Nganong ang Tigpatalinghog sa Pag-ampo Nagtugot sa Pag-antos?

BISAG moampo tingali sila, ang pipila nagduhaduha nga naglungtad ang Diyos. Ngano man? Tingali tungod kana kay nakita nila nga daghan ang nag-antos niining kalibotana. Nakapangutana ka na ba kon nganong gitugotan sa Diyos ang pag-antos?

Gilalang ba gayod sa Diyos ang tawo nga ingon niini ang kahimtang—dili hingpit ug nag-antos? Dili ta makatahod sa usa ka diyos kansang katuyoan mao ang pagpaantos sa tawo. Apan tagda kini: Kon ginindotan ka sa usa ka awto apan nakita nimo nga duna kiniy lumping, isipon ba nimong gituyo kana sa nagbuhat niana? Siyempre dili! Mohinapos ka nga ang tigbuhat naggama niana nga way tatsa ug nga dunay laing nakalumping niana.

Sa susama, kon nakadayeg ta sa kahibulongang kahapsay ug disenyo sa kinaiyahan ug unya atong makita ang kagubot ug korapsiyon nga nag-apektar sa mga tawo, unsay atong ikahinapos? Ang Bibliya nagtudlo nga ang Diyos naghimo sa unang magtiayon nga hingpit apan sa ulahi sila mismo ang nagpahinabog kadaot sa ilang kaugalingon. (Deuteronomio 32:4, 5) Ang maayong balita mao nga ang Diyos nagsaad nga wagtangon ang kadaot—ipasig-uli sa kahingpitan ang masinugtanong katawhan. Apan nganong dugay man kaayo siyang milihok?

Nganong Dugay Man Kaayo?

Ang rason nalangkit sa isyu nga kinsay momando sa katawhan. Dili gayod katuyoan ni Jehova nga ang mga tawo magmando sa ilang kaugalingon. Siya ang angay nga mahimo nilang Magmamando. Ang Bibliya mismo nag-ingon: “Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Ikasubo, ang unang mga tawo mipili sa pagrebelde sa pagmando sa Diyos. Tungod niana, sila nahimong makasasala. (1 Juan 3:4) Ingong resulta, sila nahimong dili hingpit ug nakapahinabog kadaot sa ilang kaugalingon ug sa ilang mga kaliwat.

Sa libolibo ka katuigan, gitugotan ni Jehova ang mga tawo nga magmando sa ilang kaugalingon, ug gipakita sa kasaysayan nga sila way katakos sa pagbuhat niana. Kini nagpakita nga ang tanang kagamhanan sa tawo nagpahinabog pag-antos. Wala gayoy usa nga nakawagtang sa gubat, krimen, inhustisya, o sakit.

Unsaon sa Diyos Pagwagtang ang Kadaot?

Ang Bibliya nagsaad nga sa dili madugay ang Diyos magpatunghag matarong nga bag-ong kalibotan. (2 Pedro 3:13) Kadto lamang kinabubut-ong magpakitag gugma sa usag usa ug sa Diyos ang makapuyo niana.—Deuteronomio 30:15, 16, 19, 20.

Ang Bibliya nag-ingon usab nga sa “adlaw sa paghukom” nga haduol na, wagtangon sa Diyos ang pag-antos ug kadtong nagpahinabo niana. (2 Pedro 3:7) Dayon, ang tinudlo sa Diyos nga Magmamando, si Jesu-Kristo, magmando sa masinugtanong katawhan. (Daniel 7:13, 14) Unsay mapalampos sa pagmando ni Jesus? Ang Bibliya nag-ingon: “Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”—Salmo 37:11.

Ingong langitnong Hari, wagtangon ni Jesus ang kadaot—lakip na ang sakit, pagkatigulang, ug kamatayon—nga miresulta sa dihang ang tawo mirebelde kang Jehova, “ang tuboran sa kinabuhi.” (Salmo 36:9) Ayohon ni Jesus ang tanan nga magpasakop sa iyang mahigugmaong pagmando. Ilalom niana, matuman kini nga mga saad sa Bibliya:

◼ “Walay pumoluyo nga moingon: ‘Ako masakiton.’ Ang katawhan nga magpuyo sa yuta mao kadtong mga gipasaylo sa ilang kasaypanan.”—Isaias 33:24.

◼ “Pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”—Pinadayag 21:4.

Dili ba makapahupay ang pagkahibalo nga sa dili madugay tumanon sa Diyos ang iyang saad nga taposon ang tanang pag-antos? Sa kasamtangan, dili kita angayng mawad-ag pagsalig nga siya magpatalinghog sa atong mga pag-ampo tungod lang kay iyang gitugotan ang pag-antos.

Ang Diyos anaa kanunay. Siya makadungog nimo, bisan sa imong mga kasakit ug kaguol. Ug siya gusto gayong makakita nimo nga makatagamtam sa panahon diin ang tanan nimong pagduhaduha ug kasakit mahanaw na.