PANGUNANG TOPIKO | KINSA ANG MGA SAKSI NI JEHOVA?
Nganong Mosangyaw Mi?
Tingali nailhan kaayo mi tungod sa among kuging pagsangyaw sa balay ug balay, sa publiko, ug bisan asa nga dunay tawo. Nganong gihimo ni namo?
Ang mga Saksi ni Jehova mosangyaw aron madayeg ang Diyos ug mailhan ang iyang ngalan. (Hebreohanon 13:15) Gusto sab namong sundon si Kristo Jesus, kinsa nagsugo: “Panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila sa pagtuman sa tanang butang nga akong gisugo kaninyo.”—Mateo 28:19, 20.
Dugang pa, gihigugma namo ang among silingan. (Mateo 22:39) Siyempre, nasayod mi nga kadaghanang tawo dunay relihiyon ug nga dili tanan interesado sa among mensahe. Pero, nagtuo mi nga ang mga pagtulon-an sa Bibliya makaluwas ug kinabuhi. Tungod niana kami dili “mohunong sa pagpanudlo ug sa pagpahayag sa maayong balita bahin kang Kristo,” sama sa unang mga Kristohanon.—Buhat 5:41, 42.
Ang sociologist nga si Antonio Cova Maduro misulat bahin sa “paningkamot ug kalisod nga nasinatian sa mga Saksi ni Jehova, hangtod nga sila nagsakripisyo gyod . . . , aron ang sagradong mensahe makaabot sa kinalay-ang bahin sa yuta.”—El Universal nga mantalaan, Venezuela
Kadaghanang magbabasa sa among basahon dili mga Saksi ni Jehova. Ug lainlaig relihiyon ang minilyon sa nagtuon ug Bibliya uban namo. Apan mapasalamaton silang bisitahon sa mga Saksi ni Jehova.
Tingali, naa kay uban pang pangutana bahin sa mga Saksi ni Jehova. Giawhag ka namo nga sayron ang tubag pinaagi sa
Pagpangutana sa usa sa mga Saksi ni Jehova.
Pagbisita sa among website, ang www.jw.org.
Pagtambong sa among mga tigom, nga walay bayad ug para sa tanan.