TUBAG SA MGA PANGUTANA BAHIN SA BIBLIYA
Duna bay katuyoan ang paglungtad sa atong planeta?
Ang yuta gilalang aron ang katawhan malipayong magpuyo niana
Ang atong planeta haom gayod puy-an. Kini abundag tubig nga hinungdanon sa kinabuhi. Eksakto kaayo ang pagkahirig, gikusgon sa pagtuyok, ug orbito sa yuta mao nga ang kadagatan dili magyelo o magbukal. Ang atmospera ug magnetic field sa yuta nanalipod niini gikan sa makamatayng radyasyon. Kahibulongan sab kaayo ang kinabuhi sa tanom ug mananap nga nagdepende sa usag usa. Busa daghang tawo ang nakaingon nga duna gyoy katuyoan ang pagkadisenyo sa atong planeta.—Basaha ang Isaias 45:18.
Apan tingali makapangutana ka, ‘Ang pag-antos ug inhustisya ba apil sa maong katuyoan?’—Basaha ang Deuteronomio 32:4, 5.
Matuman ba ang katuyoan sa yuta?
Ang yuta gidisenyo aron malipayong magpuyo ang mga tawo nga may pagtahod sa usag-usa ug nahigugma sa ilang Maglalalang. Busa ang kinabuhi sa tawo mas labawg katuyoan kay sa tanom o hayop. Kita makaila sa atong Maglalalang. Kita sab makadayeg ug makasundog sa iyang gugma ug hustisya.—Basaha ang Ecclesiastes 12:13; Miqueas 6:8.
Ang atong Maglalalang makatuman sa tanan niyang katuyoan. Busa makaseguro ta nga iyang wagtangon ang pag-antos ug inhustisya ug himoong nindot kaayong puy-anan ang atong planeta diin malipayong magpuyo ang katawhan.—Basaha ang Salmo 37:11, 29; Isaias 55:11.