Ang Ulohan nga Mahisgotan
1 Ang Mayo, 1977 nga Atong Pag-alagad sa Gingharian nagpaila sa bahin nga “Ulohan nga Mahisgotan” ug mihatag mga sugyot kon sa unsang paagi magamit kana nga epektibo. Kitang tanan nakabenepisyo gikan niining bahina sulod sa miaging 12 ka tuig. Nakabulig kini sa daghan sa pagpauswag sa ilang pagkaepektibo sa pagtanyag sa maayong balita.
2 Sa miaging pipila ka katuigan, ang usa ka bag-ong Ulohan nga Mahisgotan gibutyag sa matag tulo o upat ka bulan. Sa umaabot, mas masubsob nga pulihan sa Atong Ministeryo sa Gingharian ang sinugyot nga Ulohan nga Mahisgotan. Sa kasagaran, aduna ing laing topiko sa matag panahon nga ginausab ang tanyag sa basahon. Kini moabag kanato sa paghimog mas hanoy nga pagdugtong gikan sa atong Kasulatanhong presentasyon ngadto sa tanyag sa basahon. Magpadugang kini usab ug mas dakong paglainlain ngadto sa atong ministeryo.
KAPILIANG ULOHAN NGA MAHISGOTAN
3 Sa kasagaran, imong makaplagan nga ang pasukaranang sinugyot nga Ulohan nga Mahisgotan magamit man diha sa kada ganghaan. Apan, walay si bisan kinsa ang magduhaduha sa pagpahiangay sa ulohan o sa paggamit sa laing topiko kon daw makaayo ang paghimo niana. Siyempre, sa dihang nagabansay sa bag-ohan o mga batan-on, hayan mapuslanon nga suod nga sundon ang sinugyot nga Ulohan nga Mahisgotan.
4 Ang mga payunir, maingon man sa tanan nga kanunayng nagakobre sa ilang teritoryo, sa walay duhaduha makakaplag nga makatabang sa paggamit ug mga paglainlain sa sinugyot nga ulohan aron dili mahimong naandan na lamang ang ilang presentasyon. Ang lainlaing mga hitabo magpahimo nianang kinahanglanon usahay sa paggamit sa usa ka topiko nga lahi gikan sa gisugyot diha sa Atong Ministeryo sa Gingharian.
GIGIKANAN SA MATERYAL PARA SA MGA PRESENTASYON
5 Sa dihang bation ta ang panginahanglan nga lainlainon ang Ulohan nga Mahisgotan, hain nato makuha ang ubang ideya nga magamit? Makatabang ang miaging mga gula sa Atong Ministeryo sa Gingharian. Ang basahon mismo nga imong igatanyag usab magamit man ingong gigikanan sa imong ulohan nga mahisgotan. Pilia ang usa ka hulagway, usa ka teksto, o usa ka tema sa kapitulo ug paghimog mubong presentasyon aron pukawon ang interes. Sulaying pakuptan sa tagbalay ang basahon aron iya kanang makita mismo. Hayan mahibulong ka sa pagkakita nga sayon lang ang pagpahimutang niining paagiha. Sa ulahi, sa dihang himoon ang balikduaw, ikaw makahisgot man ug dugang detalye niana. Busa himoang may pagkamubo ang unang presentasyon.
6 Ang tanan kanato padayon gayong mohangyo kang Jehova “sa dila sa mga tinun-an” aron mahibalo kita sa paagi sa pagtudlo niadtong atong mahibalag sa atong mga teritoryo. (Isa. 50:4) Maoy atong tim-os nga tinguha sa paggamit sa Ulohan nga Mahisgotan sa epektibong paagi. Ang mga kinabuhi nameligro.—1 Tim. 4:16.