PANGUNANG TOPIKO | PUWEDE NIMONG MASABTAN ANG BIBLIYA
Nganong Importanteng Masabtan ang Bibliya?
“Ilado kaayo nga basahon sa relihiyon ang Bibliya. Pero basahon ni sa mga langyaw ug dili mapuslanon sa mga Chinese.”—LIN, CHINA.
“Dili man gani nako masabtan ang balaang mga basahon sa akong relihiyon nga Hindu, unsa pa kaha ang Balaang Bibliya?”—AMIT, INDIA.
“Gitahod nako ang Bibliya ingong karaang basahon ug nadunggan nako nga himalitan kaayo ni. Pero wala gyod ko sukad makakitag Bibliya.”—YUMIKO, JAPAN.
Gipabilhan pag-ayo sa daghang tawo sa tibuok kalibotan ang Bibliya. Apan tingali gamay ra silag nahibaloan, kon duna man, bahin sa mga nasulat sa Bibliya. Tinuod kaayo kana sa minilyong taga-Asia, mao man sab sa daghang nasod diin kaylap ang Bibliya.
Pero, tingali mangutana ka, ‘Nganong kinahanglan man gyod nakong masabtan ang Bibliya?’ Kon masabtan nimo ang mensahe niining balaang basahon, matabangan ka nga:
Mahimong kontento ug malipayon
Masagubang ang mga problema sa pamilya
Mabuntog ang mga kabalaka
Makabaton ug maayong relasyon sa uban
Magamit sa hustong paagi ang imong kuwarta
Pananglitan, tagda si Yoshiko nga taga-Japan. Nahibulong siya kon unsay naa sa Bibliya, busa gibasa niya kini. Unsay resulta? Matod niya, “Tungod sa Bibliya, may katuyoan na ang akong kinabuhi ug may paglaom na ko sa umaabot.” Siya midugang: “Wala na ko mobatig kahaw-ang.” Si Amit nga gihisgotan sa ibabaw, personal nga nagsusi sa Bibliya. Matod niya, “Bilib kaayo ko. Ang Bibliya dunay praktikal nga impormasyon para sa tanan.”
Dakog epekto ang Bibliya sa kinabuhi sa minilyong tawo. Palihog tun-i kini ug sayra kon sa unsang paagi ka makabenepisyo niini.