Pagsunod sa Atong Panig-ingnan Ingong mga Tagdala sa Kahayag
1 Si Jesus miingon: “Ako mao ang kahayag sa kalibotan.” Pinaagig pagsunod sa iyang panig-ingnan, ang mga tinun-an ni Jesus mahimo usab nga “ang kahayag sa kalibotan.” (Mat. 5:14) Si Jesus miingon nga ang tanang mosunod kaniya makabaton ug “kahayag sa kinabuhi.”—Juan 8:12.
2 Ang organisasyon ni Jehova nagabansay kanato nga mahimong epektibong mga tagdala sa kahayag. Kon suod natong sundon ang pagtultol nga atong ginadawat, kita makadan-ag sa katawhan sa tanang matang. (1 Tim. 4:6) Ang pag-alagad ingong mga tagdala sa kahayag nagalakip dili lamang sa pagpakigsulti sa kamatuoran sa matag kahigayonan apan sa paghupot usab ug maayong panggawi. Ang panggawi sa atong Panig-ingnan di-masaway. Ingong iyang mga sumusunod, kinahanglan natong ipasundayag nga ang Kristiyanidad mao ang atong matag adlaw nga paagi sa kinabuhi. (Efe. 5:9; Tito 2:7, 8, 10) Kinahanglang ipatungha nato ang maayong mga buhat nga makita sa uban, nga magapalihok kanila sa paghimaya sa Diyos.—Mat. 5:16.
3 Ang usa ka Saksi nakahibalag ug di-kasagarang hangyo samtang nagapamalaybalay. Ang usa ka lalaki ug iyang asawa nasakit gayod, apan gikinahanglan nilang magdeposito ug kuwarta sa bangko. Sila nangutana kon mahimo ba kini sa Saksi. Siya miuyon ug gihatagan ug $2,000 nga cash aron dalhon ngadto sa bangko! Sa dihang siya mibalik, siya nangutana: “Sa unsang paagi misalig mo kanako nga wala man gani makaila kanako?” Ang tubag: “Kami nahibalo, ug ang tanan nahibalo, nga ang mga Saksi ni Jehova mao lamang ang mga masaligan.” Pagkamapasalamaton nato nga ang atong pagtapot sa moral nga mga prinsipyo sa Bibliya nagapatungha nianang maayo kaayong mga buhat!
4 Ang usa ka magtutudlo sa unang grado nagpatin-aw ngadto sa iyang klase kon nganong ang usa ka unom-tuig-edad nga estudyanteng Saksi wala makig-ambit sa pagkolor sa mga hulagway sa Kalagkalag. Ang magtutudlo nag-ingon nga siya makapasigarbo kaniya tungod sa pagbaton ug kaisog nga mahimong lahi. Kon hugot natong gituohan ang usa ka butang, ang magtutudlo miingon, kinahanglang may kaisog kita sa pagbarog dapig niana. Nianang gabhiona ang magtutudlo nagsusi sa iyang kaugalingong mga pagtulon-an ug miangkon nga siya wala magapakita sa samang kaisog sa pagbarog dapig sa iyang kaugalingong hugot nga mga gituohan. Sa sunod nga adlaw iyang gipahibalo nga siya dili na maglangkit sa iyang klase sa bisan unsang piyesta-opisyal nga mga kasaulogan sa umaabot, nga pipila niini wala man gani niya tuohi sa iyang kaugalingon!
5 Ang katawhan ni Jehova maikagon sa pagpasidlak sa ilang kahayag, bisan diin man sila. Ang sulundang panggawi sa mga batan-on sa eskuwelahan nakapadani sa mga kaeskuwela ug mga magtutudlo. Ang hamtong nga mga Saksi nga nagapasundayag sa maayong panggawi sa silinganan nakapahinabo sa uban sa pagsulting mauyonon sa mensahe sa Gingharian. Ang di-pormal nga pagsangyaw nakadani sa sinserong mga tawo nga buot makakat-og dugang. Bisan ang atong kakugi ug pagkamatinud-anon sa sekular nga trabaho nagahatag ug pamatuod.
6 Pinaagig suod nga pagsunod sa atong dakong Panig-ingnan, kita makapadayon sa paghingpit sa atong mga kahanas ingong iyang mga tinun-an. Ang pagsundog sa iyang panig-ingnan magseguro nga ang atong kahayag “molamdag sa tanan.”—Mat. 5:15; 1 Ped. 2:21.