TUBAG SA MGA PANGUTANA BAHIN SA BIBLIYA

Mapasaylo ba ang atong mga sala?

Sumala sa Bibliya, ang tanang tawo makasala. Atong napanunod ang kiling sa pagpakasala gikan sa unang tawo, si Adan. Busa, kita mobuhat usahay ug daotang mga butang nga tingali basolan ra nato. Ang Anak sa Diyos, si Jesu-Kristo, nagbayad sa atong mga sala pinaagi sa paghalad sa iyang kinabuhi. Tungod sa iyang halad lukat, posible na tang mapasaylo. Kana maoy gasa gikan sa Diyos.​—Basaha ang Roma 3:23, 24.

Ang pipila nakahimog grabeng sala ug naghunahuna kon mapasaylo pa ba sila sa Diyos. Makapalipay, ang Pulong sa Diyos nag-ingon: “Ang dugo ni Jesus nga iyang Anak nagahinlo kanato gikan sa tanang sala.” (1 Juan 1:7) Si Jehova andam mopasaylo bisan sa grabeng mga sala kon kita dunay husto ug mahinulsolong tinamdan.​—Basaha ang Isaias 1:18.

Unsay atong buhaton aron mapasaylo?

Kon buot natong pasayloon ni Jehova, kinahanglan tang makakat-on bahin niya​—makasabot sa iyang mga dalan, tambag, ug kinahanglanon. (Juan 17:3) Si Jehova madagayaong nagapasaylo niadtong naghinulsol sa ilang sala ug naningkamot sa pagbag-o.​—Basaha ang Buhat 3:19.

Dili hilabihan ka lisod ang pagbaton sa pag-uyon sa Diyos. Si Jehova nakasabot sa atong mga kahuyangan. Siya maluluy-on ug maluloton. Dili ba nga ang iyang mahigugmaong kalulot angayng magtukmod nato sa pagkat-og dugang kon sa unsang paagi nato siya pahimut-an?​—Basaha ang Salmo 103:13, 14.