Unsaon Nimo Pagbaton ug Mas Maayong Kinabuhi?

ANG kinabuhi karon lahi kaayo sa orihinal nga katuyoan sa Diyos. Ang yuta puno untag mga tawo nga nagpasakop sa pagmando sa Diyos, nagsundog sa iyang gugma ug ubang nindot nga hiyas, ug nakabenepisyo sa iyang paggiya. Gusto sa Diyos nga malipayon silang magtinabangay samtang nag-atiman sa ilang pamilya, nagdiskobreg bag-ong mga butang, ug naghimo sa tibuok yuta nga usa ka paraiso.

ANG DIYOS NAGSAAD NGA BAG-OHON ANG KINABUHI DINHI SA YUTA SUMALA SA IYANG KATUYOAN

• “Gipahunong niya ang mga gubat sa tibuok yuta.”​—Salmo 46:9.

• “Ang gitakdang panahon miabot na . . . sa paglaglag sa mga nagalaglag sa yuta.”​—Pinadayag 11:18.

• “Walay residente nga moingon: ‘Masakiton ko.’”​—Isaias 33:24.

• “Bug-os nga mapahimuslan sa akong mga pinili ang buhat sa ilang mga kamot.”​—Isaias 65:22.

Sa unsang paagi matuman kining mga tagnaa? Gitudlo sa Diyos ang iyang Anak, si Jesus, nga mahimong Hari sa usa ka hingpit nga gobyerno sa langit nga magmando sa yuta. Gitawag kini sa Bibliya nga Gingharian sa Diyos. (Daniel 2:44) Ang Bibliya naghisgot kang Jesus: “Ihatag ni Jehova nga Diyos kaniya ang trono . . . [ug] siya magahari.”​—Lucas 1:32, 33.

Samtang dinhi si Jesus sa yuta, mihimo siyag daghang milagro aron ipakita nga dihang siya magmando na ingong Hari, mas maayo na ang kinabuhi sa tanang tawo.

GIPAKITA NI JESUS KON UNSAY IYANG HIMOON PARA SA MASINUGTANONG KATAWHAN

• Giayo niya ang matag klase sa sakit, nga nagpakita nga wad-on niya ang tanang sakit ug depekto sa lawas sa tawo.​—Mateo 9:35.

• Gipakalma niya ang dagat, nga nagpakita nga iyang protektahan ang katawhan pinaagi sa pagkontrol sa mga puwersa sa kinaiyahan.​—Marcos 4:36-39.

• Gipakaon niya ang libolibo ka tawo, nga nagpakita nga iyang ihatag ang tanang panginahanglan sa katawhan.​—Marcos 6:41-44.

• Gihimo niyang bino ang tubig sa usa ka kasal, nga nagpakita nga tabangan niya ang mga tawo nga mag-enjoy sa kinabuhi.​—Juan 2:7-11.

Unsay imong himoon aron mabatonan ang kinabuhi nga giandam sa Diyos para sa mga tawong nahigugma kaniya? Dunay “dalan” nga angay nimong subayon. Ang Bibliya nag-ingon nga kini “ang dalan padulong sa kinabuhi, ug diyutay ra ang nakakaplag niini.”—Mateo 7:14.

PANGITAA ANG DALAN SA MAS MAAYONG KINABUHI

Unsa ang dalan sa kinabuhi? Ang Diyos nag-ingon: “Ako, si Jehova, ang imong Diyos, ang Usa nga nagtudlo kanimo aron makabaton kag kaayohan, ang Usa nga naggiya kanimo sa dalan nga angay nimong laktan.” (Isaias 48:17) Kon imong subayon kining dalana, mahimong mas maayo ang imong kinabuhi.

Miingon si Jesus: “Ako ang dalan ug ang kamatuoran ug ang kinabuhi.” (Juan 14:6) Kon atong sundon ang gitudlo ni Jesus ug sundogon ang iyang panig-ingnan, masuod ta sa Diyos ug makabatog mas maayong kinabuhi.

Sa unsang paagi nimo makaplagan ang dalan sa kinabuhi? Daghan kaayog relihiyon, pero si Jesus nagpasidaan: “Dili ang tanang moingon kanako, ‘Ginoo, Ginoo,’ makasulod sa Gingharian sa langit, kondili kadto lamang nagabuhat sa kabubut-on sa akong Amahan nga anaa sa langit.” (Mateo 7:21) Miingon sab siya: “Pinaagi sa ilang mga bunga kamo makaila kanila.” (Mateo 7:16) Ang Bibliya makatabang nimo nga mailhan ang tinuod nga relihiyon.—Juan 17:17.

Unsaon nimo pagsubay sa dalan sa kinabuhi? Kinahanglang mailhan nimo ang Diyos nga naghatag natog kinabuhi: Kinsa siya? Unsay iyang ngalan? Unsay iyang personalidad? Unsay iyang mga gihimo para nato? Unsay gusto niya nga atong buhaton?a

Gusto sa Diyos nga ang mga tawo dili lang basta magtrabaho, mokaon, maglingawlingaw, ug mag-atiman sa pamilya. Puwede natong mailhan ang Diyos nga naghimo sa tanang butang ug mahimong iyang higala. Mapakita nato nga gimahal nato siya pinaagi sa pagbuhat sa iyang kabubut-on. Si Jesus miingon: “Aron ilang mabatonan ang kinabuhing walay kataposan, kinahanglan silang makaila kanimo, ang bugtong matuod nga Diyos.”—Juan 17:3.

ANG UNA NIMONG HIMOON

Aron mapalipay ang bugtong matuod nga Diyos, basin kinahanglan kang mohimog mga kausaban. Lisod tingali ning buhaton. Pero ang tinuod, mas magmalipayon ka dihang magsugod na kag subay sa dalan sa kinabuhi. Aron matubag ang imong mga pangutana bahin sa Diyos, ang mga Saksi ni Jehova nagtanyag ug libreng pagtuon sa Bibliya sa panahon ug lugar nga kombenyente nimo. Puwede mi nimong makontak pinaagi sa among website nga www.jw.org/ceb.