Pangutana

◼ Kinsa ang angayng motanyag ug pag-ampo diha sa mga tigom sa kongregasyon?

Ang pag-ampo sa kongregasyon maoy usa ka hinungdanong bahin sa atong pagsimba. Ang paghawas sa uban atubangan kang Jehova maoy bililhong pribilehiyo ug bug-at nga responsabilidad. Tungod sa kahinungdanon niini, kinahanglang gamiton sa mga ansiyano ang maayong panghukom sa dihang magdesidir kon kinsang mga igsoong lalaki ang takos nga motanyag ug pag-ampo diha sa mga tigom. Ang bawtismadong mga igsoong lalaki nga mohawas sa kongregasyon angay nga hamtong nga Kristohanong mga ministro nga nailhan ingong maayong mga panig-ingnan ug gitahod sa kongregasyon. Ang ilang masimbahon ug matinahurong mga pag-ampo angayng magbutyag ug usa ka maayong relasyon uban kang Jehova nga Diyos. Ang artikulong “Pag-ampo Atubangan sa Uban Duyog ang Mapainubsanong Kasingkasing” diha sa Mayo 15, 1986, nga isyu sa Ang Bantayanang Torre naglaraw ug hinungdanong mga prinsipyo nga ilabinang makatabang alang kanilang moampo sa publiko alang sa kongregasyon.

Dili paampoon sa mga ansiyano ang igsoong lalaki kon siya nailhang kuwestiyonable o di-ugdang ang panggawi. Ang igsoong lalaki nga reklamador o mahilig sa paggamit sa publikong pag-ampo ingong paagi sa pagyagyag sa personal nga mga kasungian dili pagapilion. (1 Tim. 2:8) Bisan pag ang usa ka tin-edyer nga igsoong lalaki tingali bawtismado, kinahanglang tinoon sa mga ansiyano kon siya ba adunay espirituwal nga kahamtong aron moampo alang sa kongregasyon.​—Buh. 16:​1, 2.

Usahay sa mga tigom sa dayon nang pagsangyaw, tingali kinahanglanon alang sa bawtismadong igsoong babaye nga moampo kon walay takos nga igsoong lalaki didto aron mohawas sa grupo. Gikinahanglan niyang magsul-ob ug haom nga pandong. Kon matino nga walay takos nga igsoong lalaki ang presente sa pipila ka tigom sa dayon nang pagsangyaw, ang mga ansiyano angayng magtudlo ug takos nga igsoong babaye aron manguna.

Naandan na alang sa tsirman sa Miting Publiko nga motanyag sa pangbukas nga pag-ampo. Apan, sa ubang mga tigom sa kongregasyon, kon adunay ubay-ubayng takos nga mga igsoong lalaki ang magamit, ang lain gawas pa sa igsoong lalaki nga nagbukas sa tigom o ang usa nga natudlo sa paniklop nga bahin mahimong tawagon aron motanyag sa pangbukas o paniklop nga mga pag-ampo. Sa bisan hain nga kahimtang, ang igsoong lalaki nga tawagon aron moampo diha sa tigom sa kongregasyon angayng pahibaloon nga abante aron siya makapamalandong kon unsay iyang isulti. Dayon siya makatanyag ug konektado, mahinangpong pag-ampo nga haom nianang partikular nga tigom.

Ang maong mga pag-ampo dili kinahanglang taas. Sa dihang ang igsoong lalaki moampo sa publiko, kasagaran masabtan siyag maayo kon siya magtindog, magpahayag sa iyang kaugalingon nga may igong gikusgon sa tingog, ug magsulti nga tin-aw. Kini magtugot kanilang tanan nga nanambong nga madunggan ang pag-ampo ug sa pagkahuman sa kinasingkasing moingong “Amen!”​—1 Cron. 16:36; 1 Cor. 14:16.