Adtoa ang mga Tawo ug Paghimog mga Tinun-an

1-2. (a) Sumala sa sugo ni Jesus sa Mateo 28:18-20, unsa ang pangunang responsibilidad sa kongregasyon? (b) Unsang mga pangutana ang atong tubagon niining artikuloha?

SEGURADONG eksayted kaayo ang mga apostoles dihang nagtigom sila sa usa ka bukid. Gihikay ni Jesus human siya mabanhaw nga makigkita siya kanila nianang dapita. (Mat. 28:16) Lagmit, mao nang panahona nga “siya nagpakita sa kapin sa 500 ka igsoon sa usa ka higayon.” (1 Cor. 15:6) Nganong nakigkita man si Jesus sa iyang mga tinun-an? Aron ihatag kining makapalipay nga sugo: “Busa adtoa ninyo ang mga tawo sa tanang kanasoran ug tudloi sila aron mahimong akong mga tinun-an.”​—Basaha ang Mateo 28:18-20.

² Ang mga tinun-an nga nakadungog sa gisulti ni Jesus sa ulahi nahimong bahin sa unang siglong kongregasyon. Ang pangunang responsibilidad sa maong kongregasyon mao ang paghimog dugang nga mga tinun-an sa Kristo.b Karon, dunay tinagpulo ka libong kongregasyon sa tibuok yuta, ug mao gihapon nay ilang pangunang responsibilidad. Niining artikuloha, atong tubagon ang upat ka pangutana: Nganong importante kaayo ang paghimog mga tinun-an? Unsay apil niana? Ang matag Kristohanon ba makatabang sa paghimog tinun-an? Ug nganong kinahanglan tang magmapailobon niining buluhatona?

NGANONG IMPORTANTE KAAYO ANG PAGHIMOG MGA TINUN-AN?

3. Sumala sa Juan 14:6 ug 17:3, nganong importante kaayo ang paghimog mga tinun-an?

³ Nganong importante kaayo ang paghimog mga tinun-an? Tungod kay mga tinun-an lang sa Kristo ang puwedeng mahimong higala sa Diyos. Dugang pa, kadtong nagsunod sa Kristo mas maayog kinabuhi karon ug may paglaom nga mabuhi sa walay kataposan sa umaabot. (Basaha ang Juan 14:6; 17:3.) Oo, gipiyalan ta ni Jesus ug importanteng responsibilidad, pero dili kay kitakita ray naghimo niining buluhatona. Si apostol Pablo misulat bahin sa iyang kaugalingon ug sa pipila niya ka suod nga kauban: “Kami mga isigkamagbubuhat sa Diyos.” (1 Cor. 3:9) Pagkadakong pribilehiyo ang gihatag ni Jehova ug ni Jesu-Kristo ngadto sa dili hingpit nga mga tawo!

4. Unsay atong makat-onan sa ehemplo ni Ivan ug Matilde?

⁴ Ang paghimog mga tinun-an makahatag natog dakong kalipay. Tagda ang ehemplo sa magtiayong taga-Colombia, si Ivan ug Matilde. Gisangyawan nila ang batan-ong si Davier, kinsa miingon: “Gusto kong magbag-o, pero dili nako mahimo.” Si Davier usa ka boksidor nga adik, palahubog, ug may puyopuyo, si Erika. Si Ivan misaysay: “Gisugdan namo siyag Bible study. Layo ang iyang baryo, ug kinahanglan ming magbisikletag daghang oras agi sa lapokong mga dalan. Dihang nakita ni Erika ang kausaban sa panggawi ug panghunahuna ni Davier, miapil siya sa pagtuon.” Ngadtongadto, gibiyaan ni Davier ang droga, paghuboghubog, ug boksing. Gipakaslan sab niya si Erika. Si Matilde miingon: “Dihang nabawtismohan si Davier ug Erika niadtong 2016, nahinumdom mi sa giingon kaniadto ni Davier, ‘Gusto kong magbag-o, pero dili nako mahimo.’ Nakahilak mi sa kalipay.” Seguradong malipay ta pag-ayo dihang tabangan nato ang mga tawo nga mahimong mga tinun-an sa Kristo.

UNSAY APIL SA PAGHIMOG MGA TINUN-AN?

5. Unsa ang unang lakang nga atong himoon sa paghimog mga tinun-an?

⁵ Ang unang lakang nga atong himoon sa paghimog mga tinun-an mao ang ‘pagpangita’ niadtong gustong makakat-on bahin kang Jehova. (Mat. 10:11) Atong mapamatud-an nga tinuod ta nga mga Saksi ni Jehova kon sangyawan nato ang tanan nga atong mahibalag. Atong mapamatud-an nga tinuod ta nga mga Kristohanon kon tumanon nato ang sugo sa Kristo nga magsangyaw.

6. Unsay makatabang nato aron magmalamposon sa ministeryo?

⁶ Ang pipila gustong makakat-on sa kamatuoran, pero daghan sa atong mahibalag ang morag dili interesado sa sinugdan. Kinahanglan tingali natong ugmaron ang ilang interes. Aron magmalamposon sa ministeryo, kinahanglan tang mangandam pag-ayo. Pagpilig espesipikong mga topiko nga lagmit makapainteres niadtong imong mahibalag. Dayon, hunahunaa kon unsaon nimo pagsugod ug hisgot ang maong topiko.

7. Sa unsang paagi makasugod ka sa pagpakig-estorya, ug nganong importante ang pagpaminaw ug pagpakitag respeto?

⁷ Pananglitan, mahimong pangutan-on nimo ang tagbalay: “Puwede nakong mahibaloan ang imong opinyon? Daghan sa atong mga problema karon ang nakaapektar sa mga tawo sa tibuok kalibotan. Sa imong hunahuna, gikinahanglan ba ang usa ka gobyerno nga momando sa tibuok yuta aron masulbad ang mga problema sa kalibotan?” Dayon, mahimo nimong hisgotan ang Daniel 2:44. O puwede kang moingon: “Unsa kahay sekreto aron mahimong buotan ang mga anak? Puwede ba nakong mahibaloan ang imong opinyon?” Unya, hisgoti ang Deuteronomio 6:6, 7. Bisag unsa nga topiko ang imong hisgotan, hunahunaa ang mga tawo nga maminaw nimo. Hunahunaa kon sa unsang paagi makabenepisyo sila dihang ilang mahibaloan kon unsa gyoy gitudlo sa Bibliya. Dihang makig-estorya nila, importante nga maminaw ka nila ug respetohon ang ilang opinyon. Nianang paagiha, mas masabtan nimo sila, ug lagmit maminaw sila nimo.

8. Nganong kinahanglan tang mobalikduaw pirme?

⁸ Sa dili pa makadesisyon ang usa nga magpa-Bible study, nagkinahanglan tingali kag panahon ug paningkamot sa pagbalikduaw. Ngano? Tungod kay basig inigbalik nimo, wala diha ang tagbalay o dili nimo siya puwedeng maestorya. Dugang pa, kinahanglan tingali nga kadaghan kang mobalikduaw ayha magpa-Bible study ang tagbalay. Hinumdomi, dakog purohan nga motubo ang tanom kon pirmeng bisbisan. Sa susama, dakog purohan nga motubo ang gugma sa usa ka interesado para kang Jehova ug sa Kristo kon regular tang makighisgot niya bahin sa Pulong sa Diyos.

ANG MATAG KRISTOHANON BA MAKATABANG SA PAGHIMOG TINUN-AN?

9-10. Nganong makaingon ta nga ang matag Kristohanong ministro makatabang sa pagpangitag mga interesado?

⁹ Ang matag Kristohanong ministro makatabang sa pagpangitag mga interesado. Ikakomparar nato kini sa pagpangita sa usa ka bata nga nawala. Sa unsang paagi? Hunahunaa ang nahitabo sa usa ka tres anyos nga batang lalaki nga nawala. Mga 500 ka tawo ang nangita niya. Human sa mga 20 ka oras, ang usa kanila nakakita sa bata diha sa maisan. Pero wala angkona sa maong tawo nga siya ray nakakita sa bata. Siya miingon: “Nakit-an ang bata kay gatosan ka tawo ang nagtinabangay sa pagpangita.”

¹⁰ Daghang tawo ang sama nianang bataa. Mora silag nawala. Wala silay paglaom, pero gusto nilag tabang. (Efe. 2:12) Kapig walo ka milyon kanato ang nagtinabangay sa pagpangita niining mga tawhana. Tingali wala kay makitang Bible study. Pero, ang ubang magmamantala nga nagsangyaw sa samang teritoryo basin makakitag interesado nga gustong mokat-on sa kamatuoran. Dihang ang usa ka magmamantala makakitag interesado ug mahimo ning tinun-an sa Kristo, ang tanang mitabang sa pagpangita angayng malipay.

11. Bisag wala kay Bible study karon, unsa ang laing mga paagi nga makatabang ka sa paghimog mga tinun-an?

¹¹ Bisag wala kay Bible study karon, makatabang ka sa paghimog mga tinun-an sa laing mga paagi. Pananglitan, puwede kang moabiabi ug makighigala sa mga interesado nga motambong sa tigom. Pinaagi niana, makatabang ka sa pagkombinsir nila nga ang gugma nagpaila nato ingong tinuod nga mga Kristohanon. (Juan 13:34, 35) Ang imong mga komento sa tigom, bisag mubo, magtudlo nila sa pagpahayag sa ilang pagtuo sa sinsero ug matinahorong paagi. Mahimo sab nimong ubanan ang usa ka bag-ong magmamantala diha sa ministeryo ug tabangan siya sa paggamit sa Kasulatan sa pagtudlo sa mga tawo. Sa pagbuhat niana, gitudloan nimo siya sa pagsundog sa Kristo.​—Luc. 10:25-28.

12. Nagkinahanglan ba tag talagsaong mga katakos sa paghimog mga tinun-an? Ipatin-aw.

¹² Dili ta angayng maghunahuna nga nagkinahanglan tag talagsaong mga katakos sa pagtudlo sa uban nga mahimong mga tinun-an ni Jesus. Ngano? Tagda ang ehemplo ni Faustina, nga taga-Bolivia. Dili siya makamaong mobasa dihang nakaila niya ang mga Saksi ni Jehova. Karon, medyo makamao na siya. Siya bawtismado na ug ganahang motudlo sa uban. Sagad, magdumala siyag lima ka Bible study kada semana. Bisag dili siya parehas ka maayo mobasa sa kadaghanan sa iyang mga Bible study, nakatabang siyag unom ka tawo nga mabawtismohan.​—Luc. 10:21.

13. Bisag puliki kaayo ta, unsa ang pipila sa mga panalangin sa paghimog mga tinun-an?

¹³ Daghang Kristohanon ang puliki kaayo sa pag-atiman sa importanteng mga responsibilidad. Bisan pa niana, naggahin silag panahon sa pagdumalag pagtuon sa Bibliya, ug malipayon kaayo sila. Matikdi ang ehemplo ni Melanie nga taga-Alaska. Siya usa ka nag-inusarang ginikanan nga may otso anyos nga batang babaye. Duna pod siyay full-time nga trabaho ug mitabang siya sa pag-atiman sa iyang ginikanan nga may kanser. Si Melanie ray Saksi sa ilang hilit nga lungsod. Pirme siyang mag-ampo nga hatagan siyag kusog nga makasangyaw bisag tugnaw kay gusto niyang makakitag Bible study. Sa ulahi, nahibalag niya si Sara, kinsa nalipay sa pagkahibalo nga ang Diyos may personal nga ngalan. Ngadtongadto, si Sara nagpa-Bible study. Si Melanie miingon: “Kada Biyernes sa gabii, kapoy na kaayo ko, pero manglakaw gihapon mi sa akong anak aron mag-Bible study, ug nakabenepisyo mi. Ganahan ming mag-research aron matubag ang mga pangutana ni Sara, ug lipay kaayo mi kay nahimo siyang higala ni Jehova.” Si Sara maisogong milahutay sa pagsupak, mibiya sa iyang relihiyon, ug nagpabawtismo.

NGANONG NAGKINAHANGLAG PAILOB ANG PAGHIMOG MGA TINUN-AN?

14. (a) Sa unsang paagi nahisama sa pagpangisda ang paghimog mga tinun-an? (b) Unsay epekto kanimo sa giingon ni Pablo sa 2 Timoteo 4:1, 2?

¹⁴ Kon wala ka pa makakitag interesado nga gustong mahimong tinun-an, padayon sa pagpangita. Hinumdomi nga gipakasama ni Jesus sa pagpangisda ang paghimog mga tinun-an. Ang mga mananagat mogahin tingalig daghang oras ayha makakuhag isda. Sagad mangisda sila sa lawom nang gabii o kaha sayo sa buntag, ug usahay mobiyahe silag layo. (Luc. 5:5) Sa susama, ang pipila ka magsasangyaw mogahin ug daghang oras sa mapailobong “pagpangisda” sa lainlaing higayon ug dapit. Ngano? Aron mas dakog purohan nga makahibalag silag mga tawo. Kadtong naningkamot sa pagpangita sagad mapanalanginan kay makakita silag mga interesado. Puwede ba nimong sulayan ang pagsangyaw sa oras o dapit nga lagmit mas daghang tawo ang imong maestorya?​—Basaha ang 2 Timoteo 4:1, 2.

15. Nganong nagkinahanglag pailob ang pag-Bible study?

¹⁵ Nganong nagkinahanglag pailob ang pag-Bible study? Tungod kay kinahanglan tang mohimog labaw pa kay sa pagtabang lang sa Bible study nga makakat-on ug mahigugma sa mga pagtulon-an sa Bibliya. Kinahanglang tabangan nato siya nga makaila ug mahigugma sa Awtor sa Bibliya, si Jehova. Ug gawas pa sa pagtudlo sa Bible study kon unsay gisugo ni Jesus sa iyang mga tinun-an, kinahanglan nato siyang tabangan nga mahibalo kon unsaon pagkinabuhi ingong tinuod nga Kristohanon. Kinahanglang mapailobon tang motabang niya samtang naningkamot siya sa pagpadapat sa mga prinsipyo sa Bibliya. Ang pipila nakahimo sa pagbag-o sa ilang hunahuna ug batasan sulod lang sa pipila ka bulan; ang uban nagkinahanglag mas taas nga panahon.

16. Unsay imong nakat-onan sa eksperyensiya bahin kang Raúl?

¹⁶ Ang eksperyensiya sa usa ka misyonaryo sa Peru nagpakita sa maayong resulta sa pagpailob. “Duha na ka libro ang among natun-an sa akong Bible study nga si Raúl,” matod sa misyonaryo. “Pero nag-atubang gihapon siyag dagkong problema. Gubot ang iyang kaminyoon, himalikas siya, ug way tahod niya ang iyang mga anak. Pero, tigtambongan siya sa tigom, mao nga padayon nako siyang giduaw aron tabangan siya ug ang iyang pamilya. Kapig tulo ka tuig human sa among pagkaila, mikuwalipikar siya sa bawtismo.”

17. Unsay hisgotan sa sunod nga artikulo?

¹⁷ Si Jesus nagsugo nato nga ‘adtoon ang mga tawo sa tanang kanasoran ug tudloan sila aron mahimong mga tinun-an.’ Aron matuman kana, sagad kinahanglan tang makig-estorya sa mga tawo nga lahi kaayog panghunahuna sa atoa, apil na kadtong walay relihiyon o tingali dili motuog Diyos. Hisgotan sa sunod nga artikulo kon unsaon nato pagsangyaw sa maayong balita nianang matanga sa mga tawo.