Paluyohi ang Pagkasoberano ni Jehova!

1, 2. Sa unsa angayng kombinsido ang matag usa kanato? (Tan-awa ang hulagway sa sinugdan sa artikulo.)

ATONG nahisgotan sa nag-unang artikulo nga nangangkon ang Yawa nga dili maayo ang pagmando ni Jehova ug mas maayo ang kahimtang sa tawo kon silasila ray magmando. Husto ba si Satanas? Ibutang ta nga mabuhi sa walay kataposan ang mga tawo nga gustong magmando sa kaugalingon. Mas maayo kaha ang ilang kahimtang nga wala ang pagmando sa Diyos? Mas malipayon kaha ka kon bug-os kang independente sa Diyos ug mabuhi sa walay kataposan?

² Walay makatubag nianang mga pangutanaha para nimo. Kinahanglang pamalandongon kana sa matag usa. Sa pagbuhat niana, kinahanglan nga mahimong klaro nga matarong ang pagkasoberano sa Diyos. Kini ang kinamaayohang pagmando. Ug angayan lang nga bug-os nato kining suportahan. Ang Bibliya naghatag ug basehanan sa maong pagtuo. Pananglitan, konsideraha ang giingon sa Kasulatan bahin sa katungod ni Jehova nga mahimong Soberano.

SI JEHOVA ANG MAY KATUNGOD NGA MOMANDO

3. Nganong si Jehova lang ang bugtong Soberano?

³ Si Jehova ang bugtong Soberano sa uniberso kay siya ang labing gamhanang Diyos ug Maglalalang. (1 Cron. 29:11; Buh. 4:24) Sa Pinadayag 4:11, nakita ang 144,000 ka kaubang magmamando ni Kristo sa langit, ug sila miingon: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.” Oo, kay si Jehova ang naglalang sa tanan, siya lang ang may katungod nga momando sa mga tawo ug sa espiritung mga linalang.

4. Nganong ang pagsupak sa pagmando sa Diyos sayop nga paggamit sa kagawasan sa pagpili?

⁴ Walay nalalang si Satanas. Busa, wala siyay katungod nga mandoan ang uniberso. Sa pagrebelde sa pagkasoberano ni Jehova, si Satanas ug ang unang magtiayon nagmapahitas-on. (Jer. 10:23) Tinuod, ingong mga linalang nga may kagawasan, makapili sila nga mahimong independente sa Diyos. Pero naghatag ba nâ nilag katungod sa pagbuhat niana? Wala. Makatabang sa mga tawo ang kagawasan sa pagpili aron makahimog hustong desisyon matag adlaw. Bisan pa niana, wala kana maghatag nilag katungod nga morebelde sa Maglalalang ug Maghahatag ug Kinabuhi. Klaro, ang pagsupak kang Jehova maoy sayop nga paggamit sa kagawasan sa pagpili. Ingong mga tawo, kinahanglan tang magpasakop sa matarong nga pagmando ni Jehova.

5. Nganong makaseguro ta nga matarong ang mga desisyon sa Diyos?

⁵ May lain pang rason kon nganong si Jehova ang bugtong Soberano. Ang iyang paagi sa pagmando nagpakitag hingpit nga hustisya. Siya miingon: “Ako si Jehova, ang Usa nga nagapakita ug mahigugmaong-kalulot, hustisya ug pagkamatarong diha sa yuta; kay niining mga butanga ako mahimuot.” (Jer. 9:24) Sa pagdesisyon kon unsay matarong, wala siya magdepende sa sinulat nga mga balaod nga hinimo sa dili hingpit nga mga tawo. Ang iyang hingpit nga hustisya naggikan mismo sa iyang personalidad, ug base niana, siya naghatag ug sinulat nga balaod para sa mga tawo. “Ang pagkamatarong ug ang paghukom mao ang pihong dapit sa [iyang] trono,” busa makasalig ta nga matarong ang tanan niyang balaod, prinsipyo, ug desisyon. (Sal. 89:14; 119:128) Sa laing bahin, bisan pa sa pagkuwestiyon niya sa pagkasoberano ni Jehova, si Satanas wala makapatunghag hustisya sa kalibotan.

6. Nganong si Jehova ang may katungod nga momando sa kalibotan?

⁶ Dugang pa, si Jehova ang bugtong Soberano kay naa kaniya ang kahibalo ug kaalam nga gikinahanglan sa pag-atiman sa uniberso. Pananglitan, sa iyang tabang, ang iyang Anak nakaayog mga sakit nga dili matambalan sa mga doktor. (Mat. 4:23, 24; Mar. 5:25-29) Para kang Jehova, dili kana milagro. Siya nahibalo sa natural nga proseso sa lawas ug may katakos sa pag-ayo niini. Makahimo sab siya sa pagbuhi sa mga patay ug pagpahunong sa mga katalagman.

7. Sa unsang paagi ang kaalam ni Jehova labaw kaayo nianang sa kalibotan nga gimandoan ni Satanas?

⁷ Ang kalibotan ilalom sa impluwensiya ni Satanas nangita gihapog paagi sa paghusay sa mga away diha sa sulod sa nasod ug tali sa mga nasod. Si Jehova lang ang may kaalam sa pagpatunghag kalinaw sa kalibotan. (Isa. 2:3, 4; 54:13) Samtang tun-an nato ang kahibalo ug kaalam ni Jehova, bation nato ang gibati ni apostol Pablo, kinsa misulat ubos sa paggiya sa Diyos: “Oh pagkalawom sa bahandi ug sa kaalam ug sa kahibalo sa Diyos! Pagkadili-matukib sa iyang mga paghukom ug pagkadili-masubay sa iyang mga dalan!”​—Roma 11:33.

ANG PAGMANDO NI JEHOVA ANG KINAMAAYOHAN

8. Unsay nakapatandog nimo sa paagi sa pagmando ni Jehova?

⁸ Gawas sa pagpamatuod nga si Jehova ang may katungod sa pagmando, gipakita usab sa Bibliya nga siya ang kinamaayohang magmamando. Ang usa ka rason mao, siya nagmando uban ang gugma. Oo, matandog ta sa paagi sa pagpasundayag niya sa iyang pagkasoberano. Siya “maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatuoran.” (Ex. 34:6) Gitratar sa Diyos ang iyang mga alagad uban ang dignidad ug pagtahod. Maatiman ta niya labaw pa sa atong pag-atiman sa atong kaugalingon. Lahi sa pangangkon sa Yawa, gihatag ni Jehova ang maayo sa iyang matinumanong alagad. Gihatag pa gani niya ang iyang pinalanggang Anak aron maangkon nato ang kinabuhing walay kataposan!​—Basaha ang Salmo 84:11; Roma 8:32.

9. Nganong nahibalo ta nga ang Diyos nahigugma nato ingong indibiduwal?

⁹ Si Jehova nahigugma sa iyang katawhan ingong grupo. Siya usab interesado kaayo sa matag indibiduwal. Pananglitan, sulod sa 300 ka tuig, si Jehova nagpadala ug nagtabang sa mga maghuhukom aron luwason ang nasod sa Israel gikan sa mga kaaway. Niadtong gubot nga panahon, namatikdan gihapon niya ang dili Israelinhong si Ruth. Si Ruth mihimog dakong sakripisyo aron mahimong magsisimba ni Jehova. Gipanalanginan siya ni Jehova ug bana ug anak nga lalaki. Pero dili kay kana ra. Inigkabanhaw niya, iyang mahibaloan nga ang iyang anak nahimong usa sa mga kaliwat sa Mesiyas. Ug hunahunaa kon unsa kaha siya ka malipayon inigkahibalo niya nga ang sugilanon sa iyang kinabuhi napreserbar sa basahon sa Bibliya nga nagdala sa iyang ngalan!​—Ruth 4:13; Mat. 1:5, 16.

10. Nganong dili sobra ka estrikto ang pagmando ni Jehova?

¹⁰ Ang pagmando ni Jehova dili madaogdaogon ni sobra ka estrikto. Naghatag kinig kagawasan ug kalipay. (2 Cor. 3:17) Gipahayag kana ni David niining paagiha: “Ang dignidad ug kahalangdon [sa Diyos] anaa sa atubangan niya, ang kusog ug kalipay anaa sa iyang dapit.” (1 Cron. 16:7, 27) Sa susama, ang salmistang si Etan misulat: “Malipayon ang katawhan nga nakaila sa singgit sa kalipay. Oh Jehova, sa kahayag sa imong nawong sila nagpadayon sa paglakaw. Sa imong ngalan nagakalipay sila sa tibuok nga adlaw ug sa imong pagkamatarong sila ginabayaw.”​—Sal. 89:15, 16.

11. Sa unsang paagi mas makombinsir ta nga kinamaayohan ang pagmando ni Jehova?

¹¹ Ang kanunayng pagpamalandong sa pagkamaayo ni Jehova mas makapakombinsir kanato nga kinamaayohan ang iyang pagmando. Bation nato ang gibati sa salmista: “Ang usa ka adlaw sa imong mga sawang labi pang maayo kay sa usa ka libo sa laing dapit.” (Sal. 84:10) Tinuod gayod kana! Ingong atong mahigugmaong Tigdisenyo ug Maglalalang, nahibalo gyod si Jehova kon unsay atong gikinahanglan aron tinuod nga magmalipayon, ug dagaya niyang gitagana kana. Ang tanan niyang sugo makaayo ug makapalipay pag-ayo kanato. Tinuod kini bisag nagkinahanglag sakripisyo ang pagsunod niana.​—Basaha ang Isaias 48:17.

12. Unsay panguna natong motibo sa pagpaluyo sa pagmando ni Jehova?

¹² Gipakita sa Bibliya nga human sa Usa ka Libo ka Tuig nga Pagmando ni Kristo, ang pipila ka tawo modesisyon sa pagrebelde sa pagmando ni Jehova. (Pin. 20:7, 8) Unsa tingaliy mag-aghat nila sa pagbuhat niana? Si Satanas, nga bag-ong gibuhian ug nagtinguha sa pagpahisalaag sa katawhan, seguradong magpukaw sa kahakog sa tawo, nga maoy kanunay niyang ginabuhat. Basin iyang kombinsihon ang mga tawo nga puwede silang mabuhi sa walay kataposan bisag dili motuman kang Jehova. Siyempre, dili kana tinuod. Pero ang punto mao: Madani ba ta niana? Kon kita nahigugma ug nag-alagad kang Jehova tungod sa iyang pagkamaayo ug sa iyang katungod sa pagmando sa uniberso, kana nga daotang pangangkon dili makadani kanato. Dili gyod nato tinguhaon ang kinabuhi nga bulag sa matarong ug mahigugmaong pagmando ni Jehova.

MAGMAUNONGON SA PAGKASOBERANO SA DIYOS

13. Nganong ang pagsundog sa Diyos nagpakita nga gipaluyohan nato siya?

¹³ Kinahanglan gyod natong suportahan ang pagmando ni Jehova. Sama sa ato nang nahisgotan, siya ang may katungod sa pagmando ug ang iyang pagmando mao ang kinamaayohan. Atong mapaluyohan ang pagmando ni Jehova pinaagi sa matinumanong pag-alagad kaniya. Sa unsa pang paagi ikapakita nato ang atong pagpaluyo? Ikapakita nato kana pinaagi sa pagsundog kang Jehova. Dihang sundogon nato ang paagi ni Jehova sa pagdumala sa mga butang, gipakita nato nga atong gimahal ug gipaluyohan ang iyang pagmando.​—Basaha ang Efeso 5:1, 2.

14. Sa unsang paagi masundog si Jehova sa mga ansiyano ug mga ulo sa pamilya?

¹⁴ Nakat-onan nato sa atong pagtuon sa Bibliya nga mahigugmaon ang paagi ni Jehova sa pagmando. Sa pagsundog kaniya, ang mga ulo sa pamilya ug mga ansiyano nga nagmahal sa iyang pagmando dili magharihari o mahimong diktador. Si Pablo tigsundog usab sa Diyos ug sa Iyang Anak. (1 Cor. 11:1) Wala pakaulawi ni Pablo o pugsa ang uban sa pagsunod kaniya. Hinunoa, gidasig niya sila. (Roma 12:1; Efe. 4:1; Filem. 8-10) Ingon niana ang paagi ni Jehova sa pagdumala. Busa, angay kanang sundogon sa tanang nagmahal ug nagpaluyo sa iyang pagmando.

15. Sa unsang paagi ang pagtahod nato sa kahikayan sa pagkaulo magpadayag sa atong pagmahal sa pagmando ni Jehova?

¹⁵ Unsay atong sanong sa hinatag sa Diyos nga awtoridad sa pagkaulo? Pinaagi sa atong matinahorong kooperasyon, gipakita nato ang atong pagsuportar sa pagmando ni Jehova. Bisag wala kaayo ta makasabot o makauyon sa desisyon, suportahan gihapon nato ang kahikayan sa organisasyon. Lahi gayod kana sa paagi sa kalibotan, pero ingon ana ang pagkinabuhi ubos sa pagmando ni Jehova. (Efe. 5:22, 23; 6:1-3; Heb. 13:17) Makabenepisyo ta sa pagbuhat niana kay ang Diyos naghunahuna sa atong kaayohan.

16. Sa unsang paagi mohimog desisyon ang mga tigsuportar sa pagmando ni Jehova?

¹⁶ Mapakita sab nato ang atong pagsuportar sa pagmando ni Jehova pinaagi sa atong mga desisyon. Si Jehova wala maghatag ug espesipikong sugo alang sa matag situwasyon. Hinunoa, gipadayag niya kanato ang iyang hunahuna. Pananglitan, wala siya maghatag ug detalyadong sukdanan sa sininaan alang sa mga Kristohanon. Hinuon, gusto niya nga kita ang mopilig estilo sa sinina ug pamostura nga makasaranganon ug haom para sa Kristohanong mga ministro. (1 Tim. 2:9, 10) Gusto sab niyang mag-amping ta nga dili mapandol o matugaw ang uban tungod sa atong desisyon. (1 Cor. 10:31-33) Dihang mohimo tag desisyon base sa panghunahuna ni Jehova, ug dili lang base sa atong gusto, gipakita nato nga atong gimahal ug gisuportahan ang pagmando ni Jehova.

17, 18. Unsa ang pipila ka paagi nga mapakita sa mga magtiayon nga ilang gipaluyohan ang pagmando ni Jehova?

¹⁷ Tagda ang usa ka paagi diin ang Kristohanong magtiayon makapaluyo sa pagmando ni Jehova. Unsa kaha kon ang ilang kaminyoon lahi kaayo sa gidahom, o makapahigawad pa gani? Mahimo nilang pamalandongon ang pagpakiglabot ni Jehova sa Israel. Gipakasama niya ang iyang kaugalingon sa bana nianang karaang nasod. (Isa. 54:5; 62:4) Pagkalisod niadto nga “kaminyoon”! Pero si Jehova wala dayon mosurender. Balikbalik niyang gipasaylo ang maong nasod ug siya nagmaunongon sa iyang pakigsaad kanila. (Basaha ang Salmo 106:43-45.) Dili ba mas masuod ta kang Jehova tungod sa iyang maunongong gugma?

¹⁸ Busa, kinahanglang sundogon sab sa mga magtiayon si Jehova. Dili sila mangitag dili kasulatanhong paagi aron makalingkawas sa problemadong kaminyoon. Sila nahibalo nga gihiusa sila ni Jehova ug gusto niya nga sila mounong sa usag usa. Ang seksuwal nga imoralidad lang ang Kasulatanhong basehanan alang sa diborsiyo nga mahimong maghatag sa usa ug kagawasan sa pagminyo pag-usab. (Mat. 19:5, 6, 9) Pinaagi sa pagpaningkamot pag-ayo ug pagpangitag paagi sa pagpauswag sa ilang kaminyoon, ilang gipaluyohan ang matarong nga pagmando ni Jehova.

19. Kon mapakyas ta sa pagpaluyo sa pagmando ni Jehova, unsay angay natong buhaton?

¹⁹ Kay dili hingpit, usahay makahimo tag mga butang nga makapahigawad kang Jehova. Nahibalo siya niana ug mahigugmaon siyang mihimog kahikayan alang kanato pinaagi sa lukat ni Kristo. Busa, kon masayop ta, kinahanglang mangayo tag pasaylo kang Jehova. (1 Juan 2:1, 2) Imbes basolon kanunay ang kaugalingon, kinahanglang maningkamot tang makakat-on sa atong sayop. Kon makigsuod ta kang Jehova, siya magpasaylo ug magtabang kanato nga maulian ug makalikay sa samang situwasyon sa umaabot.​—Sal. 103:3.

20. Nganong kinahanglan natong suportahan ang pagmando ni Jehova karon?

²⁰ Sa bag-ong kalibotan, ang tanan magpasakop sa pagmando ni Jehova ug makakat-on sa iyang matarong nga mga paagi. (Isa. 11:9) Pero, daghan na tag nakat-onan karon. Ug nagpadayon pa ang paghusay sa isyu sa pagkasoberano. Karon na ang panahon nga paluyohan ang pagmando sa Diyos pinaagi sa atong pagkamatinumanon, pag-alagad, ug pagpaningkamot sa pagsundog kaniya sa tanan natong buhaton.