Ipasundayag ang Gugma sa Diyos ug sa Silingan
1 Sa pagtubag sa pangutana: “Magtutudlo, hain man ang labing dakong sugo diha sa Kasugoan?” Si Jesus miingon: “‘Kinahanglang higugmaon mo si Jehova nga imong Diyos uban sa imong tibuok nga kasingkasing ug sa imong tibuok nga kalag ug sa imong tibuok nga hunahuna.’ Kini ang labing dako ug unang sugo. Ang ikaduha, sama niana, mao kini, ‘Kinahanglang higugmaon mo ang imong silingan sama sa imong kaugalingon.’”—Mat. 22:36-39.
2 Ang dulot nga gugma ni Jesus alang sa Diyos maoy dayag sa miingon siya: “Ang akong pagkaon mao ang pagbuhat sa kabubut-on kaniya nga nagpadala kanako ug sa paghuman sa iyang buluhaton.” (Juan 4:34) Ang iyang gugma sa silingan nagtukmod kaniya sa pagsangyaw sa maayong balita sa Gingharian sa Diyos uban ang kasibot. Siya usab mihimog mga buhat sa pag-ayo sa mga sakit. Ug pagkalabaw gayod nga pasundayag sa gugma nga nabutyag sa dihang iyang gihatag ang iyang kinabuhi ingong lukat alang sa katawhan! Sa unsang paagi atong masundog si Jesus sa pagpasundayag ug gugma sa Diyos ug sa silingan?
KON SA UNSANG PAAGI IPASUNDAYAG ANG GUGMA
3 Ang pagtug-an sa uban sa maayong balita sa Gingharian maoy usa ka dakong paagi sa pagbuhat niini. Ang mga tawo kinahanglang mahatagan ug paglaom ug impormasyon aron tabangan sila sa pagsagubang niining makuyaw nga mga panahon. (2 Tim. 3:1) Ang atong pagtuo diha sa Gingharian magpalihok gayod kanato sa paghatag sa tanan sa kahigayonan sa pagpatalinghog sa kamatuoran. Ang pagsulti sa kamatuoran maylabot sa Gingharian nagapasidungog kang Jehova. Aduna ba kita ing gugma nga sama niana alang sa Diyos ug sa silingan? Kita ba nagapahimulos sa tanang kahigayonan sa pagpamatuod sa impormal nga paagi ngadto sa mga paryente, mga silingan, ug sa uban? Kita ba bug-os nga nagapakig-ambit sa pagsangyaw sa Gingharian diha sa kabalayan?
4 Ang uban mibati nga sila lamang nga edukado kaayo maoy takos sa pagdala sa maong importanteng mensahe. Hinunoa, ang importante mao ang atong pagsalig kang Jehova. (Luc. 11:13; 1 Cor. 1:26, 29, 31) Ang gugma sa Diyos ug sa silingan moabag kanato sa pagbuntog sa negatibong mga pagbati ug makakaplag ug tinuod nga kalipay diha sa ministeryo. Kon atong amgohon nga kita nagabulig sa mga tawo kinsa “niwang ug nagkatibulaag nga samag mga karnero nga walay magbalantay,” kita dili na kaayo mabalaka bahin sa atong kaugalingon.—Mat. 9:35, 36.
KON SA UNSANG PAAGI MAKAAMBIT SA ABRIL
5 Sa Abril kita aduna gayod ing linain maayo kaayong higayon sa pagpatugbaw sa atong gugma sa Diyos ug sa silingan pinaagig bug-os nga pakig-ambit diha sa ministeryo ug usab sa pag-abag sa mahuyang ug bag-ohan pa nga makaambit sa pagwali. Dugang pa kita magtanyag sa usa ka tuig nga suskrisyon sa Ang Bantayanang Torre sa amot nga ₱60.00. Ang mga gula sa Abril nasudlan sa impormasyon nga nagyagyag sa Bantogang Babilonya, nga makatabang gayod sa daghan sa paghimo sa ilang desisyon nga mogula gikan kaniya. Ang bag-ong Ulohan nga Mahisgotan nagapasiugda sa mga paghukom ni Jehova batok kaniya. Samtang kini maoy kusganong mensahe, kini nagapatugbaw sa tinuod nga gugma ngadto kanilang “nagapanghupaw ug nagaagulo” tungod sa pagkadaotan diha sa kalibotan gumikan sa ilang matarong nga mga kasingkasing.—Exeq. 9:4; Pin. 18:4.
6 Hinaot ang tanan kanato manlimbasog sa pagpasundayag sa atong gugma sa Diyos ug sa silingan pinaagig pagmantala sa Gingharian ni Jehova sa tanang higayon sulod sa bulan sa Abril!