Ikaw ba Nagapugas nga Madagayaon?

¹ Si apostol Pablo miingon sa 2 Corinto 9:6: “Siya nga nagapugas nga tagidiyot magaani usab nga tagidiyot; ug siya nga nagapugas nga madagayaon magaani usab nga madagayaon.” Kini ilabinang tinuod sa atong pagsimba. Kon dugang pang panahon ug panikaysikay ang atong gigugol sa pagpangandam sa mga tigom ug pagsangyaw sa mensahe sa Gingharian, sa dugang pa nga kita motubo sa espirituwal. Apan kon kita daginotan o taphaw diha sa atong ginabuhat, ang atong pag-uswag mas hinay. Ikaw ba nagapugas nga madagayaon?

² Personal nga Pagtuon sa Bibliya: Aron mahimong mabungahong mga ministro, kinahanglang una kitang magapugas nga madagayaon sa atong personal nga pagtuon. (Sal. 119:97, 105; Mat. 5:3) Tungod sa tanang kabalaka sa adlaw-adlawng kinabuhi, gikinahanglan ang panikaysikay aron magmatinguhaon sa atong espirituwal nga panginahanglan. Sagad kini nagakinahanglan “nga magapalit sa nahiangayng panahon.” (Efe. 5:16) Ang pipila mobangon ug mas sayo sa tinong mga adlaw o maggahin ug pipila ka gabii aron himoon ang personal nga pagtuon. Sa unsang paagi kita magaani nga madagayaon? Atong mabatonan ang mas malig-ong pagtuo, mas masanag nga paglaom, ug mas malipayong kahimtang sa hunahuna.​—Roma 10:17; 15:4; 1 Ped. 1:13.

³ Mga Tigom sa Kongregasyon: Sa Salmo 122:1, si David miingon: “Nalipay ako sa pag-ingon nila kanako: ‘Mangadto kita sa balay ni Jehova.’” Susama ba ang imong gibati? Ang pagpugas nga madagayaon nagapasabot ug makanunayong pagtambong sa atong lima ka senemanang panagkatigom. Bug-osa ang imong hunahuna nga dili nimo tugotan nga mabalda sa dili maayong panahon. Kon dugang pang mga kababagan ang atong mabuntog, mas dako ang atong mga panalangin.

⁴ Moabot nga sayo ug pakig-ambit sa makapalig-ong panaghisgot uban sa atong mga igsoon. Pangandam pag-ayo alang sa Pagtuon sa Bantayanang Torre aron nga makapugas ka nga madagayaon pinaagig pagkomento. Pinaagig “dagayang pagbisibis” sa uban diha sa mga tigom, ikaw usab “dagayang mabisibisan.”​—Prov. 11:25.

⁵ Ministeryo sa Kanataran: Kon dugang panahon ang atong gigugol diha sa ministeryo sa kanataran, hayan dugang pa nga kita makaani ug makapainteres nga mga kasinatian, mabungahong mga balikduaw, ug mauswagong mga pagtuon sa Bibliya.

⁶ Ang pagpugas nga madagayaon nagakahulogan ug pagpauswag sa kalidad ingon man sa gidaghanon. Ang usa ka ekselenteng tabang sa pagpauswag sa kalidad sa atong ministeryo mao ang librong Nangatarongan. Ang mga panid 9-15 nagalista ug kapin sa 40 ka pasiuna nga nagakobreg 18 ka ulohan aron pagtabang sa pagpukaw sa interes diha sa mga pultahan. Kon ikaw makakaplag ug interes, paneguroang mobalik ug aniha ang mga bunga sa imong pagpugas. Sa pagkamalaomon ang imong mga panikaysikay motultol ngadto sa usa ka pagtuon sa Bibliya.

⁷ Kon kita magapugas nga madagayaon, atong madahom ang mas dakong mga panalangin gikan kang Jehova.​—Mal. 3:10.