Nahuptan Mo ba ang Espiritu sa Sakripisyo-sa-Kaugalingon?
1 Ang pagpabili sa di-mahakogong nalampos ni Jesu-Kristo alang sa katawhan angayng magpalihok kanatong tanan sa paggamit sa atong mga katakos, mga kusog, ug mga kalagsik diha sa nagasakripisyo-sa-kaugalingon nga paagi. Ang Kasulatan nagahangyo: “Ipresentar ang inyong mga lawas nga usa ka halad nga buhi, balaan, dalawaton sa Diyos, usa ka sagradong pag-alagad.” (Roma 12:1) Ang popanahong pagsusi-sa-kaugalingon motabang kanimo sa pagtino kon ikaw ba bug-os nga nagapakita nianang matanga sa espiritu kutob sa itugot sa imong personal nga mga kahimtang.
2 Sa Pagpangagpas sa Kahibalo sa Bibliya: Nagagahin ka bag panahon sa personal nga pagbasa sa Bibliya ug pagtuon diha sa regular nga paagi? Nagatapot ka ba niana nga eskedyul? Imo bang rutina ang pagpangandam ug maayo alang sa mga tigom sa kongregasyon? Kon ikaw ulo sa pamilya, aduna ka bay regular nga pagtuon sa Bibliya uban sa imong panimalay? Ang pagbuhat niining mga butanga hayan magkinahanglag pagsakripisyo ug panahon nga gugolon sa pagtan-awg telebisyon o diha sa kompiyuter o sa ubang mga pangagpas. Apan, pagkagamayng sakripisyo ang himoon, kay nahibalo nga ang panahon nga gigugol sa Pulong sa Diyos motabang kanimo sa pagtultol ngadto sa kinabuhing walay kataposan!—Juan 17:3.
3 Sa Pagbansay sa Imong mga Anak: Ang labing maayong panahon sa pagsugod ug pagkat-on sa usa ka dalan sa pagsakripisyo-sa-kaugalingon maoy sa pagkabata. Tudloi ang imong mga anak nga samtang adunay panahon sa pagdula, kinahanglan nga adunay panahon usab alang sa trabaho ug alang sa teokratikanhong mga kalihokan. (Efe. 6:4) Hatagi sila ug pipila ka mapuslanong gimbuhaton sa panimalay. Paghimog usa ka regular nga eskedyul aron makaambit diha sa ministeryo kuyog nila. Palig-ona ang imong instruksiyon pinaagi sa imo mismong maayong panig-ingnan.
4 Sa mga Kalihokan sa Kongregasyon: Ang kongregasyon mapalambo sa dihang ang tanan niana mohimog kinabubut-ong mga sakripisyo sa pagpalampos sa mga butang alang sa kaayohan sa tanan. (Heb. 13:16) Posible ba alang kanimo sa paggugol ug dugang panahon diha sa pagsangyaw-sa-Gingharian ug paghimog-tinun-an nga buluhaton? Makaboluntaryo ka ba sa pag-abag sa mga masakiton o mga tigulang, tingali makatabang kanila pinaagig transportasyon paingon sa mga tigom?
5 Sa wala pa makahimog kinadak-ang paghalad sa iyang tawhanong kinabuhi, si Jesus mitambag sa iyang mga tinun-an sa pagsentro sa ilang mga mata diha sa intereses sa Gingharian, nga ang tanang ubang mga butang himoong segundaryo sa kinabuhi. (Mat. 6:33) Ang pagpangagpas nianang espiritu sa sakripisyo-sa-kaugalingon mohatag kanatog mas dakong kalipay samtang mopadayon kita sa pag-alagad kang Jehova uban ang kangaya.