Mga Magtatan-aw nga Nagapanguna—Ang Nagadumalang Magtatan-aw
1 Ang pag-alagad ingong usa ka magtatan-aw sa kongregasyon maoy usa ka seryosong responsabilidad. (Buh. 20:28; 1 Tim. 3:1) Mao kini ang una sa usa ka han-ay sa mga artikulo nga magtagik sa nagkadaiyang mga katungdanan sa Kristohanong mga ansiyano aron kitang tanan makapabili sa hinungdanong buluhaton nga ilang ginahimo alang kanato.
2 Gitudlo sa Sosyedad ang nagadumalang magtatan-aw aron sa pag-alagad sa walay tinong yugto sa panahon. Samtang ang nagadumalang magtatan-aw nagpatakdo sa mga butang, magtabang kini sa mga ansiyano sa paghatag ug tukmang pagtagad sa ilang natudlong mga kaakohan. (Organisado sa Pagtuman sa Atong Ministeryo, panid 42) Unsay nalangkit niini?
3 Dawaton sa nagadumalang magtatan-aw ang sulat sa kongregasyon ug ipasa gilayon kana ngadto sa sekretaryo aron paigoon. Sa pagpangandam sa mga miting sa mga ansiyano, kuhaon sa nagadumalang magtatan-aw ang mga sugyot gikan sa mga ansiyano maylabot sa mga butang nga kinahanglang hisgotan ug ihan-ay ang agenda. Siya usab ang mahimong tsirman sa mga miting sa mga ansiyano. Sa dihang mahimo na ang mga desisyon, segurohon niya kini nga matuman sa hustong paagi. Siya ang mopaigo sa pagpangandam sa Tigom sa Pag-alagad ug ang pag-eskedyul sa mga pakigpulong publiko. Aprobahan niya ang tanang pahibalo nga himoon nganha sa kongregasyon, mag-awtorisar sa pagbayad sa tanang normal nga mga galastohan, ug magtino nga ang matag tulo ka bulan nga pag-awdit sa mga kuwenta sa kongregasyon mahimo.
4 Ingong tsirman, ang nagadumalang magtatan-aw nagapatakdo sa buluhaton sa Komite sa Pag-alagad sa Kongregasyon. Sa dihang ang usa ka estudyante sa Bibliya mohangyo nga ilhon ingong di-bawtismadong magmamantala o sa dihang ang di-bawtismadong magmamantala gustong mabawtismohan, hikayon sa nagadumalang magtatan-aw nga ang mga ansiyano makigtagbo kaniya. Ang nagadumalang magtatan-aw manguna usab sa pagpangandam alang sa duaw sa magtatan-aw sa sirkito aron ang kongregasyon bug-os nga makakuhag kaayohan gikan sa espesyal nga semana sa buluhaton.
5 Ang mga katungdanan sa nagadumalang magtatan-aw maoy daghan ug nagkadaiya. Samtang iyang atimanon sa mapaubsanong paagi ang iyang mga responsabilidad “sa bug-os nga pagkamatinuoron,” kitang tanan makabuhat sa atong bahin pinaagig pagpahiuyon sa mga ansiyano. (Roma 12:8) Kon kita “magmasinugtanon” ug “magmapinasakopon” ngadto kanilang nanguna sa atong taliwala, ilang mahimo ang ilang buluhaton uban ang mas dakong sukod sa tinuod nga kalipay.—Heb. 13:17.