Ang Matagnaong Pulong sa Diyos Mamatuman Gayod!
1 Ang mga Saksi ni Jehova kanunayng interesado sa tagna sa Bibliya. Busa kita nalipay sa pagkahibalo nga ang tema sa distritong kombensiyon sa miaging tuig maoy “Matagnaong Pulong sa Diyos.” Kita maikagon sa pagkasayod kon unsay gitagana ni Jehova alang kanato ingong “pagkaon sa hustong panahon.” (Mat. 24:45) Siya wala magpahigawad kanato.
2 Mga Dagkong Puntos sa Kombensiyon: Ang sukaranang pakigpulong sa Biyernes, “Tagda ang Matagnaong Pulong sa Diyos,” naglakip sa usa ka makapatin-aw nga panaghisgot bahin sa asoy sa transpigurasyon. (Mat. 17:1-9) Gipasiugda niini nga sa pagkakaron kita anaa na sa ganghaan sa labing maayong mga panahon tungod kay kita naghinapos na gayod sa panahon sa kataposan, nga ang bag-ong sistema anaa na sa unahan! Ang usa ka hinungdanong paagi nga atong gikinahanglan sa pagtagad sa Pulong sa Diyos maoy pinaagi sa pagbasa niini nga regular. Ang simposyum nga “Kahimut-i ang Pagbasa sa Pulong sa Diyos” mitaganag praktikal nga mga sugyot sa paghimo sa atong pagbasa sa Bibliya nga mas mapuslanon ug makalingaw.
3 Sa Sabado sa palis atong gisubli ang mga katarongan kon nganong kita angayng makombinsir nga kita nagkinabuhi na sa kataposang mga adlaw. Makahinumdom ka ba niining tanan? Sa Dominggo sa buntag, ang tagna ni Habacuc gipahayag nga madasigon samtang atong nahibaloan nga ang atong adlaw kaamgid kaayo sa iyang adlaw ug ang hinungdanong mga hitabo hapit nang moabot sa dihang laglagon ni Jehova ang mga daotan ug luwason ang mga matarong. Imo bang nasabtan ang punto sa drama sa Bibliya bahin ni Jacob ug Esau? Kinahanglang aktibo natong tinguhaon ang mga panalangin gikan kang Jehova, nga nagapakigbisog sa espiritu sa kawalay-interes ug kawalay-pagtagad.
4 Usa ka Makapainteres nga Bag-ong Libro: Pagkamalipayon nato sa pagdawat sa bag-ong libro, Patalinghogi ang Tagna ni Daniel! Walay duhaduha ikaw nagabasa na niining makapatuhop nga publikasyon. Ang mamumulong nga miluwat niana miingon: “Gawas sa pipila ka detalye, ang tanang tagna sa basahon ni Daniel natuman na.” Dili ba kana nagpasiugda sa kadinalian sa atong kapanahonan?
5 Ang programa sa kombensiyon nakapalig-on ug dako sa atong pagtuo nga ang tanang saad sa Diyos nga wala pa matuman mamatuman gayod. Kita giawhag nga padayong ipahayag ngadto sa uban ang matagnaong pulong sa Diyos!