1995 “Malipayong mga Magdadayeg” Distritong Kombensiyon
1 Pila ba ang atong mga katarongan aron mahimong malipayon? Hayan dili daghan kanato ang nakasulay sa pagtala sa tanan niana. Bisan nagakinabuhi sa magubtanong kalibotan ug walay kasegurohan, kita adunay daghan kaayong katarongang magmalipayon. Busa, “Malipayong mga Magdadayeg” maoy haom nga tema alang sa 1995 distritong mga kombensiyon.
2 Kita nagadayeg kang Jehova tungod kay iya kitang gitudloan sa kamatuoran. (Isa. 54:13; Juan 8:32) Sa baylo, malipayon kitang nagapaambit sa kamatuoran ngadto sa tanan kinsa nagapangita sa kasegurohan ug kalipay. (Ezek. 9:4; Buh. 20:35) Ang atong Kristohanong panag-igsoonay usab nagatagana kanatog katagbawan ug kalipay. Kana maoy pipila lamang sa mga katarongan alang sa atong kalipay nga magtukmod kanato sa pagdayeg kang Jehova. Ang mga pakigpulong ug mga demonstrasyon sa kombensiyon magdani sa atong pagtagad sa dugang Kasulatanhong mga katarongan alang sa kalipay niining magubtanong kataposang mga adlaw.
3 Tulo-ka-Adlaw nga Kombensiyon: Nakahimo ka na ba sa mga kahikayan uban sa imong agalon nga dili usa motrabaho aron makatambong sa tibuok tulo ka adlaw sa kombensiyon? Asa man ang kinadul-ang kombensiyon alang kanimo? Sa kataposan niining suplementoha mao ang listahan sa mga petsa ug mga dapit alang sa 43 ka kombensiyon sa Pilipinas.
4 Ang programa magsugod sa Biyernes sa alas 8:30 s.b. ug matapos sa Dominggo sa alas 3:50 s.h. Sa Sabado, ang programa magsugod sa alas 8:30 s.b., ug sa Dominggo kini mosugod sa alas 9:00 s.b.
5 Ikaw ba Motambong?: Kita gidasig sa dili pagsipyat sa bisan usa ka adlaw o usa ka programa sa kombensiyon. Ngano man kana? Buot ni Jehova nga kita atua didto. Karong adlawa ang atong pagtuo ug espirituwal nga kahimsog maoy ilalom sa grabeng pag-ataki. Si Pablo nagtambag nga “dili talikdan ang atong panagkatigom” sa panahong ang mga Kristohanon sa Judea nakasinati ug dakong pagpit-os. (Heb. 3:12, 13; 10:25) Ang mga taga-Filipos nagkinabuhi “taliwala sa baliko ug lubag nga kaliwatan.” Apan, sila “nagasidlak ingong mga magbabanwag sa kalibotan.” (Filip. 2:15) Nganong kining unang-siglong mga Kristohanon lahi? Tungod kay sila masinundanong mituman sa direksiyon sa balaang espiritu sa panagkatigom “aron sa pagpasibot sa paghigugma ug sa maayong mga buhat.”—Heb. 10:24.
6 Ang impluwensiya sa kalibotan mahimong sa lipot makapahuyang sa atong tinguha sa pakigtambayayong sa atong mga igsoon ug sa pagdayeg kang Jehova. Ang kalibotan nagahaylo sa mga tawo nga mahimong independente sa hunahuna. Si Jehova nagbansay kanatong dili mahisama sa kalibotan. Busa mapainubsanon kitang magpailalom sa espiritu ni Jehova ug malipayong makigtambayayong sa atong mga igsoon sa pagpahimulos sa tibuok programa sa kombensiyon. Kita ba determinado nga makatambong uban ang atong entirong pamilya? Sa regular nga paagi, kinahanglang mapalig-on nato ang atong gugma ug pagtuo. Kining mga hiyasa dili permanente human makab-ot apan sama sa buhing mga butang magatubo kon pakan-on sa espirituwal o malawos ug mamatay kon pagutman.
7 Dal-a sa Balay ang Usa ka Bahandi: Unsaon nimo pagkab-ot ang daghan gayong kaayohan gikan sa kombensiyon? Ang tubag maoy pinaagig “pagpatalinghog pag-ayo.” Kini dili sayon niining tulin-nagalihok nga sosyedad karong adlawa. Ang malagsik nga mga batan-on hayan malisdan sa pagpatalinghog pag-ayo, apan kini usa ka hagit nga atubangon natong tanan sa dihang magatambong ug distritong kombensiyon. Atong makaplagan nga mas sayon ang pagpaminaw pag-ayo kon atong pangutan-on ang atong kaugalingon, ‘Unsa man ang tema sa kombensiyon?’ Magpalandong niana! ‘Ngano mang motambong ko ug unsa man ang akong buhaton sulod sa tulo ka adlaw? Ang ako bang mga gabii mapuno sa mga lulinghayaw, o naeskedyul ba nako ang igong panahon alang sa pagpahulay ug pagrepaso sa dagkong mga puntos sa kombensiyon?’
8 Ang Agosto 1, 1984, Bantayanang Torre nga artikulong “Nagapalandong Ka ba Kun Nagahanduraw Lamang?” (Pebrero 1, 1984 sa Ingles) nagatanyag ug pipila ka sugyot kon unsaon sa pagkab-ot sa daghan gayong kaayohan gikan sa usa ka tigom ug kini miingon: “Ang pagdisiplina sa hunahuna hayan mao ang labing hinungdanong butang.” Sa dihang magsugod na ang mamumulong, kita kasagaran mapatalinghogon, apan tingali sa tungatunga sa pakigpulong, ginatugotan nato ang atong hunahuna nga “maglaroy-laroy.” Unsaon natong mapugngan kini nga mahitabo”
9 Sulayi nga magpahulay nga igoigo matag gabii. Kini dili kanunayng sayon, apan ang maayong pagplano kasagaran magpaarang kanimo sa pagbaton sa gikinahanglang pahulay.
10 Ang pagkuhag mubong mga nota napamatud-ang makatabang sa pagpaminaw pag-ayo. Kon imong sulayan ang pagsulat sa daghan kaayong impormasyon, ang pipila ka hinungdanong butang hayan malaktawan sa bug-os. Agig sugyot, pagkuhag mga nota uban sa tumong nga ikapresentar ang sumaryo sa programa ngadto sa usa ka ginatun-an sa Bibliya o ngadto sa usa ka baldadong magmamantala. Pinaagi sa pagkuhag mga nota ug pagpaambit sa imong napatalinghogan, dili nimo daling malimtan ang impormasyon. Ang pagpadayag mopauswag sa paghinumdom.
11 Maoy haom ang paghatag ug malulotong pahinumdom bahin sa mga kamera ug mga himan sa pagrekord. Kon ikaw makahukom man sa pagkuhag mga hulagway o magrekord sa mga bahin sa programa pinaagig camcorder o audiocassette recorder maoy usa ka personal nga butang. Apan, ang tanan maong himan kinahanglang gamiton sa paagi nga dili makabalda sa uban o makapugong kanimo sa pagpahimulos gikan sa programa. Human ka makapauli sa balay, aduna bay panahon sa pagrepaso sa maong mga rekording? Hayan imong makaplagan nga ang pagkuhag mga nota bastante na.
12 Pagkobre sa mga Galastohan: Bisan tuod wala nay pagkaon nga itagana, aduna gihapoy dakong galastohan ang nalambigit sa abangan sa pasilidad sa kombensiyon, maingon man sa mga himan sa publikong pagpakigpulong nga gitagana sa Sosyedad. Unsaon man pagkobre niining mga galastohana? Pinaagi sa atong boluntaryong mga amot, nga una pa ngadto sa komite sa kombensiyon o diha sa kombensiyon mismo pinaagi sa accounts department o sa mga kahon sa donasyon. Kini uyon sa Salmo 96:8 ug sa 2 Cronicas 31:12.
13 Malipayong mga Magdadayeg Nagapasidungog Kang Jehova Pinaagig Diyosnong Panggawi: Sa miaging tuig ang makapadasig nga mga komento bahin sa atong panggawi nadawat gikan sa mga kawani sa hotel ug mga empleyado sa mga pasilidad sa kombensiyon. Usa ka manedyer sa hotel miingon: “Kanunay nga ikalipay ang pagdawat sa mga Saksi tungod kay sila mapailobon ug matinabangon ug suod nga nagabantay sa ilang kabataan.”
14 Buot nato nga ang tanang taho maoy susama, apan ikasubo, kini dili tinuod. Usa ka tsirman sa kombensiyon nakapaniid: “Human sa mga sesyon, daghan sa mga tin-edyer nanagtapok nga dinaghan sa mga agianan [sa hotel] sa lalom nang kagabhion, banha nga nangatawa ug nanagsinggit. Kini nakadisturbo sa ubang mga bisita . . . , kinsa dayag nga napalagot.”
15 Laing problema nga nagpabilin sa mga katuigan mao ang daghang igsoong managtapok diha sa mga agianan ug sa gawas sa awditoryum sa panahon sa mga sesyon. Sa usa ka kombensiyon sa miaging tuig, usa ka nota gikan sa usa ka estudyante sa Bibliya nakaplagan sa contribution box. Kini mabasa: “Wala pa gayod ako sukad makurat sa hilabihan nga kabanha, linihokan, pag-estoryahay, ug dili tukmang kagawian diha sa mga agianan sa panahon sa mga pakigpulong . . . Ako dili pa usa ka Saksi, usa nga nagatuon pa lamang ug nagakat-on sa diyosnong kahadlok ug pagtahod.” Unsay atong bation kon kini nga estudyante sa Bibliya moundang sa pakig-uban tungod sa dili matinahorong panggawi sa pipila?—Mat. 18:6.
16 Sa tanang higayon kinahanglan natong pangutan-on ang atong kaugalingon: ‘Kinsa ang akong girepresentahan, ug ngano mang nagatambong ko niining kombensiyona?’ Ang atong espirituwalidad mabanaag diha sa atong sinultihan, panggawi, ug pagpabili sa espirituwal nga mga tagana. (Sant. 3:13; 1 Ped. 2:2, 3, 12) Ang mga igsoon sa kayutaan nga nag-agwanta sa katuigan sa mga pagpiot ug mga pagbando kasagaran mas labaw pang mapatalinghogon ug matinahoron diha sa mga kombensiyon, nga nagpabilin sa ilang mga lingkoranan ug naminaw pag-ayo.
17 Ang Imong Sinina ug Pamostura Maghatag ug Mensahe: Diha sa 1 Samuel 16:7, kita gipahinumdoman nga “ang tawo nagatan-aw kon unsa ang makita sa mga mata; apan alang kang Jehova, siya makakita kon unsa ang kasingkasing.” Busa, ang katawhan kasagaran magahukom kanato pinasukad sa atong dagway. Ang atong sinina ug pamostura mailalom sa suod nga pag-usisa, ilabina sa panahong kita magatambong ug usa ka kombensiyon alang sa pagsimba ug pagtudlo sa Kristohanong pagkinabuhi. Kon ikaw usa ka batan-on nga nagaeskuyla o kon ang imong sekular nga trabaho nagabutang kanimo sa suod nga kontak sa mga tawo kinsa nagasunod sa kalibotanong mga estilo, mahimong usa ka hagit ang pagtapot sa Kristohanong mga sukdanan alang sa kasarangan nga paninina.
18 Ang mga sukdanan sa sinina ug pamostura nagakalainlain sa tibuok kalibotan. Ang mga Kristohanon gidahom nga magsul-ob ug kasarangan, mahapsay nga mga sapot. Kinsa ang kinahanglang magtino niini? Ang mga ginikanan kinahanglang magaseguro nga ang ilang tin-edyer nga kabataan dili magsinina sama sa kalibotanong kabataan diha sa eskuylahan. Alang sa kadaghanan, ang estilo sa sinina maoy personal nga desisyon. Ang mga giya ginatagana sa pagtabang kanato sa paghimog maayong mga desisyon niining butanga. Among gidasig ang pagrepaso sa Pebrero 8, 1987, Awake! nga artikulong “What Do Clothes Mean To You?” Unsa man ang naobserbahan sa pipila sa atong mga kombensiyon sa miaging tuig?
19 Human sa usa sa “Diyosnong Kahadlok” Distritong mga Kombensiyon, among nadawat kini nga obserbasyon: “Ang mga igsoong lalaki ug mga babaye miuswag ug dako sa ilang mga paninina, pamostura, ug panggawi diha sa kombensiyon niining tuiga. ... Aduna pay pipila ka ... batasan nga nanginahanglan ug dugang pag-uswag, hinuon.” Human sa laing kombensiyon gikataho nga ang di-kasarangan nga sinina daling namatikdan. Ang report naghisgot nga pipila sa mga tagagawas nga nagtambong nakamatikod usab sa maong di-kasarangan nga sapot. Ang sinina sa pipila maoy madayganon kaayo ug hilabihan ka piit.
20 Ang kadaghanan sa mga igsoong lalaki ug babaye nagasul-ob ug ligdong nga sapot diha sa dapit sa kombensiyon. Sa ulahi, hinuon, sa mga hotel o sa mga restawran, ang pipila sa mga igsoong lalaki ug babaye, nga nagataod pa sa ilang mga badge, nakasul-ob ug “di-ligdong nga mga sando, daang mga maong, mga shorts . . . ug usong mga sapot nga dili angay sa katawhan sa Diyos.” Kon ang mga ansiyano makamatikod nga ang uban adunay kiling sa pagsinina niining paagiha sa panahon sa mga lulinghayaw, maoy maayo ang paghatag ug maluloton apan malig-ong tambag sa dili pa ang kombensiyon nga ang maong sinina dili haom, ilabina ingong mga delegado nga nagatambong ug usa ka Kristohanong kombensiyon. Palihog repasoha uban sa mga ginatun-an nimo sa Bibliya nga motambong sa kombensiyon ang mga giya sa panggawi ug paninina nga gilaraw sa itaas.
21 Paghupot sa Atong mga Palibot nga Hinlo: Daghan ang nakakomento sa kahinlo sa katawhan ni Jehova diha sa mga kombensiyon. Atong huptan kanunay kining hataas nga sukdanan, dili sa pagsalibay sa papel, mga putos sa kendi, o ubang mga sudlanan, sa salog. Ang mga ginikanan kinahanglang magatudlo sa ilang kabataan sa dili pagsalibay sa mga putos nga papel sa salog. Sa dili pa mamauli sa gabii, lantawa ang palibot sa imong lingkoranan ug punita ang bisan unsang mga basurang nagpasad sa palibot ug ibutang kini sa tukmang sudlanan sa basura o kaha dalhon kini sa balay aron didto mahipos. Sama nga ato gayong ginahuptang hapsay ug hinlo ang atong Kingdom Hall, himoon nato ang ingon niini sa atong mga pasilidad sa kombensiyon.
22 Sekular nga Trabaho: Kita motambong sa kombensiyon aron sa pagkuhag espirituwal nga pagkaon. Busa dili kana panahon sa paghunahuna ug ginansiya sa salapi o pagbaligya ug mga butang alang sa personal nga kaayohan pinaagig pagpahimulos sa dakog panon sa manambong. Sa makausa pa buot namong pahinumdoman ang tanan nga walay baligya sa personal nga mga gamit ang tugotan sulod sa mga nataran sa kombensiyon, ug ang mga gamit lamang sa Sosyedad ang tugotan diha sa bookroom o ubang mga departamento sa kombensiyon.
23 Mga Himan sa Rekording: Palihog hinumdomi, kon ikaw nagaplano sa paggamit ug mga camcorder o bisan unsang matang sa himan sa pagrekord, ipakita ang konsiderasyon sa palibot nimo. Ang paglibotlibot sa panahon sa mga sesyon o bisan pagrekord gikan sa imong lingkoranan mahimong makabalda sa uban. Walay mga himan sa rekording sa bisan unsang matang ang ikonektar ngadto sa elektrikal o mga sound system sa kombensiyon, ni ang mga himan makaali sa mga agianan.
24 Lingkoranan: Sa 1994 “Diyosnong Kahadlok” Distritong Kombensiyon, imo bang namatikdan ang kauswagan maylabot sa pagreserbag mga lingkoranan? Adunay pipila ka pag-uswag ang nahimo, apan padayong gikinahanglan nga magmahunahunaon niining pahinumdoma: MGA LINGKORANAN IKARESERBA LAMANG SA SUOD NGA MGA MEMBRO SA IMONG PAMILYA UG SI BISAN KINSA NGA NAGABIYAHE UBAN KANIMO SA IMONG SAKYANAN. Atua kita didto ingong mga dinapit sa Sosyedad. Ang abangan sa awditoryum gibayran pinaagig boluntaryong mga amot. Mahigugmaon ba ug pagpakitag konsiderasyon ang pagreserbag lingkoranan nga dili nato tino nga malingkoran?
25 Adunay mga paningkamot ang matag kombensiyon sa pagtagana alang sa mga tigulang ug mga baldado sa pisikal. Palihog dili molingkod sa mga seksiyon nga gireserba alang kanila kon ikaw dili takos niana. Usab, magmaabtik sa pagtabang sa mga baldado sa pagpangita ug lingkoranan kon wala silay kauban nga responsable sa pag-atiman nila.
26 Pag-atiman sa Imong mga Panginahanglan sa Pagkaon: Sa imo nang nahibaloan, ang suplemento sa Mayo 1995 Atong Ministeryo sa Gingharian nagpahibalo: “Sugod sa 1995 nga distritong mga kombensiyon ug sa Septiyembre 1995 nga sirkitong mga asembliya ug espesyal nga mga adlawng asembliya, wala nay pagkaon nga itagana. Ang matag usa magdala sa iyang kaugalingong pagkaon ug mainom.” Dayon ang suplemento nagsaysay kon nganong kining kausabana gihimo ug naghatag ug mga sugyot ko sa unsang paagi ang matag usa makaatiman sa iyang kaugalingong mga panginahanglan sa pagkaon ug ilimnon diha sa kombensiyon. Palihog repasoha ang suplemento uban sa bisan kinsang mga estudyante sa Bibliya nga nagaplanong motambong aron ilang mahibaloan nga kinahanglan silang magdala sa ilang kaugalingong pagkaon ug ilimnon ngadto sa kombensiyon.
27 Aron gayod ipasiugda ang pipila ka hinungdanong puntos, buot mong hinumdoman kining gisugyot nga mga butang nga dalhon alang sa pahulay sa udto: gaan, yano, ug makapahimsog nga kan-onon sama sa kasagarang ginabalon sa mga tawo sa trabahoanan. Ang mga ilimnon hayan maglakip sa kape, soft drinks, fruit juices, o binotelyang tubig, sa di-mabuak nga sudlanan o thermos. Kon gikinahanglan ang gagmay nga mga cooler, kini mauyonan kon kini maigo duol sa imong lingkoranan ug dili makadisturbo kanilang duol nimo. Apan, kinahanglang walay dagko family-size picnic coolers, alkoholikong ilimnon, o mga sudlanang bildo ang dal-on ngadto sa pasilidad sa kombensiyon. Ang pagkaon sa panahon sa mga sesyon sa programa kinahanglang likayan. Kini maoy pagpakita ug walay pagtahod alang sa espirituwal nga pagkaon nga ginadalit.
28 Ang dugang pasidaan mao nga walay pagahimoong pagpangluto sa bisan unsang panahon sa nataran sa kombensiyon. Maayong hunahunaong seryoso ang kamatuoran nga ang panahong gitugot alang sa pahulay sa udto gidesinyo aron nga makakaon ug light refreshment (timo) ug makapahimulos sa panag-ubanay sa atong mga igsoong lalaki ug babaye. Ingong katawhan ni Jehova, atong giila nga ang espirituwal nga pagkaon sa mga kombensiyon maoy mas hinungdanon kon itandi sa materyal nga mga butang, ug kinahanglan kitang magplano uyon niini.
29 Sa Disyembre 15, 1995, ang una sa “Malipayong mga Magdadayeg” Distritong mga Kombensiyon magsugod sa Pilipinas. Nakompleto na ba nimo ang imong mga pagpangandam, ug andam ka na ba sa pagtagamtam sa tulo ka adlaw sa malipayong pagsandurotay ug maayong espirituwal nga mga butang? Maoy among sinserong pag-ampo nga si Jehova magapanalangin sa imong mga panikaysikay sa pagtambong sa kombensiyon niining tuiga samtang kita nagapalandong kon unsaon nga mahimong “Malipayong mga Magdadayeg” kang Jehova.