Pagtanyag sa Maayong Balita—Uban ang Kalipay
1 Si Jesu-Kristo nakakaplag ug kalipay sa iyang ministeryo. (Juan 4:34) Mao man usab, si Pablo mibatig kangaya gikan sa iyang buluhaton. Unsa man ang sekreto sa ilang pagbaton ug kalipay sa ministeryo bisan pa sa daghang kalisdanan ug paglutos? Ang ilang pag-alagad kang Jehova maoy tibuok-kalag. Sila nanikaysikay sa ilang hatag-Diyos nga mga asaynment, ug ang resulta mao ang kalipay tungod sa ilang mga paghago. (Juan 13:17; Pin. 14:13) Sa unsang paagi imong mapauswag ang imong kalipay sa ministeryo samtang magaalagad ka kang Jehova?
HUNAHUNAA SA PAAGING MAKATABANG SA MGA TAWO
2 Si Jesu-Kristo ug si Pablo maoy ekselenteng mga magtutudlo. Ilang gipunting ang pag-abot sa mga kasingkasing niadtong nagpatalinghog. Daghan ang wala mosanong, pero kadtong naminaw nahatagan gayod ug kalipay. (Filip. 4:1; itanding Lucas 15:7.) Oo, ang pagtabang sa mga tawo sa pagkakat-on kang Jehova ug sa pagtan-aw kanilang mobarog dapig sa kamatuoran magpalipay kanato.
3 Ikaw usab makatagamtam niining kalipaya pinaagig mahanasong pagpaambit sa imong nahibaloan sa uban. Ang organisasyon ni Jehova mitaganag ekselenteng mga himan sa pag-abag kanato samtang kita nagapanudlo sa uban. Sa dihang mangandam alang sa ministeryo, hunahunaa kon sa unsang paagi magamit mo ang mga sugyot gikan sa Atong Ministeryo sa Gingharian ug sa librong Nangatarongan aron tabangan silang anaa nagapuyo sa inyong dapit. Panlimbasog sa pagbulig sa mga tawo nga makasubay sa dalan sa kaluwasan pinaagig pagkaandam gayod sa pagsugod ug maayong mga panaghisgot uban kanila. Kana mahimong motultol ngadto sa mabungahong mga pagtuon sa Bibliya ug mas dakong kalipay sa atong pag-alagad.—Sant. 1:25.
POSITIBONG TINAMDAN
4 Ikaw man nagaalagad ingong magmamantala o payunir, hinumdomi ang katuyoan sa ministeryo. (Mat. 24:14; 28:19, 20) Ang pagsangyaw sa maayong balita alang sa pamatuod maoy asaynment nga gikan sa Diyos. Maoy usa ka pribilehiyo, ug kinahanglang pabilhan ta nga ang gipangayo ni Jehova sa iyang mga alagad dili mabug-at. (1 Juan 5:3) Gusto niya nga ang iyang katawhan magakalipay sa iyang buluhaton. Busa, bisan tuod ang uban dili mosanong nga mauyonon sa buluhatong pagsangyaw, ikaw sa gihapon makabaton ug dakong kangaya diha sa ministeryo. Nganong ingon man niini?
5 Ang punto nga ikaw nagabuhat sa kabubut-on sa Diyos kinahanglang magpalipay gayod kanimo sanglit kay ang “imong paghago dili man makawang may kalabotan sa Ginoo.” (1 Cor. 15:58) Si Jehova “dili kay dili matarong aron kalimtan ang imong paghago ug ang gugma nga imong gipakita alang sa iyang ngalan.” (Heb. 6:10) Ang pag-alagad kang Jehova nga tibuok-kalag maoy tuboran sa kalipay.—Sal. 40:8.
6 Ang usa ka Kristohanon kinahanglang magakalipay sa iyang pag-alagad sa Diyos. Padayong kaplaga ang kangaya sa ministeryo, nga masaligon nga si Jehova nagapabili bisan sa labing gamayng buhat sa dalisay nga debosyon. (Itanding Marcos 12:41-44.) Hinaot ang tanan kanato magapadayon sa ‘paghimaya sa atong ministeryo’ ug magatagamtam sa kangaya nga dad-on niana.—Roma 11:13.