TUBAG SA MGA PANGUTANA BAHIN SA BIBLIYA
Nganong iampo nato nga moabot ang Gingharian sa Diyos?
Gusto ka bang mahibalog dugang bahin sa Gingharian sa Diyos ug kon unsay himoon niini?
Ang Gingharian sa Diyos maoy usa ka gobyerno sa langit. Gisugo ni Jesus ang iyang mga sumusunod nga iampo ang pag-abot niini kay kini ang magbalik sa pagkamatarong ug kalinaw sa yuta. Dili sama sa gobyerno sa tawo, ang Gingharian sa Diyos makawagtang sa kapintasan, inhustisya, ug sakit. Gipili ni Jehova nga Diyos ang iyang anak, si Jesus, aron mahimong Hari sa Gingharian. Gikan sa mga sumusunod ni Jesus, nagpili sab ang Diyos ug makauban ni Jesus sa pagmando sa Gingharian.—Basaha ang Lucas 11:2; 22:28-30.
Hapit nang laglagon sa Gingharian sa Diyos ang tanang nagasupak sa pagmando sa Diyos. Busa ang pag-ampo nga moabot ang Gingharian sa Diyos maoy hangyo nga pulihan na sa gobyerno sa Diyos ang tanang tawhanong gobyerno.—Basaha ang Daniel 7:13, 14; Pinadayag 11:15, 18.
Nganong makaayo sa mga tawo ang Gingharian sa Diyos?
Kay maluluy-on ang Hari niini, si Jesus. Ingong Anak sa Diyos, duna sab siyay gahom sa pagtabang sa tanang nag-ampo sa Diyos alang sa tabang.—Basaha ang Salmo 72:8, 12-14.
Tabangan sa Gingharian sa Diyos kadtong sinserong nag-ampo sa pag-abot niini ug nagkinabuhi uyon sa kabubut-on sa Diyos. Dili gyod ka magmahay kon imong tun-an ang giingon sa Bibliya bahin sa Gingharian sa Diyos.—Basaha ang Lucas 18:16, 17; Juan 4:23.