PANGUNANG TOPIKO | MAY KAAYOHAN BA ANG PAG-AMPO?
Nganong Mag-ampo man ang mga Tawo?
“Sugarol kaayo ko. Miampo ko nga makadaog untag dakong kantidad. Wa gyod nâ mahitabo.”—Samuel,a Kenya.
“Sa eskuylahan, balikbalikon lang namo ang sinag-ulong mga pag-ampo nga gitudlo kanamo.”—Teresa, Pilipinas.
“Moampo ko kon may problema. Moampo sab ko aron pasayloon kos akong mga sala ug aron mahimong maayong Kristohanon.”—Magdalene, Ghana.
Gipakita sa gipangsulti nila Samuel, Teresa, ug Magdalene nga lainlain ang rason kon nganong mag-ampo ang mga tawo. Ang ubang rason mas dungganon kon itandi sa uban. May pag-ampo nga sinsero ug duna poy taphaw lang. Bisan pa niana, minilyon ang mibati nga kinahanglan gyong moampo, himoon man kana aron mopasar sa eksaminasyon sa eskuylahan, modaog ang ilang paboritong team sa dula, giyahan sa Diyos ang ilang pamilya, o sa lain pang rason. Gani, gipakita sa mga surbi nga bisan kadtong walay relihiyon regular nga mag-ampo.
Mag-ampo ka ba? Kon mao, unsay imong giampo? Kanunay man kang mag-ampo o dili, lagmit makapangutana ka: ‘May kaayohan ba gyod ang pag-ampo? May mamati ba niini?’ Usa ka magsusulat miingon nga ang pag-ampo usa lang ka “paagi aron maulian sa gibati . . . samag pagpakig-estorya sa imong binuhing isda.” Ingon ana sab ang panglantaw sa ubang eksperto sa medisina. Gitawag nila ang pag-ampo nga “alternatibong paagi sa pagtambal.” Ang uban ba nag-ampo kay mao niy ilang naandan, o moampo aron maulian sa ilang gibati?
Sa kasukwahi, gipakita sa Bibliya nga ang pag-ampo dili lang makapaalibyo sa gibati. Gisultihan ta niini nga duna gyoy mamati sa mga pag-ampo kon kini himoon sa hustong paagi ug kon mangayo tag mga butang nga dalawaton. Tinuod ba kini? Tan-awon nato ang ebidensiya.
a Ang ubang ngalan giilisan.