Nahinumdom Ka Ba?

Nabasa ba nimog maayo ang bag-ong mga gula sa Ang Bantayanang Torre? Sulayi kon makatubag ka sa mosunod nga mga pangutana:

Dihang may ihatag nga instruksiyon gikan sa organisasyon sa Diyos, unsay angayng reaksiyon sa mga brader, sama sa mga tigdumala sa sirkito ug ansiyano sa kongregasyon?

Kinahanglang mosunod dayon sila. Mahimong pangutan-on nila ang kaugalingon: ‘Gidasig ba nako ang mga igsoon nga magmaunongon kang Jehova? Gipadapat ug gisuportahan ba dayon nako ang instruksiyon nga nadawat?’​—w16.11, p. 11.

Kanus-a nabihag sa Babilonya ang matuod nga mga Kristohanon?

Nahitabo kana wala madugay human sa kamatayon sa mga apostoles. Niadtong panahona, naporma ang klerong matang. Ang Relihiyon ug Estado nagpasiugda sa apostatang Kristiyanidad ug misulay sa pagpahilom sa samag trigong mga Kristohanon. Pero sa mga tuig una pa ang 1914, ang mga dinihogan anam-anam na nga nahigawas.​—w16.11, p. 23-25.

Nganong importante ang nahimo ni Lefèvre d’Étaples?

Niadtong mga 1520, gihubad ni Lefèvre ang Bibliya ngadto sa French aron mabasa kini sa ordinaryong mga tawo. Ang iyang eksplinasyon sa mga teksto nakaimpluwensiya kang Martin Luther, William Tyndale, ug John Calvin.​—wp16.6, p. 10-12.

Unsay kalainan sa “paghunahuna sa unod” ug sa “paghunahuna sa espiritu”? (Rom. 8:6)

Ang tawong naghimo nianang nahauna nagpokus sa mga tinguha ug kiling sa makasasalang unod, nga nagsigeg hisgot ug nagsigeg dayeg sa mga butang sa unod. Ang tawong naghimo nianang ikaduha nagsentro sa iyang kinabuhi sa mga butang nga may kalabotan sa Diyos ug sa Iyang panghunahuna; kana nga Kristohanon gipalihok sa balaang espiritu. Ang una moresulta sa kamatayon, ang ikaduha sa kinabuhi ug kalinaw.​—w16.12, p. 15-17.

Unsa ang pipila ka praktikal nga paagi aron mamenosan ang kabalaka?

Pagtakdag haom nga mga prayoridad, paghimog realistikong mga pagdahom, paggahig panahon sa pagrelaks kada adlaw, kalipayi ang kalalangan sa Diyos, hupti ang kinaiya nga hingatawa, pag-ehersisyo nga regular, ug katulog ug sakto.​—w16.12, p. 22-23.

“Si Enoc gilalin aron dili makaagom ug kamatayon.” (Heb. 11:5) Sa unsang paagi?

Posible nga mahupayong gibugto ni Jehova ang kinabuhi ni Enoc, aron dili niya bation nga mamatay na siya.​—wp17.1, p. 12-13.

Nganong importante ang pagkamakasaranganon?

Ang pagkamakasaranganon nagtumong sa pagbaton ug hustong panglantaw sa kaugalingon ug sa pag-ila sa atong mga limitasyon. Angay natong hinumdoman kon sa unsang paagi makaapektar sa uban ang atong panggawi ug malikayan ang pagpokus sa kaugalingon.​—w17.01, p. 18.

Unsay ebidensiya nga ang Diyos naggiya sa nagamandong lawas sa unang siglo sama sa iyang paggiya sa Nagamandong Lawas karon?

Sa tabang sa balaang espiritu, ilang nasabtan ang Kasulatanhong kamatuoran. Sila nanguna sa pagsangyaw sa tabang sa mga anghel ug nagpagiya sa Pulong sa Diyos. Ingon sab niana karon.​—w17.02, p. 26-28.

Unsay nagtukmod nato sa pag-isip sa lukat ingong bililhon?

Upat ka butang: Kon kinsay naghatag, kon nganong kini gihatag, kon unsay gisakripisyo, ug kon unsa ka dakong panginahanglan ang natagan-an. Kinahanglan natong pamalandongon kon unsay koneksiyon sa usag usa.​—wp17.2, p. 4-6.

Human makadesisyon ang usa ka Kristohanon, puwede ba niya nang usbon?

Kinahanglan natong tumanon ang atong gisulti. Pero, usahay kinahanglang konsiderahon pag-usab ang usa ka desisyon. Human maghinulsol ang katawhan, giusab sa Diyos ang iyang desisyon bahin sa Nineve. Usahay, tungod sa bag-ong kahimtang o impormasyon, kinahanglan sab tingali natong usbon ang atong desisyon.​—w17.03, p. 16-17.

Nganong peligroso ang pagpanabi?

Mahimong makapadako kini sa problema. Husto man ta o sayop, ang pagsultig sakit dili makasulbad sa problema.​—w17.04, p. 21.