Tambong sa mga Tigom “Labi pa Gayod nga Ingon”
1 Ang pagtigom nga tingob kanunayng hinungdanon alang sa katawhan ni Jehova. Ang mga Israelinhon adunay templo ug ilang mga sinagoga ingong mga sentro sa matuod nga pagsimba, balaang edukasyon, ug malipayong panag-ubanay. Sa samang mga katarongan ang unang mga Kristohanon wala magsalikway sa ilang panagkatigom. Samtang ang mga pagpig-ot ug mga pagsulay nagauswag niining makuyaw nga kataposang mga adlaw, kita usab nanginahanglan sa espirituwal nga pagpalig-on nga ginatagana sa atong mga tigom sa kongregasyon ug kita nanginahanglan niana nga “labi pa gayod nga ingon.” (Heb. 10:25) Matikdi ang tulo ka rason kon nganong kita motambong sa mga tigom.
2 Alang sa Panag-ubanay: Ang Kasulatan nagatambag kanato sa “padayon sa paghupayay sa usag usa ug paglinig-onay sa usag usa.” (1 Tes. 5:11) Ang diyosnong panag-ubanay magpuno sa atong mga hunahuna sa maayong mga pangisip ug magdasig kanato sa paghimo sa maayong mga buhat. Apan kon atong ipalain ang atong kaugalingon, kita mahilig nga modawat sa binuang, hinakog, o bisan imoral nga mga ideya.—Prov. 18:1.
3 Alang sa Instruksiyon: Ang Kristohanong mga tigom nagataganag padayong programa sa instruksiyon sa Bibliya nga gidisenyo sa paghupot sa gugma sa Diyos nga buhi diha sa atong mga kasingkasing. Kini nagahatag ug praktikal nga pagtultol sa pagpadapat sa “tanang gimbut-an sa Diyos.” (Buh. 20:27) Ang mga tigom nagabansay kanato sa arte sa pagsangyaw ug sa pagpanudlo sa maayong balita, mga katakos nga gikinahanglan nga labi pa gayod nga ingon karon aron makatagamtam sa di-mahubit nga kalipay sa pagkaplag ug pagtabang niadtong kinsa modawat sa kamatuoran sa Bibliya.
4 Alang sa Pagpanalipob: Niining daotang kalibotan, ang kongregasyon maoy matuod espirituwal nga dalangpanan—usa ka dangpanan sa pakigdait ug gugma. Sa dihang kita motambong sa mga tigom sa kongregasyon, ang balaang espiritu sa Diyos adunay gamhanang impluwensiya kanato, nga magpatunghag bunga sa “gugma, kangaya, pakigdait, taas-nga-pailob, kalulot, pagkamaayo, pagtuo, kalumo, pagpugong-sa-kaugalingon.” (Gal. 5:22, 23) Ang mga tigom nagalig-on kanato sa pagbarog nga dili matarog ug solido sa pagtuo. Nagasangkap kini kanato nga maandam sa mga pagsulay sa unahan.
5 Pinaagig regular nga pagtambong sa tigom, atong matagamtam ang gihubit sa salmista, ingon sa natala sa Salmo 133:1, 3: “Ania karon! Pagkamaayo ug pagkamalipayon gayod sa mga magsoon nga managpuyo sa paghiusa!” Bisan diin ang katawhan sa Diyos mag-alagad ug magkatigom karong adlawa, “didto gisugo ni Jehova ang panalangin, bisan sa kinabuhi nga walay kataposan.”