Pag-alagad Uban ang Bug-os Kasingkasing
1 Gipahimutang ni David ang maayong panig-ingnan sa pag-alagad kang Jehova uban ang bug-os kasingkasing. Ang iyang ehemplo nakaapektar sa interong nasod sa Israel. Maoy uban sa kompletong kasingkasing nga sila usab mihimog kinabubut-ong mga halad alang sa pagtukod sa templo ni Jehova. Si David miampo nga kini unta mao ang ilang hilig “ngadto sa panahong walay tino.”—1 Cron. 29:9, 18.
2 Ngano ang pag-alagad kang Jehova uban sa bug-os kasingkasing hinungdanon kaayo karon, maingon gayod sa karaang Israel? Sa yanong pagkasulti, si Jehova nagauyon kanilang nagaalagad kaniya uban ang kompletong kasingkasing. Ang manalagnang Hanani misulti kang Haring Asa: “Mahitungod kang Jehova, ang iyang mga mata nagadalagan ngadto-nganhi latas sa tibuok yuta aron sa pagpakita sa iyang pagkamakusganon alang kanila kansang kasingkasing maoy hingpit ngadto kaniya.”—2 Cron. 16:9.
SUPORTAHI ANG BULUHATON SA GINGHARIAN
3 Kita makaalagad uban ang bug-os kasingkasing karon pinaagig pagsuportar sa buluhatong pagsangyaw sa Gingharian sa tibuok kalibotan. (Mat. 24:14) Ang paghatag ug suportar sa panalapi importante man, apan ang paggamit sa atong kusog, panahon ug mga katakos sa pagpakaylap sa maayong balita aduna pa ing mas dakong bili. (2 Cor. 9:7) Ikaw ba nagatagamtam sa kangaya nga nagasumikad sa pag-alagad uban ang kompletong kasingkasing diha sa dakong buluhaton ni Jehova?
4 Sa Agosto kita gipalig-on nga mohisgot sa kagamhanan nga mopatunghag paraiso, nga nagatanyag sa ‘brochure’ nga Kagamhanan ngadto sa katawhan. Samtang ang kabangis nagauswag sa tibuok kalibotan, ang mga tawo dugang nagakabalaka bahin sa kalinaw ug kasegurohan ug sa maayong gobyerno. Aduna kita ing kahigayonan sa pagtultol sa mga maaghop ngadto sa Gingharian ingong bugtong tinubdan sa matuod nga kalinaw ug kasegurohan.
IKAW BA MAKAPAYUNIR SA DI-MADUGAY?
5 Imo bang mapauswagan ang imong panahon sa pag-alagad sa kanataran sulod sa Agosto, tingali nagaalagad ingong katabang nga payunir? Pinaagig pagpauswag sa imong kalihokan sa kanataran ikaw sa di-madugay makaarang man nga mahimong takos alang sa buluhatong regular payunir.
6 Karon nga talitapos na ang tuig sa pag-alagad, daghan ang nagapanlimbasog sa pagpauswag sa ilang pag-alagad sa kanataran uban sa tumong nga mahimong mga regular payunir sa pagsugod sa bag-ong tuig sa pag-alagad sa Septiyembre. Imo ba kanang gihunahuna? Imo bang mapasibo ang imong eskedyol aron mahimong usa ka regular payunir? Ikaw ba mahinangop sa pagpayano sa imong paagi sa kinabuhi, kon gikinahanglan, aron makabaton ug dugang panahon alang sa buluhaton ni Jehova? (Mat. 6:22) Kon buot gayod nimo nga buhaton kana ug ang payunir nga pag-alagad imo mang maarangan, duola si Jehova diha sa pag-ampo ug pangayoa ang iyang tabang ug pagtultol. (Prov. 16:3) Pakigsulti sa mga ansiyano bahin sa imong mga kalaoman alang sa buluhatong regular payunir. Kon imong makita nga ang imong mga kahimtang magpatugot kanimo sa pagkahimong regular payunir, paneguroang itunol dayon ang imong aplikasyon, o sa labing menos 30 ka adlaw sa dili pa ikaw buot mosugod niana. Ang pagsugod sa bag-ong tuig sa pag-alagad maoy maayo kaayong panahon sa paghimo sa imong desisyon sa pagpayunir kon ang imong mga kahimtang motugot niana.
7 Batan-on o tigulang, hinaot ang tanan kanato magpakita nga kita nagaalagad kang Jehova uban ang bug-os kasingkasing. Dili ta gayod tugotan nga mabahin ang atong kasingkasing. (Mar. 12:30) Ang atong masibotong pagpaluyo sa buluhatong pagsangyaw sa Gingharian motabang kanato sa paghupot kanunay sa bug-os nga kasingkasing ngadto kang Jehova.