Ang Diyos ba Magpatunghag Usa ka Gobyerno nga Magmando sa Tibuok Yuta?

1. Nganong gikinahanglan ang usa ka gobyerno nga magmando sa tibuok yuta?

Ang mga problema sa katawhan karon sagad kaylap sa tibuok yuta. Sa pipila ka nasod, kadaghanan sa mga tawo maoy kabos ug dinaogdaog. Apan sa uban, daghan ang nakabatog labaw sa ilang gikinahanglan. Usa ka tibuok-globong administrasyon lang ang patas nga makaapod-apod sa mga kahinguhaan sa yuta.—Basaha ang Ecclesiastes 4:1; 8:9.

2. Kinsay angayng piyalan sa gobyerno nga magmando sa tibuok yuta?

Dili dalawaton sa kadaghanan ang ideya nga usa lay magmando sa tibuok yuta, kay walay lalaki o babaye nga takos niana. Walay tawong makaangkon sa pag-uyon sa tanan. Gawas pa, ang tawo may tendensiya nga mahimong korap sa dihang makabatog gahom. Makahahadlok hunahunaon nga may usa ka diktador nga magmando sa tanang tawo.—Basaha ang Proverbio 29:2; Jeremias 10:23.

Gipili ni Jehova nga Diyos ang iyang Anak, si Jesus, aron magmando sa katawhan sa walay kataposan. (Lucas 1:32, 33) Si Jesus nakasulay sa pagkinabuhi dinhi sa yuta. Samtang ania dinhi, siya nag-ayo sa mga masakiton, nagtudlo sa mga maaghop, ug naggahig panahon sa mga bata. (Marcos 1:40-42; 6:34; 10:13-16) Busa si Jesus mao ang takos nga mahimong Magmamando.—Basaha ang Juan 1:14.

3. Posible ba nga usa lang ka gobyerno ang magmando sa tibuok yuta?

Gitudlo sa Diyos ang iyang Anak nga magmando sa yuta gikan sa langit. (Daniel 7:13, 14) Sama nga ang usa ka tawhanong magmamando dili kinahanglang presente sa matag siyudad nga iyang gisakopan, si Jesus dili kinahanglang presente sa yuta aron magmando sa mga tawo.—Basaha ang Mateo 8:5-9, 13.

Ang tanan ba modawat kang Jesus ingong Magmamando? Dili. Ang mga tawo lamang nga nahigugma sa kon unsay maayo ang modawat kaniya. Laglagon ni Jehova ang mosalikway sa iyang gitudlo nga mahigugmaon ug matarong nga Magmamando.—Basaha ang Mateo 25:31-33, 46.

4. Unsay buhaton sa Magmamando sa kalibotan?

Maingong ang usa ka magbalantay magtigom sa iyang mga karnero, si Jesus nagtigom na sa mga maaghop gikan sa tanang kanasoran ug nagtudlo kanila sa mahigugmaong mga paagi sa Diyos. (Juan 10:16; 13:34) Sila nahimong masibotong tigpaluyo ni Jesus ug sa iyang pagkahari. (Salmo 72:8; Mateo 4:19, 20) Sa tibuok kalibotan, ang maunongong ginsakpan ni Jesus hiniusang nagmantala nga si Jesus naghari na.—Basaha ang Mateo 24:14.

Sa dili madugay gamiton ni Jesus ang iyang gahom sa pagwagtang sa daotang gobyerno. Nagpili siyag pipila sa iyang maunongong mga sumusunod aron magmando sa yuta ingong mga hari uban kaniya sa langit. (Daniel 2:44; 7:27) Pun-on sa Gingharian ni Jesus ang yuta ug kahibalo bahin kang Jehova ug ipasig-uli ang paraiso nga nawala sa sinugdan sa kasaysayan sa tawo.—Basaha ang Isaias 11:3, 9; Mateo 19:28.