Nagahimog Bililhong Pag-alagad ang Ministeryal nga mga Alagad
1 “Sila nagpasundayag na nga mga tawong dedikado gayod kansang pagtuo napadayag diha sa masibotong pag-alagad sa Gingharian ug diha sa pagtabang sa uban nga magmalig-on sa pagtuo.” Nag-ingon gayod ang Organisado sa Pagtuman sa Atong Ministeryo, sa panid 57, bahin sa ministeryal nga mga alagad. Sa pagkatinuod, ang espirituwal nga panig-ingnan nga gipakita sa atong ministeryal nga mga alagad maoy takos nga sundogon. Ang pagbuhat uban kanila ug uban sa mga ansiyano “nagapatubo sa lawas alang sa pagpalig-on sa kaugalingon niini diha sa gugma.”—Efe. 4:16.
2 Ang ministeryal nga mga alagad nagahimog hinungdanong buluhaton diha sa kongregasyon. Hunahunaa ang tanan nilang bililhong mga serbisyo! Sila nag-atiman sa mga kuwenta, literatura, mga magasin, mga suskrisyon, ug mga teritoryo; sila naglihok ingong mga atendant; nagdumala sa kasangkapan sa sound; ug nagtabang sa pagmentinar sa Kingdom Hall. Nakig-ambit sila sa Tunghaan sa Teokratikanhong Ministeryo ug sa Tigom sa Pag-alagad. Ang pipila kanila tingali mohatag pa gani ug publikong mga pakigpulong o modumala sa ubang mga tigom sa kongregasyon. Sama sa mga sangkap sa pisikal nga lawas, ang ministeryal nga mga alagad nagahimog mga pag-alagad nga atong gikinahanglan.—1 Cor. 12:12-26.
3 Ang pagkakita sa ministeryal nga mga alagad nga mausahong nagapakigtambayayong sa mga ansiyano ingong bahin sa usa ka hugpong nga alagad uban ang pagtahoranay ug pagsinabtanay magpadasig sa uban nga buhaton ang sama niana. (Col. 2:19) Pinaagi sa matinumanong pagtuman sa ilang mga responsabilidad nga makanunayon ug pinaagig pagpakitag personal nga interes sa uban, sila makaamot ngadto sa mauswagon sa espirituwal nga kongregasyon.
4 Unsay mahimo natong buhaton aron ipakita ang atong apresasyon alang sa kugihang ministeryal nga mga alagad? Kinahanglan nga kita masinati sa ilang gitudlong mga kaakohan ug ipakita ang pagkaandam nga makigtambayayong sa dihang ang atong tabang gikinahanglan. Pinaagi sa pulong o buhat, mahimo natong ipahibalo kanila nga ang ilang trabaho gipabilhan. (Prov. 15:23) Kadtong makugihong nagabuhat alang sa atong kaayohan maoy takos sa tim-os nga pagtamod.—1 Tes. 5:12, 13.
5 Ang Pulong sa Diyos nagpahimutang sa papel ug mga kuwalipikasyon sa ministeryal nga mga alagad. (1 Tim. 3:8-10, 12, 13) Ang ilang bililhong sagradong pag-alagad kinahanglanon kaayo alang sa kalihokan sa kongregasyon. Ang maong mga lalaki takos sa atong padayong pagpalig-on, samtang silang tanan adunay “daghang buhaton diha sa buluhaton sa Ginoo.”—1 Cor. 15:58.