“Dako ang Buluhaton”

PANAHON kini sa usa ka importante kaayong panagkatigom sa Jerusalem. Gipatawag ni Haring David ang tanan niyang prinsipe, opisyales sa palasyo, ug banggiitang mga lalaki. Naghinamhinam silang madunggan ang espesyal nga pahibalo. Si Jehova nagsugo sa anak ni David nga si Solomon sa pagtukod ug usa ka talagsaon kaayong tinukod alang sa pagsimba sa matuod nga Diyos. Gipadayag sa espiritu sa Diyos ang plano sa arkitektura ngadto sa tigulang nga hari sa Israel ug gihatag kini kang Solomon. “Dako ang buluhaton,” matod ni David, “kay ang kastilyo dili alang sa tawo, kondili alang kang Jehova nga Diyos.”—1 Cron. 28:1, 2, 6, 11, 12; 29:1.

Dayon nangutana si David: “Kinsa ang moboluntaryo aron pun-on ang iyang kamot karong adlawa sa usa ka gasa alang kang Jehova?” (1 Cron. 29:5) Kon tua ka didto, unsa kahay imong sanong? Matukmod ka ba sa pagsuportar niining dakong buluhaton? Ang mga Israelinhon milihok dayon. Oo, sila “nagmaya tungod sa ilang . . . kinabubut-ong mga halad, tungod kay uban sa bug-os nga kasingkasing nga sila mihimog kinabubut-ong mga halad ngadto kang Jehova.”—1 Cron. 29:9.

Kasiglohan sa ulahi, si Jehova nagtukod ug mas dako pa kay sa templo. Iyang gitukod ang dakong espirituwal nga templo, ang kahikayan aron makaduol kaniya ang mga tawo diha sa pagsimba pinasukad sa halad ni Jesus. (Heb. 9:11, 12) Giunsa pagtabang ni Jehova ang mga tawo karon aron mapasig-uli kaniya? Pinaagi sa atong buluhatong paghimog tinun-an. (Mat. 28:19, 20) Ingong resulta, milyonmilyon ang nadumalahag pagtuon kada tuig, libolibo ang nabawtismohan, ug ginatos ka bag-ong kongregasyon ang natukod.

Tungod sa maong pag-uswag, gikinahanglan ang pag-imprentag dugang literatura sa Bibliya, pagtukod ug pagmentinar sa mga Kingdom Hall, ug pagpalit ug propidad para sa asembliya ug kombensiyon. Dili ba dako ug magantihon ang atong buluhatong pagsangyaw sa maayong balita?—Mat. 24:14.

Ang gugma alang sa Diyos ug sa isigkatawo ug ang pagkadinalian sa buluhatong pagsangyaw nagpalihok sa katawhan sa Diyos sa pagdalag “gasa alang kang Jehova” pinaagi sa kinabubut-ong mga donasyon. Makapalipay gayod ang ‘pagpasidungog kang Jehova pinaagi sa atong bililhong mga butang’ ug ang pagkakita nga gigamit kining mga butanga sa matinud-anon ug maalamong paagi sa paghimo sa kinadak-ang buluhaton sa kasaysayan!—Prov. 3:9.

Kon sa Unsang Paagi ang Uban Midonar Alang sa Tibuok Kalibotang Buluhaton

Daghan karon ang ‘naggahin,’ o nagbadyet, ug salapi aron ihulog sa contribution box sa kongregasyon nga gimarkahag “Worldwide Work.” (1 Cor. 16:2) Matag bulan, ang mga kongregasyon magpadala niini nga salapi ngadto sa sangang buhatan sa mga Saksi ni Jehova nga nagdumala sa ilang nasod. Puwede sab kang direkta nga magpadala ug mga donasyon sa legal nga korporasyon nga gigamit sa mga Saksi ni Jehova sa inyong nasod. Aron mahibalo sa pangunang korporasyon nga gigamit sa mga Saksi ni Jehova sa inyong nasod, palihog kontaka ang sangang buhatan. Ang adres makita sa www.jw.org/ceb. Kini ang matang sa mga donasyon nga direkta nimong ikapadala:

OUTRIGHT DONATIONS

Mga donasyon nga gihimo pinaagig bank transfer, debit card, credit card, o mobile money transfer. Sa pipila ka sangang buhatan, posible usab kining himoon diha sa jw.org o sa ubang haom nga website.
Mga donasyon nga salapi, alahas, o ubang mahalong butang. Ilakip ang sulat nga nag-ingong kini maoy outright donation, o donasyon nga walay kondisyones.

CONDITIONAL DONATION ARRANGEMENT

Mga donasyong salapi nga mahimong ibalik kon gikinahanglan sa nagdonar.
Ilakip ang usa ka sulat nga nag-ingong ang donasyon maoy kondisyonal.

CHARITABLE PLANNING

Gawas sa mga gasa nga salapi ug ubang mahalong butang, aduna pay laing mga paagi sa paghatag aron makatabang sa buluhaton sa Gingharian sa tibuok kalibotan. Kini gihisgotan dinhi. Bisag unsa pang paagi sa pagdonar ang gusto nimong pilion, palihog kontaka una ang inyong sangang buhatan aron masayran kon unsa nga mga paagi ang puwede sa inyong nasod. Kay lainlain man ang legal nga mga kinahanglanon ug balaod bahin sa buhis, importante nga mokonsultag abogado ug tax adviser sa dili pa mopilig kinamaayohang paagi sa pagdonar.

Insurance: Donasyon diin ang korporasyon nga gigamit sa mga Saksi ni Jehova ang gihimong benepisyaryo sa usa ka life insurance policy o retirement/pension plan.

Bank Accounts: Mga deposito sa bangko, sertipiko sa deposito, o indibiduwal nga mga pondo sa pagretiro nga gingalan o gihimong payable on death ngadto sa korporasyon nga gigamit sa mga Saksi ni Jehova, depende sa mga requirement sa lokal nga bangko.

Stocks and Bonds: Mga stock ug bond nga direktang gidonar ngadto sa korporasyon nga gigamit sa mga Saksi ni Jehova, o kaha pinaagig transfer on death nga kasabotan.

Real Estate: Mabaligya nga balay ug yuta nga direktang gidonar ngadto sa korporasyon nga gigamit sa mga Saksi ni Jehova. O kon kini gipuy-an pa, puwedeng maghimog kasabotan nga makapuyo niini ang nagdonar samtang siya buhi pa.

Gift Annuity: Mga stock ug bond o salapi nga gidonar ngadto sa korporasyon nga gigamit sa mga Saksi ni Jehova. Dunay himoong kasabotan nga ang nagdonar, o ang usa nga iyang gitudlo, modawat ug espesipikong annuity payment matag tuig samtang siya buhi pa. Ang nagdonar makakuhag discount sa iyang income tax sa tuig nga gihimo ang gift annuity.

Wills and Trusts: Propidad o salapi nga mahimong ipapanunod ngadto sa korporasyon nga gigamit sa mga Saksi ni Jehova pinaagig legal nga testamento, o pinaagi sa paghimo sa korporasyon ingong benepisyaryo sa usa ka trust agreement. Dunay bentaha kini nga kasabotan kay mahimong makunhoran ang bayranan sa buhis.

Ang terminong “charitable planning” nagpasabot nga kinahanglang abanteng magplano ang modonar. Para matabangan kadtong gustong mosuportar sa tibuok kalibotang buluhaton sa mga Saksi ni Jehova pinaagig charitable planning, gihimo ang brosyur nga Charitable Planning to Benefit Kingdom Service Worldwide. Ang brosyur, nga mabatonan sa Iningles ug Kinatsila, naghatag ug impormasyon bahin sa lainlaing paagi sa paghatag ug donasyon, ihatag man kini karon o inigkamatay sa nagdonar. Lagmit dili tanang impormasyon sa brosyur ang puwede sa imong kahimtang tungod sa mga balaod bahin sa buhis o uban pang balaod sa inyong nasod. Pinaagi niini nga mga paagi sa pagdonar, daghan ang nakasuportar sa atong tibuok kalibotang buluhaton ug dako ang nakunhod sa ilang buluhisan. Kon mabatonan kini nga brosyur sa inyong nasod, pangayog kopya sa sekretaryo sa inyong kongregasyon.

Alang sa dugang impormasyon, i-click ang link nga “Paghatag ug Donasyon Para sa Among Buluhaton sa Tibuok Kalibotan” diha sa ubos nga bahin sa home page sa jw.org/ceb, o kontaka ang sangang buhatan.