TUBAG SA MGA PANGUTANA BAHIN SA BIBLIYA
Kinsa ang moadto sa langit, ug ngano?
Minilyon ang nangandoy nga mopuyo sa langit. Si Jesus miingon nga ang iyang matinumanong mga apostoles mopuyo didto. Sa wala pa siya mamatay, siya nagsaad nga mag-andam siyag dapit alang kanila uban sa iyang langitnong Amahan.—Basaha ang Juan 14:2.
Nganong may mga tawong banhawon aron mopuyo sa langit? Unsay ilang himoon didto? Giingnan ni Jesus ang iyang mga apostoles nga sila mahimong mga hari. Sila magmando sa tibuok yuta.—Basaha ang Lucas 22:28-30; Pinadayag 5:10.
Ang tanan bang maayong tawo moadto sa langit?
Sa daghang nasod, pipila lang ang magmamando. Sanglit si Jesus magbanhawg mga tawo nga makabatog langitnong kinabuhi aron magmando sa yuta, madahom nato nga diyutay ra ang napili. (Lucas 12:32) Ang Bibliya naghisgot sa eksaktong gidaghanon sa mga magmando unya kauban ni Jesus.—Basaha ang Pinadayag 14:1.
Si Jesus nag-andam ug dapit sa langit alang sa pipila niya ka sumusunod. Nahibalo ka ba kon unsay ilang himoon didto?
Duna pay laing makadawat ug ganti gawas niadtong moadto sa langit. Ang matinumanong mga sakop sa Gingharian ni Jesus makatagamtam ug kinabuhing walay kataposan sa napasig-uling paraiso sa yuta. (Juan 3:16) Ang makapuyo sa Paraiso mao kadtong makalabang-buhi sa kalaglagan niining daotang sistema sa mga butang ug kadtong pagabanhawon.—Basaha ang Salmo 37:29; Juan 5:28, 29.