasinatian nagpamatuod nga si Jehova naghupay gayod sa iyang mga alagad panahon sa pagsulay. Pananglitan, usa sa atong mga igsoon sa kanhing Soviet Union gisentensiyahan nga mabilanggo ug 23 ka tuig tungod sa iyang pagtuo. Bisan pa niana, siya nakadawat gihapog literatura sa Bibliya nga nakalig-on ug nakahupay kaniya. Siya miingon: “Sulod sa maong mga katuigan, ako nakakat-on sa pagsalig kang Jehova ug iya kong gipalig-on.”—Basaha ang 1 Pedro 5:6, 7.
20. Nganong makaseguro kita nga si Jehova dili mobiya kanato?
20 Bisag unsa pay atong maagoman, maayong hinumdoman ang makapahupayng mga pulong sa salmista: “Si Jehova dili motalikod sa iyang katawhan.” (Sal. 94:14) Bisan tuod ang matag usa kanato nagkinahanglag paghupay, kita usab dunay pribilehiyo sa paghupay sa uban. Sa sunod artikulo, atong tun-an kon sa unsang paagi kita makahupay niadtong nagmagul-anon niining daotang kalibotan.
Unsay Imong Tubag?
• Unsa ang pipila ka butang nga makapaguol kanato?
• Sa unsang paagi si Jehova naghupay sa iyang mga alagad?
• Kon mameligro ang atong kinabuhi, unsay makahupay kanato?
[Kahon/Mga hulagway sa panid 25]
KON UNSAON PAGSAGUBANG SA MGA BUTANG NGA MAKAAPEKTAR SA ATONG . . .
▪ kasingkasing Sal. 147:3; 1 Juan 3:19-22; 5:14, 15
▪ hunahuna Sal. 94:19; Filip. 4:6, 7
▪ emosyon Ex. 14:13, 14; Deut. 31:6
▪ panglawas 2 Cor. 4:8, 9
▪ espirituwalidad Sal. 145:14; Sant. 5:14, 15