Kristohanong Panggawi sa Tunghaan
1 Kon ikaw usa ka Kristohanong batan-on nga nagatungha pa, nanginahanglan ka ug lig-ong pagtuo sa paghupot sa imong integridad. Hinungdanon nga imong ipadapat ang tambag ni Pedro nga “padayong-hupti ang inyong panggawi nga maayo taliwala sa mga nasod, aron . . . sila ingong resulta sa inyong maayong mga buhat nga niini sila mga saksing-nakakita magahimaya sa Diyos.” (1 Ped. 2:12) Ikaw nanginahanglan ug kaisog sa pag-atubang niining hagita.
2 Nagaeskuyla man o wala, ikaw nagasagubang sa di-minyo nga pakigsekso, malaw-ay nga pinulongan, tabako, ug abuso sa mga droga. Matag adlaw, ikaw makasugamak ug mga tintasyon nga nagahulga sa pagdaot sa imong maayong gawi. Sama sa mga hingkod, ikaw kinahanglang “kusganong makigbugno alang sa pagtuo” kon ikaw makalahutay man sa maong mga pagsulay.—Jud. 3; tan-awa ang Hulyo 15, 1991, Bantayanang Torre, mga panid 23-6.
3 Diha sa tunghaan, adunay mga nasodnong seremonyas ug kalibotanong mga pangilin. Kon ang usa ka masulayong kahimtang motungha, ikaw ba “nagahupot ug maayong tanlag, aron nga ... sila mangaulaw kinsa nagapamulong nga mayam-iron sa maayo ninyong panggawi”?—1 Ped. 3:16.
4 Tingali matintal ka sa mga kalihokan sa mga dula sa tunghaan o mga sosyal nga mga katigoman. Ikaw kinahanglang magmaalisto sa pag-ila kon sa unsang paagi kining daw makalingaw nga mga kalihokan makapakompromiso sa imong pagtuo. Adunay panginahanglan sa pagpili sa imong mga kauban nga niana imong matagamtam ang “pagdinasigay,” ang matag usa napalig-on pinaagi sa pagtuo sa uban.—Roma 1:12.
5 Ikaw Makalahutay, Pinaagig Tabang ni Jehova: Si Satanas kanunay nga nagasulay sa imong pagtuo. Ang mga pagsulay nga kinahanglan nimong lahutayan mahimong grabe, apan ang mga ganti magpahinabo niini nga takos. (1 Ped. 1:6, 7) Dili ka makalampos sa imong kaugalingon; kinahanglan kang motutok ngadto kang Jehova alang sa tabang. Si Jesus nag-agda sa iyang mga disipulo: “Padayon sa pagbantay ug sa pag-ampo nga mapadayonon, aron nga dili kamo mahisulod sa tintasyon.” (Mat. 26:41) Ang disiplina ug pagpugong-kaugalingon maoy hinungdanon.—1 Cor. 9:27.
6 Hinumdomi kanunay nga ikaw manubag kang Jehova, kinsa makakita sa tanan nimong ginabuhat. (Eccl. 11:9; Heb. 4:13) Ang sinserong tinguha sa pagpahimuot kaniya kinahanglang magpalihok nimo nga ‘padayong panlimbasogan ang inyong kaugalingong kaluwasan uban ang kahadlok ug ang pagpangurog.’ (Filip. 2:12) Ang pagbasa sa Pulong sa Diyos matag adlaw dakong tabang.
7 Ang mga ginikanan nanginahanglang makamatngon sa mga problema nga ginaatubang sa mga kabataan, ug magtaganag tabang sa dihang gikinahanglan. Mga ginikanan, kamo ba nakapatisok sa inyong mga kabataan ug pagpanabot sa mga balaod ug prinsipyo sa Diyos? Sa dihang nagaatubang ug mga tintasyon, lig-on ba ang inyong mga kabataan, o sila daling maluya? Nawad-an ba silag kadasig tungod kay sila kinahanglang mahimong lahi gikan sa ilang mga katalirongan? Kon inyong himoon ang inyong buluhaton nga maayo, kamo makatabang kanila nga magmadaogon sa pakigbugno dapig sa pagtuo.—Deut. 6:6, 7; Prov. 22:6.