PANGUNANG TOPIKO | MGA ANGHEL—TINUOD BA SILA? NGANONG ANGAY KANG MAHIBALO?
Unsay Giingon sa Bibliya Bahin sa mga Anghel?
Gusto ka bang mahibalo bahin sa mga anghel—kon kinsa sila, unsay ilang sinugdanan, ug kon unsay ilang buluhaton? Ang inspiradong Pulong sa Diyos, ang Bibliya, mao ray makatubag niining mga pangutanaha. (2 Timoteo 3:16) Unsay giingon sa Bibliya bahin kanila?
Kay ang Diyos usa man ka Espiritu, ang mga anghel sab maoy dili makitang mga espiritu nga “walay unod ug mga bukog.” Ang maunongong mga anghel nagpuyo sa langit ug makaduol sa presensiya sa Diyos.—Lucas 24:39; Mateo 18:10; Juan 4:24.
Kaniadto, may mga panahon nga ang mga anghel magsul-ob ug tawhanong lawas sa pagtuman sa gisugo sa Diyos kanila dinhi sa yuta, ug pagkahuman sa ilang buluhaton, hukason nila ang ilang tawhanong lawas.—Maghuhukom 6:11-23; 13:15-20.
Bisan tuod gipresentar sa Bibliya ang mga anghel ingong lalaki ug kanunay silang magpakita ingong mga lalaki, walay lalaki o babaye taliwala kanila. Dili sila magminyo ug makabatog mga anak. Wala sab sila magkinabuhi ingong tawo—masuso man, bata, o hamtong—una mahimong anghel. Sila gilalang ni Jehova, busa gitawag sila sa Bibliya nga “mga anak sa matuod nga Diyos.”—Job 1:6; Salmo 148:2, 5.
Ang Bibliya naghisgot ug “pinulongan sa mga tawo ug sa mga manulonda [o, anghel],” nga nagpakita nga ang espiritung mga persona dunay pinulongan. Bisag gigamit sa Diyos ang mga anghel sa pagpakigsulti sa mga tawo, kita iyang gidid-an sa pagsimbag mga anghel o sa pag-ampo kanila.—1 Corinto 13:1; Pinadayag 22:8, 9.
Dunay tinagpulo ka libo ka tinagpulo ka libong mga anghel, busa ang ilang gidaghanon tingali moabot ug bilyonbilyon.—Daniel 7:10; Pinadayag 5:11.
Ang mga anghel gamhanan kaayo—mas gamhanan pa kay sa tawo—ug intelihente kaayo. Sila makapanaw nga hilabihan ka paspas, mas paspas pa kay sa kilat.—Salmo 103:20; Daniel 9:20-23.
Bisag gamhanan ug intelihente kaayo, sila dunay mga limitasyon, ug dunay mga butang nga wala sila mahibalo.—Mateo 24:36; 1 Pedro 1:12.
Sila gilalang nga dunay personalidad, mga hiyas nga sama sa Diyos, ug dunay kagawasan sa pagpili. Busa sama sa tawo, sila makapili sa pagbuhat sa husto o sa sayop. Ikasubo, ang ubang anghel mipili sa pagrebelde sa Diyos.—Judas 6.