Pag-atiman sa mga Kabtangan sa Agalon

¹ Sa mga panahon sa Bibliya, dakong pagpiyal ang gihuptan sa usa ka tinugyanan. Si Abraham naghatag sa iyang tinugyanan sa tahas sa pagpangitag usa ka asawa alang sa iyang anak, si Isaac. (Gen. 24:1-4) Sa tinuod, ang tinugyanan mao ang responsable sa pagseguro nga magpadayon ang kaliwat ni Abraham. Pagkadakong responsabilidad! Dili ikatingala nga si apostol Pablo miingon: “Ang gipangita diha sa mga tinugyanan mao nga ang usa ka tawo makaplagang kasaligan”!​—1 Cor. 4:2.

Kristohanong Pagkatinugyanan

² Ang ubang mga bahin sa Kristohanong ministeryo gihubit diha sa Bibliya ingon nga mga pagkatinugyanan. Pananglitan, si apostol Pablo misulti ngadto sa mga taga-Efeso “sa pagkatinugyanan sa dili-takos nga kalulot sa Diyos nga gihatag kanako alang kaninyo.” (Efe. 3:2; Col. 1:25) Iyang giisip ang iyang komisyon sa pagdala sa maayong balita ngadto sa mga nasod ingong usa ka pagkatinugyanan nga angay niyang dumalahon nga matinumanon. (Buh. 9:15; 22:21) Ang apostol nga si Pedro misulat ngadto sa iyang dinihogang mga igsoon: “Magmaabiabihon sa usag usa nga walay pagmulo. Sumala sa nadawat nga gasa sa matag usa, gamita kini sa pag-alagad sa usag usa ingon nga maayong mga tinugyanan sa dili-takos nga kalulot sa Diyos nga gipahayag sa nagkadaiyang paagi.” (1 Ped. 4:9, 10; Heb. 13:16) Bisag unsay nahuptan sa materyal nga paagi niadtong unang-siglong mga Kristohanon maoy resulta sa dili-takos nga kalulot ni Jehova. Busa, sila maoy mga tinugyanan niadtong mga butanga ug kinahanglang gamiton kana sa Kristohanong paagi.

³ Karong adlawa, ang mga Saksi ni Jehova adunay susamang panglantaw sa mga butang. Gipahinungod nila ang ilang kaugalingon ngadto kang Jehova nga Diyos ug giisip ang tanan nilang nabatonan​—ang ilang mga kinabuhi, ilang pisikal nga kusog, ilang materyal nga mga kabtangan​—ingong mga bunga sa “dili-takos nga kalulot sa Diyos nga gipahayag sa nagkadaiyang paagi.” Ingong maayong mga tinugyanan, ilang gibating may tulubagon ngadto kang Jehova nga Diyos sa paagi nga ilang gigamit kining mga butanga. Dugang pa, gihatagan silag kahibalo sa maayong balita. Kini usab maoy usa ka pagpiyal nga buot nilang gamiton sa labing maayong paagi nga posible: sa paghimaya sa ngalan ni Jehova ug sa pagtabang sa uban nga makadangat sa kahibalo sa kamatuoran.​—Mat. 28:19, 20; 1 Tim. 2:3, 4; 2 Tim. 1:13, 14.

⁴ Sa unsang paagi ang mga Saksi ni Jehova nagbuhat sa ilang mga responsabilidad ingong mga tinugyanan? Ang tinuig nga taho nagpakita nga sa miaging tuig lamang, sa tibuok kalibotan sila migugol ug kapin sa usa ka bilyong oras sa pagsangyaw sa “maayong balita sa gingharian” ug nagdumalag kapin sa 4,500,000 ka pagtuon sa Bibliya sa balay uban sa interesadong mga tawo. (Mat. 24:14) Ang ilang pagkamatinumanon ingong mga tinugyanan ni Jehova gibutyag usab pinaagig ilang dagayang mga amot sa tibuok-kalibotang buluhaton ug sa pagpaluyo sa lokal nga mga Kingdom Hall, pinaagig ilang pagkamaabiabihon ngadto sa nagapanawng mga magtatan-aw ug sa uban, ug pinaagig ilang talagsaong kalulot ngadto kanilang nanginahanglan pag-ayo​—sama sa mga biktima sa mga gubat. Ingong usa ka grupo, ang tinuod nga mga Kristohanon nagaatiman pag-ayo sa mga kabtangan sa Agalon.

“Ang Kasaligang Tinugyanan, ang Usa nga Mabuot”

⁵ Ang pagkatinugyanan naglungtad dili lamang diha sa indibiduwal kondili sa organisasyonal nga sukod usab. Si Jesus nagtawag sa dinihogang Kristohanong kongregasyon sa yuta nga “ang kasaligang tinugyanan, ang usa nga mabuot.” (Luc. 12:42) Ang responsabilidad niining “kasaligang tinugyanan” mao ang pagtagana ug “taganang pagkaon” ug sa pagpanguna sa internasyonal nga pagsangyaw sa maayong balita. (Pin. 12:17) Maylabot niini, ang kasaligang tinugyanan nga matang, nga gihawasan sa Nagamandong Lawas, adunay hatag-Diyos nga responsibilidad nga dumalahon sa tukmang paagi ang materyal ug espirituwal nga ‘mga talanton’ niini. (Mat. 25:15) Uyon sa panig-ingnan sa “kasaligang tinugyanan,” ang tagsa-tagsa ka korporasyon sa sanga maningkamot nga gamiton ang pinansiyal nga mga amot sa responsableng paagi, sa pagpalambo sa intereses sa Gingharian. Tanan sa maong mga amot gihimong piyal, ug “ang kasaligang tinugyanan, ang usa nga mabuot” maoy responsable sa pagtino nga kini gamiton alang sa gitumong nga katuyoan ug nga kini madumalang maalamon, madaginoton, ug sa epektibong paagi.

⁶ Usa ka pananglitan sa maalamong paggamit sa inamot nga mga salapi makita diha sa pagtubo sa buluhatong pagpatik sa mga Saksi ni Jehova sulod sa ika-20ng siglo. Ang pagpanagtag sa mga Bibliya maingon man sa literatura sa Bibliya​—mga magasin, mga libro, mga brosyur, mga pulyeto, mga tract, ug mga Kingdom News​—nagdulag dakong bahin sa pagpakaylap sa “maayong balita” sulod niining “kataposang mga adlaw.” (Mar. 13:10; 2 Tim. 3:1) Ug ang magasing Bantayanang Torre nahimong dakong instrumento sa pagtaganag “pagkaon sa hustong panahon” ngadto sa “panimalay sa Diyos” ug sa ilang mga kaubanan, ang “dakong panon” sa “ubang mga karnero.”​—Mat. 24:45; Efe. 2:19; Pin. 7:9; Juan 10:16.

⁷ Sa sinugdan, ang tanang literatura sa mga Saksi ni Jehova gipatungha pinaagig komersiyal nga mga tig-imprenta. Apan sulod sa mga 1920, nahukman nga mahimong mas episyente ug mapuslanon sa espirituwal kon ang mga alagad ni Jehova magpatik sa ilang kaugalingon. Nagsugod sa gamayng paagi sa 1920, ang buluhatong pagpatik hinayhinayng mitubo sa Brooklyn, New York, hangtod nga kini midako pag-ayo. Sa pagka-1967 ang maong mga pasilidad nagkobre na sa upat ka bloke sa siyudad. Ang pagpatik ginahimo usab sa ubang kayutaan, apan sa kadaghanan niini, kini gibalda pinaagig Gubat sa Kalibotan II.

⁸ Bisan unsa pa ka dako ang pagtubo sa pagpatik nga buluhaton sa Tinipong Bansa, wala gayod kini mopaigo sa pagsuplay sa tibuok kalibotan. Busa, sa misunod nga mga tuig human sa gubat, ang mga pagpamatik nga buluhaton gipahiluna o ginahimo na sa daghang ubang kanasoran, lakip sa Canada, Denmark, Gresya, Habagatang Aprika, Inglaterra, Kasadpang Alemanya, ug Switzerland. Sa sayong katuigan sa 1970, ang Australia, Brazil, Ghana, Hapon, Nigeria, ang Pilipinas, ug Pinlandia nadugang sa listahan. Ang pipila niining mga nasora nagpatik usab ug tinahing mga libro. Usab, sayo sa mga 1970, ang mga misyonaryo sa Gilead gibansay sa mga katakos sa pagpatik ug gipadala ngadto sa pipila niining mga yutaa aron sa pagtabang sa lokal nga mga igsoon sa buluhaton sa pagpatik.

⁹ Sulod sa mga 1980, ang gidaghanon sa mga nasod nga niana ang mga magasin gipatik nakaabot sa kinatas-ang 51.a Pagkamaayong paggamit sa mga kabtangan sa Agalon ang nahimo niining tanan! Pagkakusganong ebidensiya sa pagtubo sa buluhaton sa Gingharian! Ug pagkagamhanang pamatuod sa dagayang pagpaluyo sa milyonmilyong indibiduwal nga mga Saksi ni Jehova kinsa ‘nagpasidungog kang Jehova uban sa ilang bililhong mga butang’! (Prov. 3:9) Busa, sila nagpamatuod sa ilang kaugalingon ingong maayong mga tinugyanan sa kon unsay gipanalangin ni Jehova kanila sa nagkalainlaing mga paagi.

Usa ka Kausaban nga Gipuntirya

¹⁰ Sulod sa mga 1970 ug sayo sa mga 1980, ang dagkong kauswagan gihimo sa teknolohiya sa pagpatik, ug ang mga Saksi ni Jehova misagop sa mas bag-ong mga teknik sa pagpatik. Kanhi, ilang gigamit ang tradisyonal nga estilo sa letterpress nga pagpatik. Kini inanayng nausab sa dihang ilang gisugdan pagsagop ang mas modernong offset nga pagpatik. Ingong resulta, ang matahom nga mga publikasyon ginapatungha sa bug-os-kolor nga mga ilustrasyon, inay sa duhay-kolor nga mga hulagway (itom ug usa ka lain pang kolor) nga mahimo sa karaang mga letterpress. Dugang pa, ang teknolohiya sa kompiyuter nagbag-o sa tibuok prepress operation (preparasyon sa pagpatik). Ang mga Saksi ni Jehova nag-ugmad ug Multilanguage Electronic Phototypesetting System (MEPS), usa ka sistemang de-kompiyuter nga karon nagsuportar sa pagpatik sa kapin sa 370 ka lainlaing pinulongan. Walay komersiyal nga programa ang ikatandi sa MEPS sa kapasidad niini nga magamit sa daghang pinulongan.

¹¹ Sa tabang sa teknolohiya sa kompiyuter sa MEPS ug ang paggamit sa maong ubang mga kaugmaran sama sa electronic mail, ang laing dakong pag-uswag nahimo sa pagpatunghag espirituwal nga pagkaon sa hustong panahon. Kanhi, ginamit ang mas daang teknolohiya, ang dili-Ingles nga pinulongang mga magasin naundan ug impormasyon mga bulan o ngani usa ka tuig nga ulahi kay sa Ingles. Karon, ang Ang Bantayanang Torre mogawas nga dungan sa 115 ka lainlaing pinulongan, ug ang Pagmata! sa 62. Nagkahulogan kini nga kapin sa 95 porsiyento niadtong nagatambong sa senemanang Pagtuon sa Bantayanang Torre sa mga Saksi ni Jehova maggamit sa samang materyal sa samang panahon. Pagkadakong panalangin niini! Pagkamaayo gayong paggamit sa mga kabtangan sa Agalon sa paggamit nianang tanang bag-ong teknolohiya!

Nagkalainlaing Organisasyonal nga mga Panginahanglan

¹² Kining bag-ong mga sistema nagbag-o sa organisasyonal nga mga panginahanglan sa tibuok-kalibotang kalihokan sa pagpatik sa mga Saksi ni Jehova. Ang mga web offset press mas paspas kay sa karaang mga letterpress, apan kini usab mahal kaayo. Ang mga sistema sa kompiyuter nga nagsuportar sa nalangkit nga buluhaton, sama sa pagsulat, paghubad, arte, ug mga grapika, samtang nagtanyag ug mas pang mga posibilidad kay sa karaang mga sistema, mas mahal usab. Sa wala madugay nasabot nga dili na takos sa gasto ang kaepektibo sa pagpatik ug mga magasin sa 51 ka nagkalainlaing mga nasod. Busa, sa mga 1990, “ang kasaligang tinugyanan” nagsusi pag-usab sa kahimtang. Unsa ang konklusyon?

¹³ Ang mga pagtuon nagpakita nga ang “bililhong mga butang” nga giamot sa mga Saksi ni Jehova ug sa ilang mga higala mas magamit pa pag-ayo kon ang pagpatik nga buluhaton usahon. Busa ang gidaghanon sa nagapatik nga mga sanga hinayhinay nga gipakubsan. Ang Alemanya maoy nagpatik sa mga magasin ug literatura alang sa daghang kayutaan sa Sidlakan ug Kasadpang Uropa, lakip sa pila nga kanhi maoy nagdumala sa ilang kaugalingong pagpatik. Ang Italya maoy nagsuplay ug mga magasin ug literatura ngadto sa mga bahin sa Aprika ug habagatan-sidlakang Uropa, lakip ang Gresya ug Albania. Sa Aprika, ang pagpatik ug magasin gilimitehan sa Nigeria ug Habagatang Aprika. Ang susamang pag-usa nahitabo libot sa kalibotan.

Mga Butang nga Timbangtimbangon

¹⁴ Sa pagka-Hulyo 1998, ang pagpatik ug mga magasin mahunong sa daghang Uropanhong kanasoran, lakip sa Austria, Denmark, Gresya, sa Netherlands, Pransiya, ug Switzerland. Ang luwan sa pagpatik sa Uropa abagahon sa Alemanya, Britanya, Espanya, Italya, Pinlandia, ug Sweden. Niining paagiha, ang wala kinahanglanang mga gastos malikayan ug ang mga amot magamit sa mas maayong paagi alang sa tibuok-kalibotang buluhaton. Giunsa man kadto paghukom kon haing mga nasora ang magpadayon ingong mga dapit sa pagpatik ug hain ang mohunong sa pagpatik? Sa pagsunod sa mando niini nga atimanon sa maalamong paagi ang mga kabtangan sa Agalon, “ang kasaligang tinugyanan” mainampingong nagsusi sa pagkapraktikal sa pagpatik sa matag dapit.

¹⁵ Ang naglabing rason kon nganong ang pagpatik gihunong sa ubang kanasoran ug giusa diha sa uban mao ang pagkapraktikal. Ang paghimo sa usa ka nasod nga mopatik ug literatura alang sa ubay-ubay ubang kayutaan maoy mas kombenyente ug mas maayong paggamit sa mahal nga mga himan. Ang pagpatik karon ginahimo diin ang mga gasto mas kubos, ang mga materyales mabatonan, ug ang mga pasilidad sa pagpadala maoy maayo. Busa, ang mga kabtangan sa Agalon gigamit ug maayo. Siyempre, ang paghunong sa pagpatik sa usa ka nasod wala magkahulogan nga ang buluhaton sa pagsangyaw didto mahunong. Aduna gihapon ing dagayang suplay sa pinatik nga basahon nga mabatonan, ug ang ginatos ka libong mga Saksi ni Jehova sa maong kayutaan magpadayong masiboton sa pagsulti sa ilang mga silingan sa “maayong balita sa pakigdait.” (Efe. 2:17) Dugang pa, kining pag-organisar pag-usab miresulta sa ubang mga kaayohan.

¹⁶ Sa pagsitar sa usa ka kaayohan, ang kadaghanang modernong mga makina sa pagpatik gikan sa Denmark, Gresya, sa Netherlands, ug Switzerland gipadala ngadto sa Nigeria ug sa Pilipinas. Ang hanas nga mga operitor gikan sa Uropanhong kanasoran midawat sa pagdapit nga mokuyog sa mga makina sa pagpatik ug bansayon ang lokal nga mga operitor sa paggamit niini. Busa, kadtong mganasora nakabaton na karon ug samang taas-kalidad nga mga magasin nga nabatonan sa ubang kayutaan.

¹⁷ Tagda ang laing kaayohan: Ang gasto sa pagpatik ug mga magasin giabaga karon sa pipila ka kayutaan diin ang pagpatik nagapadayon. Ingong resulta, sa kayutaan diin ang pagpatik gihunong, ang salapi mabatonan karon alang sa ubang katuyoan, sama sa pagpanukod ug mga Kingdom Hall ug pagtabang sa pag-atiman sa mga panginahanglan sa atong mga igsoon sa mas kabos nga kayutaan. Busa, ang mainampingong paggamit sa mga kabtangan sa Agalon nagkahulogan nga ang mga pulong ni Pablo ngadto sa mga taga-Corinto mapadapat nga mas epektibo diha sa internasyonal nga sukod: “Dili ko tuyo nga mahimong sayon alang sa uban, apan lisod kaninyo; kondili nga pinaagi sa pag-angay-angay ang inyong sobra sa pagkakaron makasapal sa ilang kakulangan . . . aron ang usa ka pag-angay-angay mahitabo.”​—2 Cor. 8:13, 14.

¹⁸ Ingong resulta niini nga pag-usa, ang mga Saksi ni Jehova libot sa kalibotan labi pang nasuod kay sukad masukad. Dili suliran sa mga Saksi sa Denmark nga ang ilang mga magasin gipatik didto sa Alemanya, bisan tuod naanad sila sa pagpatik sa ilang kaugalingon. Mapasalamaton sila sa pag-alagad sa ilang Aleman nga mga igsoon. Ang mga Saksi ni Jehova sa Alemanya naglagot ba sa punto nga ang ilang mga amot gigamit sa pagtaganag literatura sa Bibliya alang sa Denmark​—o alang sa Rusya, sa Ukraine, ug ubang kayutaan? Siyempre wala! Sila malipayon sa pagkahibalo nga ang mga amot sa ilang mga igsoon sa maong kayutaan magamit na karon alang sa ubang kinahanglanong mga katuyoan.

Pag-atiman sa mga Kabtangan

¹⁹ Sa matag Kingdom Hall sa mga Saksi ni Jehova libot sa kalibotan, adunay kahon sa amot nga gimarkahag “Contributions for the Society’s Worldwide Work​—Matthew 24:14.” Ang wala pangayoang mga amot nga gihulog sa maong mga kahon mabatonan aron magamit sa bisan diin nga adunay panginahanglan. Kon giunsa paggamit ang mga amot gihukman sa “ang kasaligang tinugyanan” ug sa tagsa-tagsa ka korporasyon sa sanga. Busa, kon gitugotan sa balaod, ang salapi nga gihulog diha sa kahon sa amot sa usa ka nasod mahimong mosuportar sa mga buluhaton sa mga Saksi ni Jehova sa laing nasod nga linibo ka kilometro ang kalay-on. Ang mga amot gigamit diha sa ubang kayutaan sa pagtaganag emerhensiyang hinabang alang sa kaubanang mga magtutuo nga nag-antos tungod sa mga urakan, mga buhawi, mga linog, ug mga gubat sibil. Ug ang maong mga donasyon ginagamit sa pagsuportar sa mga misyonaryo sa kapin gayod sa 200 ka kayutaan.

²⁰ Diha sa mga kongregasyon sa mga Saksi ni Jehova, ingong katibuk-ang lagda, ang pinansiyal nga mga butang ginahisgotan makausa lamang sa usa ka bulan​—ug sa pipila lamang ka minutos. Walay mga plato sa pagpangolekta ang ginapasa diha sa mga Kingdom Hall o sa mga asembliya. Walay pagpangayo ug mga salapi ang gipadala ngadto sa mga indibiduwal. Walay mga fund-raiser ang ginasuholan. Sa normal nga paagi, ang Ang Bantayanang Torre aduna lamang ing usa ka artikulo sa usa ka tuig nga nagsaysay kon unsaon alang niadtong gusto sa paghimog mga amot ngadto sa Watch Tower Bible and Tract Society aron sa pagsuportar sa tibuok-kalibotang buluhaton. Walay regular nga paghisgot sa panalapi sa Sosyedad diha sa Pagmata! Nan, sa unsang paagi nalampos ang dako uyamot nga buluhaton sa tibuok kalibotan sa pagsangyaw sa maayong balita, pagpanukod ug gikinahanglang mga Kingdom Hall, pag-atiman kanilang anaa sa espesyal nga bug-os-panahong pag-alagad, ug paghatag ug hinabang ngadto sa mga Kristohanon nga nanginahanglan? Si Jehova nagpanalangin sa iyang katawhan diha sa kahibulongang paagi uban ang espiritu sa pagkamahinatagon. (2 Cor. 8:2) Among pahimuslan kining higayona sa pagpasalamat sa tanan kinsa adunay bahin sa ‘pagpasidungog kang Jehova uban sa ilang bililhong mga butang.’ Sila makaseguro nga “ang kasaligang tinugyanan” magpadayon sa pagbantay sa mga kabtangan sa Agalon. Ug kita mag-ampo nga si Jehova magpadayon sa pagpanalangin sa tanang kahikayan nga gihimo alang sa pagpadako sa buluhaton sa tibuok kalibotan.

[Footnote]