Pangutana

◼ Unsay atong mahimo sa pagpauswag sa kaepektibo sa atong mga tigom?

Ang pipila tingali mokiling sa pagbati nga ang mga ansiyano ug ministeryal nga mga alagad mao lamang gayod ang responsable sa kalamposan sa mga tigom sa kongregasyon tungod kay sila ang nagadumala niini ug nagahatag sa kadaghanang mga bahin. Ang tinuod, kitang tanan makatampo sa personal alang sa makapainteres ug mapuslanong mga tigom. Atong mahimo ang mga tigom nga mas epektibo sa mosunod napulo ka paagi:

Panganbam nga abante. Sa dihang kita mangandam pag-ayo, ang mga tigom makakuha sa atong interes. Sa dihang kitang tanan maghimo niini, ang mga tigom mas buhi ug mas makapalig-on. Tambong nga makanunayon. Ang taas nga manambong mas makapadasig sa tanang presente, nga magpalig-on sa atong pagpabili sa kabililhon sa pagtambong. Moabot nga untop. Kon nakalingkod na una pa magsugod ang programa, kita makaapil sa pangbukas nga awit ug pag-ampo ug busa makadawat sa bug-os nga kaayohan gikan sa tigom. Tambong nga nasangkapan pag-ayo. Pinaagig pagdala sa atong Bibliya ug sa (mga) publikasyon nga gamiton panahon sa tigom, atong masundan ug mas masabtan kon unsay ginahisgotan. Likayi ang mga kabalbahan. Kita makapaminaw pag-ayo kon kita molingkod sa unahan. Ang paghunghongay ug kanunayng pagpangasilyas makapawala sa atong konsentrasyon ug sa uban. Himoa nga usa ka tigpakig-ambit. Kon mas daghan kanato ang mopataas ug kamot ug mokomento, mas daghan ang madasig ug malig-on sa mga pagpahayag sa pagtuo. Himoang mubo ang mga komento. Kini maghatag sa mas daghan kutob sa maarangan sa kahigayonan sa pag-ambit. Kinahanglang huptan natong mubo ang atong mga komento sa materyal nga ginatun-an. Tumana ang mga asaynment. Ingong mga estudyante sa Tunghaan sa Teokratikanhong Ministeryo o ingong mga tigsalmot sa Tigom sa Pag-alagad, pangandam pag-ayo, pagrepaso nga abante, ug sulaying dili kanselahon ang imong asaynment. Bayega ang mga tigsalmot. Sultihi ang uban nga gipabilhan pag-ayo ang ilang mga paningkamot. Kini magpalig-on kanila ug magdasig kanila sa pagbuhat ug mas maayo pa sa umaabot. Basiga ang usag usa. Ang malulotong mga timbaya ug makapalig-ong mga panaghisgot, sa dili pa ug human sa mga tigom, magpadugang sa kalipay ug mga kaayohan nga atong makuha gikan sa pagtambong sa mga tigom.