Tabangi ang mga Bata sa Pagdayeg Kang Jehova
1 Sukad gayod sa pagluwat niini niadtong 1978, ang Akong Basahon sa mga Estorya sa Bibliya napamatud-an nga hinungdanong tabang ngadto sa mga ginikanan ug sa mga batan-on. Usa ka inahan nalipay kaayo sa dihang ang iyang siyam tuig-edad nga batang lalaki, kinsa sa miagi wala mahimuot sa paglingkod aron sa pagtuon, misulod sa balay ug mihangyo: “Nay, imo bang kuhaon alang kanako ang akong bag-ong basahon?” Kini maoy kinaiyanhon maylabot sa epekto sa Akong Basahon sa mga Estorya sa Bibliya nganha sa mga bata. Sa unsang paagi nga atong magamit kini nga mas bug-os pa sa pag-abag sa kabataan sa pagdayeg kang Jehova?
KON SA UNSANG PAAGI KINI MAHIMO
2 Ang Estorya sa Bibliya nga basahon magamit sa pagsilsil sa espirituwal nga mga hiyas diha sa mga hunahuna ug mga kasingkasing sa imong mga bata. Pananglitan, ang estorya 58 nagapasiugda sa mga hiyas sa kaisog ug pagsalig kang Jehova sa dihang naghisgot kini sa pag-atubang ni David sa Pelistinong higanteng si Goliat. (1 Sam. 17:45-51) Usahay ang mga bata kinahanglang mosagubang sa mga gumonhap nga maorag higante ngadto kanila. Kon ang mga ginikanan magpaandam sa mga anak nga abante pa sa panahon, ang mga batan-on makadayeg man sa ngalan ni Jehova nga maisogon bisan pa sa mga pagpit-os ug mga pagtental.—Prov. 22:6; tan-awang Genesis 18:19.
3 Mahimong sa personal ikaw wala ing batan-ong mga anak. Apan hayan makaarang ka sa pagduyog sa mga batan-on sa kongregasyon, nga nagabulig kanila sa pagdayeg sa ngalan ni Jehova. Ang Kristohanong mga batan-on mapalig-on ug mapalihok sa dihang ang tinudlong mga alagad sa kongregasyon maghupot ug personal nga interes kanila. (Prov. 27:23) Makagugol ka ba ug dugang panahon uban sa mga batan-on? Kini ilabinang makaayo kon tabangan ta sila diha sa pag-alagad sa kanataran.
PAGTANYAG SA BASAHONG ESTORYA SA BIBLIYA
4 Sa bulan sa Disyembre, atong itanyag ang Akong Basahon sa mga Estorya sa Bibliya. Ang mga batan-on mabuligan sa pagtanyag niini diha sa epektibong paagi sa pag-alagad sa kanataran. Sila mahimo ganing makasugod ug usa ka pagtuon diha niana.
5 Among gidasig kamong mga batan-on sa paghimog linaing panlimbasog sa Disyembre aron dayegon si Jehova diha sa inyong eskuwelahan. Sa pagbuhat niini nagakinahanglan ug kaisog, apan si Jehova mohatag kaninyo sa gikinahanglang kalig-on. Pangitag mga higayon sa pagpasinati sa inyong mga eskolmet uban sa Akong Basahon sa mga Estorya sa Bibliya.
6 Mga ginikanan, ensayoha ang pipila gisugyot nga mga presentasyon uban sa inyong mga bata. Abagi sila sa paggamit sa mga teksto diha sa Ulohan nga Mahisgotan. Ang mga batan-on ug mga tigulang makamatikod sa dihang ilang makita ang maayo-pagkaandam nga mga bata nga nagadayeg kang Jehova.
7 Ato usab nga ipakita sa atong mga anak ang bili sa paghupot ug maayong house-to-house records aron sila makahimog mga balikduaw kanilang nagapakitag interes. Padayong iatubang kanila ang tumong sa pagsugod ug mga pagtuon sa Bibliya sa balay. Basin gikinahanglang buligan mo sila sa pagdumala sa pagtuon sa dihang sila may usa nang masugdan.
8 Gusto tang ang atong mga batan-on mahimong mahiuban kanilang gihisgotan sa salmista kinsa miingon: “Ang tanang buhing butang—padayega kang Jah. Dayega si Jah, kamong katawhan!” (Sal. 150:6) Pag-ampo alang sa giya ni Jehova sa paghatag sa gikinahanglang tabang.