Atong Ministeryo—Usa ka Pahayag sa Tinuod nga Gugma
1 Pinaagi sa atong ministeryo atong ginapasundayag ang atong pagkamasinundanon sa duha ka labing dakong sugo. (Mat. 22:37-39) Ang atong gugma kang Jehova nagadasig kanato sa pagsulting positibo bahin kaniya. Ang atong gugma sa atong mga silingan magtukmod kanato sa pagdasig kanila sa pagpangita sa kahibalo sa kabubut-on sa Diyos ug mga katuyoan aron nga, sama kanato, sila makadangat sa paghigugma kang Jehova ug mahalaray sa ilang kaugalingon alang sa ganti sa kinabuhing walay kataposan. Busa, diay, pinaagi sa atong ministeryo kita nagapasidungog sa ngalan ni Jehova ug nagapakig-ambit sa bililhong paglaom sa Gingharian uban sa atong mga silingan. Oo, ang atong ministeryo maoy kapahayagan sa matuod nga gugma alang sa Diyos ug sa tawo.
2 Ang atong gugma magtukmod kanato sa pagsulti ngadto sa tanang matang sa mga tawo, sa tanang matang sa kahimtang. (1 Cor. 9:21-23) Sa pag-ilustrar: Sakay sa ayroplano, usa ka Kristohanong ansiyano mitapad paglingkod sa usa ka Romano Katolikong pari. Gikasulti sa ansiyano ang pari pinaagi sa pagsuknag pipila ka mataktikanhong mga pangutana ug, dayon, nagtumong sa panaghisgot ngadto sa Gingharian. Sa dihang nanaog ang pari sa ayroplano, iyang gidawat ang duha sa atong mga libro. Pagkamaayong resulta sa kapahayagan sa matuod nga gugma sa ansiyano alang sa iyang silingan!
3 Gugma Magbasig Kanato sa Pagsangyaw: Kadtong makig-ambit sa pag-oksilyare ug bug-os-panahong buluhaton sa pagpayunir tinong nagapasundayag sa matuod nga gugma alang sa Diyos ug sa silingan. Ang mga payunir padayong nagasakripisyo sa ilang panahon ug kusog sa pagtabang sa uban sa espirituwal. Unsay nagadasig kanila sa pagbuhat niini? Usa ka payunir [babaye] miingon: “Ako nasayod nga ang gugma maoy bunga sa espiritu sa Diyos. Busa kon wala kana wala gayod unta ako sa kamatuoran, nga mas pang di ko molampos ingon nga payunir. Ang gugma nagahimo kanakong mahunahunaon sa mga tawo, masayod sa ilang mga panginahanglan, ug ako mahinangop nga ang mga tawo mosanong sa gugma.” Gipasundayag ni Jesus ang maong gugma alang sa mga tawo. Makausa sa dihang siya ug ang iyang gikapoy nga mga tinun-an nangitag lugar aron ‘mamahulay ug diyutay,’ ang mga panon sa katawhan nag-una kanila didto. Unsay gibuhat ni Jesus? “Gitukmod siya sa kaluoy alang kanila,” iyang gihiklin ang iyang personal nga mga panginahanglan aron sa “pagtudlo kanila sa daghang butang.”—Mar. 6:30-34.
4 Bisan kon isalikway sa mga tawo ang maayong balita nga atong ginatanyag, kita makasinatig pangsulod nga kalipay, sa pagkasayod nga, natukmod sa gugma, atong gihimo ang atong labing maayo sa pagtabang kanila sa pag-angkon sa kaluwasan. Sa dihang kitang tanan sa kataposan hukman ni Kristo, kita magmalipayon pag-ayo nga atong gipasundayag ang tinuod nga gugma pinaagi sa ‘bug-os nga pagbuhat sa atong ministeryo.’—2 Tim. 4:5.