Ikaw Ba Bug-os-Panahong Saksi?
1 Motubag ka bag oo niining pangutanaha? Bisan tuod dili tanang nagpahinungod nga mga alagad ni Jehova ang malista diha sa bug-os-panahong ministeryo, dili ba makataronganon ang pagdahom nga ang tanan kanato angayng maglantaw sa atong kaugalingon ingong iyang bug-os-panahong mga Saksi? Angay gayod nga ingon niana ang atong panglantaw.
2 Walay ingon nianang butanga nga di-bug-os-panahong Kristohanon. Si Jesus miingon bahin sa iyang amahan: “Ako kanunayng nagabuhat sa mga butang nga makapahimuot kaniya.” (Juan 8:29) Si Pablo, nga mibati sa samang paagi, miawhag kanato nga “himoa ang tanang butang alang sa kahimayaan sa Diyos.” (1 Cor. 10:31) Sa walay duda diay kitang tanan angayng magtagad sa atong kaugalingon ingong bug-os-panahong mga Saksi ni Jehova. Ang pag-isip nato sa atong kaugalingon ingong bug-os-panahong mga Saksi mag-impluwensiya kanato alang sa ikaayo sa matag kalihokan nga atong pangagpason.
3 Tagba ang Ebibensiya: Ang atong panagway, sinultihan, ug pamatasan magpaila ngadto sa ubang mga tawo nga kita gayod mga Saksi ni Jehova. Mabalak-on kita sa panginahanglan sa makasaranganong panagway, maayong sinultihan, ug tukmang pamatasan sa bisan unsang panahon nga kita moduyog sa pag-alagad sa kanataran o motambong sa Kristohanong mga tigom. Bisan pa niana, kita man moeskuyla, manarbaho, o nagalulinghayaw, ang tanan bahin kanato kinahanglang maghatag ug pamatuod nga kita nagakinabuhi sa matarong nga mga sukdanan ni Jehova.
4 Si Jesus miingon: “Ang usa ka siyudad dili matago sa dihang mahimutang ibabaw sa bukid. . . . Palamdaga ang inyong kahayag atubangan sa mga tawo, aron ilang makita ang maayo ninyong mga buhat ug mohatag ug himaya sa inyong Amahan nga anaa sa mga langit.” (Mat. 5:14-16) Kinahanglang tinuod kini diha sa tanang butang nga atong buhaton ug sa tanang panahon. Kon atong makaplagang kita magduhaduha sa pagpamatuod tungod sa atong nahimutangan o sa atong ginabuhat, angayng suknaon nato ang atong kaugalingon, ‘Nagaalagad ba ako kang Jehova nga di-bug-os-panahon o bug-os-panahon?’ Hinaot nga dili nato palabyon ang kahigayonan sa pagsulti ngadto sa uban bahin sa maayong balita sa Gingharian sa Diyos.
5 Hinumdomi, atong mapasidunggan ug mapalipay si Jehova kon atong matubag ang pangutana, “Ikaw ba bug-os-panahong Saksi?” uban ang malanog nga “Oo!”