“Padayon sa Pagbantay”
1 Sa dihang gipamulong ni Jesus ang mga pulong nga natala sa Mateo 26:38-41, siya nagkaduol na sa labing makuyaw nga panahon sa iyang tawhanong paglungtad. Ang kaluwasan sa tanang katawhan nameligro. Ang mga tinun-an ni Jesus nanginahanglan nga “padayon sa pagbantay.”
2 Karong adlawa kita nagabarog sa ganghaan sa pag-abot ni Jesus ingong manluluwas ug tigpatay. Ingong mabinantayong mga Kristohanon nga nakaamgo sa pagkadinalian sa mga panahon, dili kita wala ing buhaton lamang ug maghulat sa kaluwasan. Kita nahibalo nga kinahanglan kitang mangandam sa tanang panahon. Kinahanglan alang kanato nga padayong “nagahago ug nagapanlimbasog sa atong kaugalingon” diha sa atong pag-alagad kang Jehova. (1 Tim. 4:10) Komosta man ang matag usa kanato sa tinagsatagsa? Kita ba nagapadayon sa pagbantay?
3 Pagsusi sa Atong Kaugalingon: Si Jesus nagpasidaan usab: “Tagda ang inyong kaugalingon.” (Luc. 21:34, 35) Kinahanglan kitang magmatinagdanon sa atong kaugalingon, nga nagaseguro nga kita “walay-ikasaway ug inosente ... taliwala sa baliko ug lubag nga kaliwatan.” (Filip. 2:15) Kita ba nagakinabuhi sa matag adlaw ingong mga Kristohanon, nga nagasundog kang Jesus ug nagalakaw uyon sa mga prinsipyo nga gilaraw sa Pulong sa Diyos? Sa dihang atong susihon ang atong kaugalingon sa kahayag sa mga Kasulatan, kita ba gayod nagabantay ingon sa gipahimangno ni Jesus?—Roma 13:11-14.
4 Ang mga ansiyano kinahanglang kugihan sa pagtuman sa ilang mga asaynment sa kongregasyon, nga nagaamgo nga sila magahatag ug husay kon giunsa nila pag-atiman ang panon. (Heb. 13:17) Ang mga ulo sa pamilya may espesyal nga obligasyon sa pag-agak sa ilang mga panimalay, diha sa mga paagi ni Jehova. (Gen. 18:19; Jos. 24:15; itandi ang 1 Timoteo 3:4, 5.) Usab, pagkahinungdanon gayod nga kitang tanan magatuman sa Kasulatanhong sugo sa paghigugma sa usag usa! Kana, mao ang timaan sa matuod nga Kristiyanidad.—Juan 13:35.
5 Magmaalisto sa Pagpasidaan sa Uban: Ang padayong pagbantay nagalakip ug labaw pa sa pagtagad sa atong kaugalingon. Kita adunay katungdanan sa paghimog mga tinun-an sa uban. (Mat. 28:19, 20) Ang gugma sa silingan angayng magapalihok kanato sa pagpasidaan sa uban aron nga sila mahimong makalabang-buhi sa kalaglagan nga nagaatubang niining kalibotana. Kini maoy usa ka responsabilidad nga nahipatong sa tanang Kristohanon. Kini maoy hinungdanong bahin sa atong pagsimba. (Roma 10:9, 10; 1 Cor. 9:16) Sagad atong ikahibalag ang kawalay-pagtagad o pagsupak ngadto niining nagaluwas-kinabuhing buluhaton. Kita may obligasyon sa pagpadayon, bisan kon ang kadaghanan mosalikway sa atong pasidaan. (Ezek. 33:8, 9) Ang tiunay nga gugma alang sa Diyos ug silingan magpalihok kanato sa paglahutay.
6 Kini dili maoy panahon sa paglangaylangay. Dili kita angayng malangkit kaayo sa adlaw-adlaw nga mga kabalaka sa kinabuhi o sa mga kalipayan niining sistemaha nga kana mahimo nang usa ka lit-ag. (Luc. 21:34, 35) Kon aduna man gayoy panginahanglan sa pagkadinalian, kana mao na karon. Kadto lamang nagamata, alisto, ug mabinantayon ang makalabang-buhi. Kon kita mosugot sa mga pahimangno ni Jesus ug “molampos sa pag-ikyas niining tanang butanga,” pagkamapasalamaton gayod unya nato!—Luc. 21:36.