Pangandam Alang sa Espesyal nga Okasyon
1 “Padayong buhata kini sa paghandom kanako.” (Luc. 22:19) Kining mga pulonga gibungat ni Jesus sa dihang gihimo ang Panihapon sa Ginoo. Kining okasyona maoy sa husto saulogon sa matag tuig sa Nisan 14. Sa 1988 ang Memoryal sa kamatayon ni Kristo maoy sa Biyernes, Abril 1. Ikaw ba atua didto?
PANGANDAM GIKINAHANGLAN SA TANAN
2 Ang pagplano gikinahanglan kon batonan ta ugaling ang bug-os nga kaayohan gikan niining labing sagradong adlaw. Unsang mga plano ang kinahanglanong himoon? Una, gikinahanglan tang sa atong kaugalingon magmaandam sa hunahuna. Ang maayo kaayong tabang niini mao ang espesyal nga pagbasa sa Bibliya alang sa semana sa Memoryal, ingon sa gitala sa atong kalendaryo ug niini nga Atong Ministeryo sa Gingharian. Gahinig panahon sa pagpamalandong samtang nagabasa ka, nga sa ingon nagaandam sa imong hunahuna ug kasingkasing alang niining espesyal nga okasyon.
3 Planoha nga makaabot sa Kingdom Hall nga mas sayo pa. Kini magpaarang kanimo sa pag-abiabi sa mga bag-ohan. Sa miaging tuig 294,712 dinhi sa Pilipinas ang nakatambong, nga maoy hapit tulo ka pilo sa gidaghanon sa atong mga magmamantala. Hayan mas daghan pa ang makatambong niining tuiga. Busa sa sayo nga pag-abot ug pag-abiabi niadtong mga bag-ohan o mga diregular, ikaw makahimo sa pagdasig kanila sa regular nga pagtambong sa umaabot.
4 Ang usa ka espesyal nga adlaw sa buluhatong pag-alagad sa kanataran kinahanglang planohon alang sa maong adlaw sa Memoryal. Kana maoy kalibotanong piyesta opisyal, nan nganong dili maghimog mga plano KARON sa paggugol ug panahon sa ministeryo? Maghimog mga balikduaw sa kanhing mga ginatun-an sa Bibliya, mga suskritor, ug uban pa nga basin motambong kon imong mapahinumdoman sila. Kon ang uban kinahanglang tabangan aron makatambong, maghimog mga kahikayan sa pagkuyog kanila.
KON UNSAY MAHIMO SA MGA ANSIYANO
5 Ang lawas sa mga ansiyano gustong mohatag pagtagad sa daghang detalye nga abante pa. Nagalakip kini sa unsa? Matikdi ang listahan nga anaa sa kahon sa panid 3.
6 Walay ubang miting nga himoon sa adlaw sa Memoryal. Ang bisan unsang mga tigom nga gieskedyol sa maong adlaw kinahanglang hikayon sa laing adlaw sa maong semana. Ibutang sa hunahuna, nga bisan tuod ang pakigpulong sa Memoryal mahimong sugdan nga sayosayo, ang pagpasa sa mga emblema dili buhaton hangtod human sa pagsalop sa adlaw.
7 Maoy maayo alang sa mga ansiyano nga pahibaloon nga abante ang mga igsoon sa pagduol sa mga bag-ohan kinsa motambong ug makig-ilaila kanila. Kon sila wala pay regular nga pagtuon sa Bibliya, hayan matanyagan sila niana. Paneguroang kuhaon ang ilang ngalan ug adres aron sundalon ang interes human sa Memoryal.
8 Ang Memoryal maoy espesyal nga okasyon alang kanatong tanan. Maoy panahon kini sa paghinumdom sa gugma ni Jehova pinaagig pagpadala sa iyang Anak ingong lukat, nga nagahatag kanatog higayon sa pagkadangat sa matarong nga pagbarog uban kang Jehova. Dili ta buot nga tugotan ang bisan unsang kalihokan sa dili pa o human sa Memoryal nga magbalda gikan ning maong balaang higayon.
[Kahon sa panid 3]
Mga Butang Andamon
(Tan-awang w85 2/15 p. 19; 8/15/85 p. 19 sa Cebuano)
1. Gipahibalo ba ang mamumulong sa hustong panahon ug dapit sa selebrasyon? Aduna ba siyay sakyanan?
2. Kinsa ang magtagana sa mga emblema?
3. Aduna bay kahikayan kon kinsa ang magdala sa mahinlong mantel ug sa gikinahanglang mga baso ug mga plato?
4. Unsang mga kahikayang gihimo sa paghinlo sa tigomanan?
5. Kinsa ang magmiting sa mga ‘attendant’ ug mga tigsilbi sa dili pa ang Memoryal aron repasohon ang ilang mga kaakohan? Kanus-a? Unsa man ang paagi aron mapaneguro nga ang tigpaminaw, mamumulong, ug ang mga tigsilbi sa hustong paagi masilbihan?
6. Unsang mga pahibalong himoon maylabot sa panahon ug dapit sa mga tigom alang sa pag-alagad sa kanataran sa adlaw sa Memoryal?
7. Kompleto ba ang kahikayan sa pagtabang sa mga tigulang ug baldadong mga igsoong lalaki ug babaye? May kahikayan ba sa pagsilbi sa dinihogan kinsa nasakit o dili makatambong?